• Жут адәмлири
  • 03 Қазан, 2018

Жигитләрниң жигити

Жигитбашлири – уйғурларниң миллий-мәдәний тәрәққиятида алаһидә муһим роль атқуруп кәлгән, башқа һеч хәлиқтә йоқ иҗтимаий институт екәнлигини бүгүн һәрким етирап қилиду. Ата-бовилиримиз тәрипидин мундақ институтниң бәрпа болуши, паҗиәлик өтмүшимизгә беваситә бағлиқ екәнлиги һәм һәқиқәткә уйғун болуши мүмкин. Шуңлашқа әзәлдин бу мәнсәпкә әл-жут ичидә инавәт-абройға егә, әқил-парасәтлик, әң асаси – аңлиқ адәмләр сайлинип кәлгән. Жигитбашлирини “жут атиси” – “жигитләрниң жигити”, дәп атишиму тәсадипи болмиса керәк. Мана мошу мәсъулийәт ишниң һөддисидин шәрәп билән чиқип келиватқан жигитбашлири аз әмәс. Мақалимизниң қәһримани – Талғир наһийәси уйғур җамаәтчилигиниң баш жигитбеши Октябрь Қурбанниязов шулар җүмлисидин. Октябрь 1953-жили тарихий Вәтинимизниң Моңғулкүрә шәһиридә зиялий аилидә дунияға кәлгән. Атиси Өмәрҗан узун жиллар наһийәлик һакимийәттә чарвичилиқ бөлүмини башқурған болса, аниси Маһинур оттура мәктәптә устазлиқ қилған. ХХ әсирниң оттурилири хәлқимизниң бешиға кәлгән йәнә бир еғир синақ уларниң аилисиниму айлинип өткини йоқ. Шу түпәйли Өмәрҗан ата билән Маһинур ана мәҗбурий рәвиштә сәккиз балини йетәкләп, Қазақстанға көчүп чиқип, Яркәнт шәһиригә орунлишиду. Яқа жут, өзгичә шараитларда шу муһитқа өзлишип, сәккиз балини қатарға қошқичә тартқан җапа-машәқәтлири пәқәт уларниң өзлиригә аян. Шу дәвирләрдә ана-Вәтинимиздә Кеңәш Иттипақиниң күчлүк тәсиридин болса керәк, Өмәрҗан ака октябрь ейида туғулған бир оғлиниң исмини “Октябрь” дәп қоюпту. Октябрь Яркәнт шәһиридә оттура мәктәпни тамамлап, 1973-жили һәрбий хизмитини өтәшкә атлиниду. Андин кейин бираз вақит «Казсельхозтехника» мәһкимисиниң наһийәлик шөбисидә шоферлуқ қилиду. 1978-жили өмүрлүк җүпти Пәридәмгә өйлинип, үч пәрзәнт қучиду. Кеңәш Иттипақи ғулап, хәлиқ егилиги шәхсийләр қолиға өтүшкә башлиғанда, у аилиси билән Алмутиниң йенидики Бесағаш йезисиға көчүп келиду. Аридин бир жил өтә-өтмәйла, униң уюштуруш қабилийити һәм чоң-кичик билән бирдинла тил тепиш хусусийәтлирини байқиған жут уни баш жигитбешиниң орунбасари қилип сайлайду. Бүгүн Қазақстан уйғур җамаәтчилиги ичидә Октябрь Қурбанниязовни тонумайдиған адәм кам болса керәк. Чүнки у миллий мәдәнийитимизгә аит өткүзүлүватқан паалийәтләрдә өзиниң баһалиқ пикир-тәклиплири билән актив қатнишип, көчалди болуп келиватқан әзимәтлиримизниң бири. Шуңлашқа униң өткүр қабилийитини тән алған жутдашлири өткән жилдин башлап, уни Талғир наһийәлик уйғур жамаәтчилигиниң баш жигитбеши қилип сайлиди. Мошу күнләрдә Октябрь Қурбанниязов билән өмүрлүк җүпти Пәридәм өзлириниң 65 яшлиғи билән биллә, аилә қурғанлиғиниң 40 жиллиғини нишанлаватиду. Пурсәттин пайдилинип, биз достлиримизни бу шанлиқ сәнәләр билән қизғин тәбрикләп, мустәһкәм саламәтлик, узақ вә хатирҗәм өмүр тиләймиз. Шавкәт НӘЗӘРОВ.

362 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы