• Йеңилиқлар
• 03 Қазан, 2018

«Мәхсәт – нефть-газ саһасини риваҗландуруш»

Мәшүр САСИҚОВ, «Уйғур авази» Мәлумки, елимиз ихтисадиниң тәрәққиятида нефть билән газниң алидиған орни алаһидә. Қазақстанда Йәрасти байлиқлирини тепиш вә улардин пайдилиниш саһасида 1000ға йеқин ширкәт ишләватса, улар 170 000 адәмни иш билән тәминләватиду. Ихтисат җәһәттин елип қариғанда, Қазақстандәк углеводородқа бай мәмликәткә, әлвәттә, бу азлиқ қилиду. Нефть ишләпчиқириш вә уни қезишқа керәклик үскүниләргә хизмәт көрситиш бойичә һазир елимиздә йәрлик һәм чәтәллик ширкәтләр қолму-қол ишләватиду. Амма йәрлик ширкәтләр дунияниң тәрәққий әткән әллиридин кәлгән тәҗрибилик кәсипдашлири билән риқабәткә чүшәлмәйду. Шундақ болсиму, һазирниң өзидә бу мәсилиләр бойичә қизғин иш елип бериливатиду вә келәчәктә әйнә шу йәрасти байлиқлирини ишләпчиқириш саһаси мәмликәт ихтисадиниң асасий мәнбәси болмақ. Шуңлашқа Тенгиз вә Қашаған кәби кан орунлирини тәрәққий әткүзүшкә алаһидә әһмийәт бериливатиду. Әнди Қашағанға қизиқиватқанлар арисида мошу саһа бойичә нами дунияға тонулған алп ширкәтләр нурғун. Униңдики углеводород запасиниң миқдарини нәзәргә алидиған болсақ, миллий ихтисадимизниң пәхри дейишкә толуқ асас бар. Мана мошундақ йеңи кан орунлириниң қурулушини вә уларни дайим мурәккәп җөндәштин өткүзүп турушни һөддисигә алидиған вә электр мәнбәлири билән тәминләйдиған нефтесервис ширкәтлири Қазақстанда ишләватқан ширкәтләрниң бари-йоқи жигирмә пайизини тәшкил қилиду. Елимиздики мошу муһим мәсилиләрни һәл қилишқа көңүл бөлүш һәм нефть-газ саһасиға аммивий әхбарат васитилириниң диққитини ағдуруш мәхситидә йеқинда Алмута шәһиридики Хәлиқара Бизнес университетиниң мәҗлисләр залида Қазақстан нефтесервис ширкәтлири иттипақи вә «Казахстанский Медиа Альянс» җәмийәтлик бирләшмисиниң уюштуруши билән «Голос Нефтесервиса» мавзусида җумһурийәтлик иҗадий конкурсниң елан қилинғанлиғи тоғрилиқ конференция болуп өтти. Униңда конференциягә риясәтчилик қилған «Казахстанский Медиа Альянс» җәмийәтлик бирләшмисиниң рәиси Совет Сеитов көпчиликни конкурсниң шәртлири билән қисқичә тонуштурғандин кейин сөз новитини қазиларға, җүмлидин «Petroleum» журналиниң баш муһәррири, Қазақстан Журналистлар иттипақиниң әзаси Олег Червинский, «Медиа Альянс» бирләшмисиниң кативи, Қазақстан Журналистлар академиясиниң академиги Виктор Кияница вә «KAZSERVІSE» журналиниң муһәррири Айгерим Бахтияроваға бәрди. Натиқлар, өз новитидә, мошу саһа бойичә Қазақстанда кәспий дәриҗидә қәләм тәвритиватқан журналистларни бармақ билән санавалғили болидиғанлиғини тәкитлигән һалда, бүгүнки мәрасимға қатнишиватқан меһманларни, шуниң ичидә студентларни конкурсқа паал иштрак қилишқа чақирди. Ахирида уюштурғучилар конкурсқа рәсмий ройхәттин өткән мәтбуат васитисидә йоруқ көргән яки телерадио эфириға чиққан әмгәкләр рус вә қазақ тиллирида қобул қилинидиғанлиғини қәйт қилип, улар мошу жилниң 23-ноябрьғичә электронлуқ түрдә abakhtіyarova@kazservіce.kz яки medіa-allіance@maіl.kz адресиға әвәтиш керәклигини тәкитлиди. Шундақла улар конкурсқа чүшкән әмгәкләр төрт номинация бойичә баһалинип, мунасиплар ахчилиқ мукапатқа еришидиғанлиғини ейтти.