• Әхбаратлар еқими
  • 17 Қазан, 2018

Қазақстан-Финляндия мунасивәтлириниң йеңи басқучи башланди

Қазақстан Президенти Нурсултан Назарбаев Финляндиягә қилған рәсмий сәпириниң дәсләпки күни мәмликәтниң тиҗарәт вәкиллири билән учрашти. Дөләт рәһбири дәсләп Nokia Corporation компанияси мудирлар кеңишиниң рәиси Ристо Сииласмаа билән учрашти. Президент Nokia бренди дунияға телекоммуникация саһасидики утуқлири билән яхши тонуш екәнлигини тәкитләп, Қазақстанда бу компания ишәшлик шерик сүпитидә тонулғанлиғини ейтти. – Nokia компанияси 2007-жилдин башлап бизниң дөләт билән һәмкарлиқ орнатти. Бүгүн компанияниң товар айлиними 20 миллиард АҚШ доллириға йәтти, – деди Қазақстан Президенти. Нурсултан Назарбаев компания рәһбиригә Қазақстанниң санаәт җәрияниға автоматлаштуруш, роботландуруш вә сүнъий әқил услублирини киргүзүш арқилиқ әмгәк нәтиҗидарлиғини ашуруш вәзиписини қоюватқанлиғини ейтип “Рәқәмлик Қазақстан” дөләт программисини әмәлгә ашуруш мәсилилиригә алаһидә тохталди. Ристо Сииласмаа Нурсултан Назарбаевқа учришиш имканийитини яратқанлиғи үчүн тәшәккүр изһар қилип, қазақстанлиқ компанияләр билән һәмкарлиқ орнитишқа мәнпийәтдарлиғини тәкитлиди. – Сиз дунияда наһайити тонулған вә дөләт рәһбәрлири арисида технологияләр тәрәққиятиниң әһмийитини чүшинидиған әрбап. Сизниң рәқәмлик технологияләргә алаһидә әһмийәт бериватқанлиғиңизни яхши билимән, – деди Ристо Сииласмаа. Учришиш ахирида тәрәпләр алақиниң йеңи технологиялирини, шуниң ичидә ихтисат саһалирини рәқәмләндүрүш вә инновациялик экосистемини тәрәққий әткүзүш бойичә лайиһиләрни әмәлгә ашуруш җәриянида 5G стандартлирини киргүзүш мәсилилирини муһакимә қилди. Қазақстан Җумһурийитиниң Президенти Финляндияниң тиҗарәт вәкиллири билән учришиши давамида Финляндия Җумһурийити Қазақстанниң сода-ихтисадий саһасидики муһим шериклириниң бири екәнлигини тәкитләп, икки дөләт арисидики мунасивәтләрниң достлуқ вә өзара ишәнчигә асасланғанлиғини ейтти. – Мустәқиллик жиллири Финляндия Қазақстанға 300 миллион АҚШ доллиридин ошуқ инвестиция салди. Қазақстанда фин капиталиниң қатнишиши билән түрлүк саһаларда 100гә йеқин санаәт орни тиркәлгән, – деди Дөләт рәһбири. Нурсултан Назарбаев Қазақстан нәтиҗидарлиқ тиҗарәт қилиш үчүн йеңи имканийәтләргә йол ечиватқанлиғини ейтип, бу учришиш мәхситиниң ихтисадий мунасивәтләрни җанландуруштин вә йеңи шерикләрни издәштин ибарәт екәнлигини тәкитлиди. – Инвесторлар вә тиҗарәт вәкиллири билән өзара нәтиҗидар һәрикәт қилиш мәхситидә “Қазақ Инвест” вә “Қазақ Экспорт” миллий компаниялири қурулди. Президент йенида Чәт әл инвесторлириниң кеңиши ишләватиду. Металлургия, нефтьни қайта ишләш, машина ясаш, химия, озуқ-түлүк йетиштүрүш охшаш йөнилишләрдики инвестициялик лайиһиләрни әмәлгә ашуруш җәриянида корпоративлиқ, йәр вә мүлүк селиқлиридин бошитиш қараштурулған, йәрни пайдилинишқа лицензия елиш вә шәртнамиләр түзүш тәртиви йеникләштүрүлди. Шундақла чәт әлләрдин ишчи күчини җәлип қилиш иши квотисиз вә рухсәт елиш рәсмийитисиз жүргүзүлиду, – деди Қазақстан Президенти. Дөләт рәһбири учришишқа қатнишиватқан тиҗарәтчиләргә Қазақстанда жүргүзүлүватқан кәңдаирилик хусусийлаштуруш тоғрилиқ ейтип, бу җәриянға чәт әлләрдин, шуниң ичидә фин инвесторлиридин еһтияҗ бар екәнлигини тәкитлиди. – Биз Финляндия-Хитай йөнилиши бойичә Қазақстан территориясидин өтидиған йеңи төмүр йол ачтуқ. Әнди мошу йөнилиш бойичә вә әкси йөнилиштә әвәтилидиған контейнерлиқ жүк тошуш вақти деңиз йолиға қариғанда төрт һәссә қисқирайду, – деди Президент. Қазақстан Президенти йеза егилиги мәһсулатлирини чиқарғучиларни дөләт тәрипидин қоллап-қувәтләш мәсилилиригә тохтилип, фин компаниялирини агросанаәт комплексидики лайиһиләрни әмәлгә ашурушқа паал қатнишишқа чақирди. – Қазақстан ихтисатни тез арида йеңилашқа, йеңи технология вә инновацияни киргүзүшкә йол ачти. “Рәқәмлик Қазақстан” мәхсус дөләт программиси әмәлгә ашурулмақта. Фин компаниялириниң мошу саһадики тәҗрибиси бизниң һәмкарлиғимизға йеңи йол ачиду, – деди Нурсултан Назарбаев. Шуниң билән биллә Дөләт рәһбири “Астана” хәлиқара малийә мәркизиниң вә шуниң йенида ечилған алий технологиялик биржиниң алаһидиликлири тоғрилиқ ейтип, мошу лайиһини әмәлгә ашурушқа Шанхай фонд биржиси вә NASDAQ Америка биржисиниң қатнашқанлиғини тәкитлиди. Учришиш ахирида Нурсултан Назарбаев фин тиҗарәтчилириниң икки дөләт арисидики тиҗарәтни тәрәққий әткүзүш вә өзара нәтиҗидар һәмкарлиқни күчәйтиш үчүн Қазақстандики барлиқ имканийәтләрни пайдилинидиғанлиғиға ишәнчә билдүрди.

198 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы