- Йеңилиқлар
- 03 Қазан, 2018
Президент Чимкәнт шәһиридә вә Түркстан вилайитидә болди
Бийил Президент қарари түпәйли Чимкәнт вә Түркстан тарихида йеңи сәһипә башланди. Биринчиси җумһурийәтлик шәһәр мәртивисигә егә болса, иккинчиси йеңи Түркстан вилайитиниң мәркизи болди. Демәк, һәм йеңи вилайәттә, һәм җумһурийәтлик әһмийәткә егә йеңи шәһәрдә чоң иҗтимаий-ихтисадий, мәдәний мәркәзләргә айлиниш вә күчийиш, Қазақстанниң гүллинишигә қошидиған һәссисини техиму көпәйтиш үчүн зөрүр болған һәммә нәрсә бар.
Дөләт рәһбириниң Қазақстанниң җәнубиға қилған сәпиридә Чимкәнт шәһири биринчи пункт болди. Бу йәрдә Президент иҗтимаий-ихтисадий мәхсәттики бирқатар объектларни зиярәт қилип, Қазақстанниң чоң шәһәрлириниң бирини тәрәққий әткүзүш бойичә кеңәшмә өткүзди.
Президентниң диққитигә тәвсийә қилинған объектларниң бири “ПетроҚазақстан Ойл Продактс” ҖЧЙниң нефтьни қайта ишләш заводи болди. Мәзкүр кархана К-4 вә К-5 экологиялик үлгилиригә мувапиқ келидиған нефть мәһсулатлирини чиқиришқа ихтисаслаштурулған.
Бу йәрдә Нурсултан Назарбаевқа шундақла Атырав вә Павлодар нефтьни қайта ишләш заводлириниң иши тоғрилиқ доклад қилинип, Қазақстанниң нефть базиридики һазирқи әһвали тоғрилиқ әхбарат берилди.
Нурсултан Назарбаев Чимкәнтниң Иҗтимаий хизмәтләрни бәҗириш мәркизиниму зиярәт қилди. Мәркәз һәм шәһәрликләр, һәм чәт әл инвесторлири үчүн рәқәмлик шәкилдә дөләт хизмитини қилишқа ихтисаслаштурулған. Униңға, җүмлидин аһалиға хизмәт қилиш, иш билән тәминләш мәркәзлири, миграция хизмити орунлашқан.
Бу йәрдә Президентқа ихтисатниң түрлүк секторлирида, җүмлидин аграр-санаәт комплексида, билим бериш, саламәтликни сақлаш, транспорт, бехәтәрлик, турушлуқ өй-коммунал егилиги саһалирида рәқәмләштүрүш лайиһилириниң әмәлгә ашурулуши тоғрилиқ доклад қилинди.
Дөләт рәһбири шундақла шәһәрдә турушлуқ өй селиш вә иҗтимаий қурулумни тәрәққий әткүзүш планлири, шәһәр объектлирини реконструкция қилиш вә селиш тоғрилиқ әхбарат билән тонушти.
Шәһәр һакимийитидә Чимкәнтниң иҗтимий-ихтисадий тәрәққиятиға беғишланған кеңәшмә өткүзүлди.
Президент шәһәр активи алдида сөзгә чиқип, җумһурийәтлик мәртивигә егә болғандин кейин шәһәр алдида заманивий яндишишларни вә стратегияни тәләп қилидиған йеңи вәзипиләр туруватқанлиғини тәкитлиди.
Шу күни Дөләт рәһбири Түркстанни зиярәт қилди. Президент бу йәрдә биринчи новәттә шәһәрниң йеңи мәмурий мәркизини тәрәққий әткүзүш лайиһиси билән тонушти вә униң территориясидә мемориал ташни қоюш мәрасимиға қатнашти.
Нурсултан Назарбаев шундақла вилайәт һакими Жансейит Түймебаевниң Түркстанни тәрәққий әткүзүш истиқбали, инфрақурулум объектлирини, иҗтимаий-мәдәний иншаәтләрни, мәмурий беналарни селиш планлири тоғрилиқ докладини тиңшиди.
Президент “Һәзрәт-Султан” тарихий-мәдәний қоруқ-музейиниң территориясигә орунлашқан Ғо1а Әхмәт Йәссавий қәбиргаһини зиярәт қилди вә уни тәрәққий әткүзүш плани билән тонушти.
Андин кейин болуп өткән кеңәшмидә Түркстанни вә вилайәтни комплекслиқ тәрәққий әткүзүш тоғрилиқ тәпсилий гәп болди. Бу йәрдә Нурсултан Назарбаев билән биллә мәркизий дөләт органлириниң, миллий компанияләрниң рәһбәрлири регион вә шәһәрниң келәчиги тоғрилиқ пикирлирини оттуриға қойди.
Дөләт рәһбири қобул қилинған “йол хәритисини” сүпәтлик һәм өз вақтида әмәлгә ашурушниң, шундақла вилайәтлик башқуруш органлириниң барлиқ дөләт хизмәтлирини тохталсиз көрситиши керәклигини тәкитлиди.
Кеңәшмидә Һөкүмәткә вә регион рәһбәрлигигә вилайәт мәркизини тәрәққий әткүзүш бойичә бирқатар ениқ тапшурмилар берилди.
Президент өткүзгән кеңәшмә һәқиқәтәнму тарихий әһмийәткә егә болди: мубалиғисиз тәкитләш керәкки, кеңәшмидә йеңи шәһәрниң һули селинди – Нурсултан Назарбаев һәмминиң көз алдида Түркстанни тәрәққий әткүзүш бойичә Баш план концепциясини мақуллаш тоғрилиқ Пәрманни имзалиди.
Андин кейин Президент йәнә бир Пәрманни имзалиди, униңға мувапиқ Һөкүмәткә йеңи вилайәт мәркизидә TURKISTAN Мәхсус ихтисадий зонисини қуруш тапшурулди.
Кеңәшмидә шундақла Премьер-министрниң биринчи орунбасари Асқар Мамин вә Түркстан вилайитиниң һакими Жансейит Түймебаев сөзгә чиқти.
Кеңәшмидин кейин Нурсултан Назарбаев вилайәт җамаәтчилиги вә Түркстан турғунлири билән учрашти.
Дөләт рәһбири шәһәр турғунлириға мураҗиәт қилип, йеңи Түркстан вилайитини қурушниң вә вилайәт мәркизини көчиришниң тарихий һәм иҗтимаий-ихтисадий әһмийәткә егә екәнлигини тәкитлиди.
– Түркстан хәлқимиз үчүн муһим әһмийәткә егә. У – Мәркизий Азияниң қедимий шәһәрлириниң бири. 2000-жили биз ЮНЕСКО дәриҗисидә униң 1500 жиллиғини нишанлидуқ – дәп тәкитлиди Президент.
Нурсултан Назарбаев Түркстанниң Оттура Азия территориясидә ислам динини тарқитиш җәрияндики роли тоғрилиқ сөзләп бәрди.
Дөләт рәһбири шундақла муқәддәс Түркстан йеридә улуқ шәхсләрниң вә қазақ хәлқиниң мунасип пәрзәнтлириниң дәпин қилинғанлиғини вә тәғдиранә пәйтләрдә пүткүл милләтниң келәчигигигә мунасивәтлик муһим қарарларниң қобул қилинғанлиғини тәкитлиди.
Президент ахирида Түркстанни гүлләндүрүшкә қатнишидиған барлиқ турғунларға утуқ тилиди.
428 рет
көрсетілді0
пікір