• Спорт
• 17 Қазан, 2018

Йезида спорт комплекси ечилди

«Регионлуқ дәриҗидә резервларни тепип, аммивий спорт вә тәнтәрбийидин пайдилинишни ашуруш зөрүр. Һөкүмәткә вә һакимларға кам дегәндә 100 чиниқтуруш- сағламлаштуруш комплексини селишни тапшуримән. Шундақла пайдилиниватқан, болупму мәктәпләрдики спорт иншаәтлирини үнүмлүк пайдилинип, тәнтәрбийә билән шуғуллиниш үчүн һойлиларни, истираһәт бағлирини, скверларни җабдуқлаш керәк». Дөләт рәһбири Н.Ә.Назарбаевниң «Қазақстанлиқларниң паравәнлигиниң өсүши: тапавәтниң вә турмуш сүпитиниң яхшилиниши» Мәктүбидин. Рашидәм РӘҺМАНОВА, «Уйғур авази» Йеқинда Әмгәкчиқазақ наһийәсиниң Амангелди йезисида спорт мухлислири тақәтсизлик билән күткән спорт комплекси ечилди. Спорт комплексиниң ечилиш мәрасимида Әмгәкчиқазақ наһийәлик тәнтәрбийә вә спорт бөлүминиң башлиғи Ерболат Сарабаев, Саймасай йеза округиниң һакими Мухамедали Мейрамқулов, Әмгәкчиқазақ наһийәлик Уйғур этномәдәнийәт мәркизиниң рәиси Сулайман Мәхсүтов, наһийәлик Ханим-қизлар кеңишиниң рәиси Нурбүви Насирова, Амангелди йезисиниң жигитбеши Давутҗан Бурһанов, Қазақстан Җумһурийитиниң хизмәт көрсәткән мәшиқләндүргүчилири Александр Ли билән Дилшат Илахунов спорт җанкөйәрлирини сәмимий тәбрикләп, яш палванларға утуқлар тилиди. Новәттики натиқ ҚҖниң хизмәт көрсәткән мәшиқләндүргүчиси, хәлиқара спорт маһири, “FREE SPARRІNG” федерациясиниң президенти Һемит Тохтасун федерация тарихиға тохтилип, һәқиқий палванларниң йезидин чиқидиғанлиғиға, Амангелдидинму онлиған спорт маһирлириниң йетилидиғанлиғиға ишинидиғанлиғини изһар қилди. – 2009-жили Амангелдиға көчүп кәлдим. Байқисам, йезида йә Мәдәнийәт өйи, йә клуб йоқкән. Яшларниң келәчигини ойлидим. Йезидики барлиқ мәдәний чарә-тәдбирләр Садир намидики мәктәптә өтидекән. Уларға пүтүн йеза дегидәк жиғилидекән. Бу йеқидин интайин рази болдум. Чүнки өмлүк бар йәрдә һәммә нәрсә болидиғу! Жутдашлиримға бир яхшилиқ қилғум кәлди. Дадам Зерахун тәнтәрбийә билән шуғулланғанни бәк яқтуриду. Спорт комплексини селишқа мошундақ нәрсиләр сәвәпкар болди, – дәйду Рустәм Молотов. Мәшиқләндүргүчи Мәһәммәтҗан Қурбановниң ейтишичә, спорт комплексида һазир 70тин ошуқ бала күрәшниң һәрхил түри билән шуғуллиниветипту. Улар комплексниң коммуналлиқ төләмлирини өтәш үчүн һәқ төләйдекән. Бу анчә көп пул әмәс охшайду. Қалған чиқимниң барлиғини Рустәм Зерахун оғли өз зиммисигә апту. Спорт комплексида бу күни кәч киргичә оюн қизиди. Ғалип чиққан балилар мәхсус мукапатларға сазавәр болса, уларниң ата-анилири пәрзәнтлириниң утуқлирини көрүп, беши көккә йәтти. Чоң-кичикниң барлиғи Молотовлар аилисигә апирин ейтип, тарқашти. СҮРӘТТӘ: Һ.Тохтасун Р.Молотовқа миннәтдарлиқ билдүрүватиду. Әмгәкчиқазақ наһийәси.