• Әхбаратлар еқими
• 11 Қазан, 2018

“Уйғур авазиға” йезилайли һәм уни пәрзәнтлиримизгә оқутайли

Шәмшидин АЮПОВ, “Уйғур авази” Дүшәнбә күни Алмута шәһири Султанқорған мәһәллисидики “Шығыс – Қорған” җәмийәтлик бирләшмисиниң мәҗлисләр залида Түрксиб наһийәлик Ханим-қизлар кеңишиниң рәиси Нурбүви Пазилованиң уюштуруши билән кәңәйтилгән жиғин болуп өтти. Түрксиб вә Жетису наһийәлик ханим-қизлар кеңәшлириниң әзалири баш қошқан жиғинда асасән 2019-жилға ана тилимизда чиқидиған нәширләр “Уйғур авази” вә “Азия бүгүн” гезитлири билән “Интизар”, “Әхбарат” журналлириға муштири топлаш һәм октябрь ейиниң ахирида “Ата-анилар күнини” өткүзүш охшаш мәсилиләр қаралди. Жиғинда дәсләп сөз алған “Интизар” журналиниң баш муһәррири, шаир Абдуғопур Қутлуқов уйғур жутлириниң бири Султанқорған мәһәллисидә ана тилимизда нәшир қилиниватқан гезит-журналлиримизға, җүмлидин миллий нәшир-әпкарлиримизниң карванбеши – җумһурийәтлик җәмийәтлик-сәясий “Уйғур авази” гезитиға бир кишидәк муштири болушни көңүлдикидәк елип бериш һаҗәтлигини, буниң үчүн жут-җамаәтчилик, паалийәтчан ханим-қизлар, җамаәтчилик активистлири бирләшкән һалда җиддий һәрикәт қилиши лазимлиғини тәкитлиди. Натиқ шундақла “Уйғур авази” гезитиға пәқәт йезилипла қоймай, уни, биринчи новәттә, аниларниң өзлири оқуши билән биллә пәрзәнтлиригиму оқутушиниң зөрүрлүгини ейтти. Шуниңдин кейин “Азия бүгүн” гезитиниң баш муһәррири, шаирә Ташгүл Һезиярова, “Шығыс – Қорған” җәмийәтлик бирләшмисиниң рәиси Мәһәмәтҗан Хакиев, “Әхбарат” журналиниң хадими Наиләм Һәмраева, Промкомбинат мәһәллиси Ханим-қизлар кеңишиниң рәиси Санийәм Бавдинова, Йеңи һаят мәһәллиси Ханим-қизлар кеңишиниң рәиси Халима Һәмраева вә башқилар сөзгә чиқти. Улар миллий нәширлиримизгә муштири топлаш ишини җиддий қолға елишниң лазимлиғиға алаһидә тохтилип өтти. Баш қошуш давамида уйғурлар зич истиқамәт қиливатқан Султанқорған мәһәллисидә аһалиниң бесим көпчилиги “Уйғур авази” гезитиға муштири болмайватқанлиғи ечинишлиқ билән тилға елинди. Демисиму, пәқәт Султанқорған мәһәллисидә алтә миңға йеқин уйғур аилисиниң яшайдиғанлиғини инавәткә алсақ, өткән жили икки наһийәдә бари-йоқи 1500 аилиниң гезитимизға муштири болғанлиғи, әлвәттә, ечинарлиқ әһвал. Мәзкүр баш қошушқа қатнашқан “Уйғур авази” гезитиниң баш муһәррири Ершат Әсмәтов ханим-қизларниң келәр жили үчүн гезитимизға муштири топлашқа һәр жилдиқидәк йеқиндин ярдәм беридиғанлиғиға ишәнчә билдүрди вә бийилқи жилға муштири топлашқа актив иштрак қилған жиғин иштракчилириға миннәтдарлиғини изһар қилди. Баш муһәррир шундақла хәлқимизниң иҗтимаий һаятида орун еливатқан бәзи илләтләрниң алдини елиш һәммимиз үчүн муһим мәсилә екәнлигини тәкитлиди. Жиғин ахирида Нурбүви Пазилова ханим-қизларниң муштири топлаш ишиға бийилму паал иштрак қилидиғанлиғини тәкитләп, мундақ деди: Ана тилимизда чиқиватқан гезит-журналлиримизға муштири топлаш – һәммимизниң ортақ иши. Уни муваппәқийәтлик тамамлаш үчүн һәрбиримиз күч салайли. “Уйғур авази” гезити муштирилириниң санини Түрксиб вә Жетису наһийәси бойичә 3000ға йәткүзүшкә тиришайли, Анилар! Өзара мәнпийәтдарлиқ шараитида өткән баш қошушта униңға қатнашқучилар җай-җайлардики муштириларни қизиқтуруватқан бәзи соалларға редакция рәһбәрлиги тәрипидин ениқ җавапларни алди.