• Әхбаратлар еқими
• 11 Қазан, 2018

Тапшурмилар орунланса, нәтиҗигә йетимиз

Дөләт рәһбириниң бу қетимқи Мәктүбидә тәкитләнгәндәк, йезилардики мәдәнийәт очақлириниң паалийитини җанландуруш – биз үчүн интайин муһим. Шуниң билән биллә Мәктүптә муәллимләрниң мәртивисигә мунасивәтлик қанун қобул қилинидиғанлиғи ениқ ейтилди. Демисиму, җәмийәттә муәллимләрниң һоқуқини, мәртивисини һимайә қилидиған қанун аллиқачан керәк еди. Шуңлашқа Дөләт рәһбири муәллимләрниң мәртивисигә алаһидә әһмийәт берип, мәхсус қанун қобул қилишни тапшурди. Бу муәллимләрнила әмәс, билим бериш саһасиниң тирикчилик-нәпәсигә бепәрва қарап туралмайдиғанларниң һәммисини тәвритивәтти. Сәвәви, устаз абройини төвәнләткән җәмийәтниң узаққа бармайдиғанлиғи пат-пат ейтиливатсиму, униңға етивар қилғанлар болмиған еди. “Бир һәрип үгәткән адәмгә қириқ жил салам бәр” дегән хәлиқ екәнлигимизни унтушқа башливедуқ. Әнди шу бошлуқниң орни толидиған пәйт кәлгәндәк. 2019-жили “Педагогларниң мәртивиси” тоғрилиқ қанун қобул қилинидиған болди. “У қанун муәллимләрни вә мәктәп йешиғичә болған тәшкилатлар хадимлири үчүн барлиқ рәғбәтләрни көздә тутидиған механизмларни қараштуруш керәк. Жүклимини қисқартип, вәзиписидин сирт тәкшүрүшләрдин бошитиш керәк. Тиңшаңлар, муәллимләргә бүгүнки күндә һәммә нәрсә жүклинивериду. Сайламни өткүзидиған – муәллимләр, тәрғибат-тәшвиқатни жүргүзидиған – муәллимләр, бир ишни әмәлгә ашуруш керәк болса – муәллимләр... Униң үчүн һечким уларға мааш төләватқини йоқ. Уларни бу жүклимидин бошитиш керәк. Улар дәрискә тәйярлинип, һаҗәт вақтида ишлиши керәк. Тохталсиз тәкшүрүшләрму түгимәйду. Мана, қанун әйнә шуни тохтитиш үчүн керәк”, деди Нурсултан Назарбаев өз Мәктүбидә. Җәмләп ейтсақ, Дөләт рәһбири тәрипидин берилгән ениқ тапшурмилар әмәлиятта орунланса, чоқум нәтиҗигә йетимиз. Руқийәм ИСРАЙИЛОВА, Кичик Ақсу оттура мәктивиниң уйғур тили вә әдәбияти пәнлириниң муәллими. Уйғур наһийәси.