• Әхбаратлар еқими
  • 11 Қазан, 2018

Һаятий һәм тарихий әһмийити зор мәсилә муһакимә қилинди

Баш қошушни Қазақстан Җумһурийити Парламенти Мәҗлисиниң депутати, Қазақстан хәлқи Ассамблеяси Кеңишиниң әзаси, җумһурийәтлик Уйғур этномәдәнийәт мәркизиниң рәиси Шаһимәрдан Нурумов киришмә сөз билән ачти. – Һөрмәтлик қериндашлар, һәммиңларға мәлум, 5-октябрь күни елимиз Президенти Нурсултан Әбиш оғли Назарбаев Қазақстан хәлқигә өзиниң новәттики Мәктүбини йоллиди. Бүгүн силәр билән биз әйнә шу программилиқ һөҗҗәттә алға сүрүлгән һаятий һәм тарихий әһмийити зор муһим мәсилиләрни муһакимә қилиш үчүн баш қошуватимиз, – деди Шаһимәрдан Үсәйин оғли. — Шәхсән өзәм Дөләт рәһбириниң қазақстанлиқларға йоллиған бирнәччә мәктүплириниң шаһиди болдум, йәни у мәктүпләр елан қилинған мәҗлискә қатнаштим. Президентниң бу қетимқи Мәктүбиниң шәкли алдинқилириға охшимайду. У күни Президент бир саат әллик бәш минут тохтимай, министрлар, һакимлар билән очуқ шараитта сөһбәтләшти. Шу күни биз, ушбу баш қошушқа қатнашқанлар, өзимизниң тарихий бир пәйттә олтарғинимизни һис қилдуқ десәм, мубалиғә болмайду. Президент қазақстанлиқларға йоллаватқан мәзкүр Мәктүбиниң, биринчи новәттә, хәлиқниң турмуш-әһвалини, киримини, шат-шадиман һаят кәчүрүш сүпитини яхшилашқа, әлниң паравәнлигини ашурушқа қаритилғанлиғини тәкитлиди. Шат-шадиман һаят кәчүрүш, паравәнликниң өсүши дегини, биринчи новәттә, хәлиқниң саламәтлигини яхшилаштур. Һәқиқәтәнму, һәрким, биринчи новәттә, өзиниң вә йеқинлириниң саламәтлигиниң мустәһкәм болушини истәйду әмәсму! Әнди бәхитлик өмүр сүрүш үчүн балилиримиз сағлам өсүп, улар тәрбийә көргән һәм билимлик әвлат болуп йетилиши керәк. Униң үчүн мәктәптики билимниң сүпити, сөзсиз, жуқури болуши зөрүр. Һә, сағлам милләт, әлвәттә, шат-шадиман һаят кәчүриду, дегән сөз. Президент шундақла чоң трибунида олтирип, микрорайонларниң, йезиларниң һойлилириниң тазилиғи тоғрилиқ тохтилип өтти. Мошу гәпләрниң немә үчүн ейтиливатқанлиғини чоңқурирақ ойлайдиған болсақ, буниң һәммиси тоқчилиқниң бәлгүси. Әгәр, аддий сөз билән ейтсақ, қосиғиң тоқ болмиса, мошундақ гәпләрни қиламсән? Һәргиз қилмайсән. Қосақниң ғемини қилип нәләргә бармайсән. Садир палванниң қошақлирида «Қосақ ечи яман екән, шалвурни кавап әттим», дегән мисралири барғу. Демәкчи болғиним, қосақниң ғериви болуп жүргән адәм билимни, медицинини яки чәт әлдә оқушни ойламду? Әлвәттә, ойлимайду! Демәк, Президентниң Мәктүбидә алға сүрүлгән ой-пикирләрниң һәммиси 27 жилда қазақстанлиқларниң һәқиқәтәнму жуқури дәриҗигә йәткәнлигини, паравәнлигиниң өскәнлигини көрсәтсә керәк. Әнди биз һечбир дөләттин қалмай, Президент өзи ейтқандәк, 2050-жилғичә 30 тәрәққий әткән дөләтниң қатариға қошулушимиз керәк вә бүгүн шуниңға пәйдин-пәй, қәдәмму-қәдәм кетип барғинимиз һәм шу мәшъәлгә йеқинлап келиватқанлиғимизниң бәлгүси. Президент барчә қазақстанлиқларға йоллиған бу Мәктүби арқилиқ хәлиқниң турмуш-әһвалини яхшилаш, тапаватини көтириш вә турмуш сүпитини яхшилаш, билимлик әвлатни тәрбийиләш, уларниң қәлбидә Вәтәнгә, ана тилиға болған муһәббәт сезимлирини ойғитиш вәзипилирини оттуриға қоюш билән биллә, моҗут мәсилиләрни қандақ һәл қилишниң йоллирини бирқатар җавапкәр шәхсләрдин, йәни министрлардин сориди. Андин кейин уларға шу мәсилиләрни һәл қилиш бойичә ениқ тапшурмилар бәрди. Шуниму алаһидә тәкитләш керәкки, Президент келәр жилни яшлар жили дәп аташ тәкливини бәрди. Президентниң бу қетимқи Мәктүби әйнә шу тәрәплири билән алаһидә пәриқләнди һәм бүгүн биз, җумһурийәтлик Уйғур этномәдәнийәт мәркизи, бу тарихий әһмийити зор шу һөҗҗәтни биринчиләрдин болуп муһакимә қиливатимиз һәм униң әһмийитини бүгүнки жиғин қатнашқучилириниң җамаәтчиликкә дурус йәткүзидиғанлиғиға ишәнчим камил. Шаһимәрдан Үсәйин оғли шундақла Президент Мәктүбидә ейтилған муәллимниң җәмийәттики роли вә уларниң аброй-мәртивисини көтириш, ички туризмни тәрәққий әткүзүш, кичик вә оттура тиҗарәтни риваҗландуруш мәсилилиригә әтраплиқ тохтилип өткәч, урпи-адәтлиримизни сақлаш, жутлиримизда җамаәтчиликни, болупму яшлиримизни тоғра йолға башлаш вә уларни вәтәнпәрвәрлик, хәлиқпәрвәрлик роһида тәрбийиләш вә башқиму шуниңға охшаш бирлик вә иттипақлиққа, мәнивий йеңилинишқа дәвәт қилидиған һаятий зөрүр һәм умуммиллий әһмийәткә егә мәсилиләрниму диққәт-нәзәридин сирт қалдурмиди. Шундақла мәркәз рәиси мәзкүр баш қошушқа қатнишиватқан муәллимләрни кәспий мәйрими билән тәбрикләп, ишлириға утуқ тилиди. Шуниңдин кейин муһакимә сөзгә чиққан «Уйғур авази» гезитиниң баш муһәррири, Қазақстан хәлқи Ассамблеясиниң әзаси Ершат Әсмәтов, ҖУЭМ йенидики Алимлар кеңишиниң рәиси, биология пәнлириниң доктори Мәсимҗан Веләмов, Язғучилар кеңишиниң рәиси, филология пәнлириниң намзити Патигүл Мәхсәтова, Ханим-қизлар кеңишиниң рәиси Сәнәм Беширова, Жигитбашлири кеңишиниң рәиси Ярмуһәммәт Кибиров, ҚУЯБ рәиси Рустәм Хәйриев, Мәшрәп кеңишиниң рәиси Тәлъәт Надиров Президент Мәктүби бойичә өз ой-пикирлири билән ортақлашти. Ахирида жиғинниң хитапнамиси қобул қилинғандин кейин, тәшкилий мәсилә қарилип, көпчилик аваз билән бир түркүм салаһийәтлик шәхсләр –алимлар, язғучилар, тиҗарәтчиләр, әдлийә хадимлири, тәдбирчан яшлардин тәркип тапқан 35 адәм ҖУЭМниң башқарма әзалири болуп сайланди. Тарих пәнлириниң доктори Абләһәт Камалов, медицина пәнлириниң доктори Марат Асимов, филология пәнлириниң намзатлири Руслан Арзиев, Һакимҗан Һәмраев, психология пәнлириниң намзити Асийәм Сейитова, язғучи Авут Мәсимов, “Metall Prom Group” ширкитиниң президенти Долқунтай Абдухелил, “Экопарк Тур” ширкитиниң президенти Бәхтияр Абдулминов, Алмута “Транссервис” йолувчилар вә жүк тошуш автопаркиниң мудири Санийәм Бавдинова, тиҗарәтчи Муһидин Җалалов, Уйғур наһийәси Кичик Дехан йезиси Ақсақаллар кеңишиниң рәиси Скалин Җамалов, “Ғоҗамбәрдиев” дехан егилигиниң рәһбири, Пәнҗим йезисиниң баш жигитбеши, Панфилов наһийәлик мәслиһәтниң депутати Адилҗан Ғоҗамбәрдиев әйнә шулар җүмлисидиндур. Җәмләп ейтсақ, Президентимиз Нурсултан Назарбаевниң жирақни көзләйдиған дана миллий сәясити түпәйли, Шаһимәрдан Үсәйин оғли Мәктүпни муһакимә қилиш давамида алаһидә тәкитләп өткинидәк, елимиздә яшаватқан барлиқ милләтләргә, һәқиқәтәнму өз мәдәнийитини, тилини, урпи-адәтлирини тәрәққий әткүзүшкә кәң йол ечилған. Демәк, яритиливатқан мүмкинчилик-ләрдин тоғра пайдилинип, ана тилимизни көзүмизниң қаричуғидәк сақлап, кәлгүси әвлатқа аман-есән, беҗирим тапшуруш муһим. Хулләс, җумһурийәтлик Уйғур этномәдәнийәт мәркизи бу тарихий әһмийити зор Президент Мәктүбини биринчиләрдин болуп муһакимә қилди. Бу тарихий һөҗҗәтниң әһмийитини жиғин қатнашқучилириниң җамаәтчиликкә дурус йәткүзидиғанлиғиға ишәнчимиз камил. Ортақ өйүмиздә – көпмилләтлик мустәқил Қазақ елидә һәм течлиқ, һәм бирлик болсун!

175 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

03 Наурыз, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы