• Әхбаратлар еқими
• 24 Қазан, 2018

Тиҗарәтчиләргә ғәмхорлуқ қилиду

Рашидәм РӘҺМАНОВА, «Уйғур авази» Мәлумки, елимиздә ҚҖ Дөләт хизмити вә уюшқан җинайәтчиликкә қарши агентлиғи тәрипидин «Protectіng Busіness and Іnvestments» лайиһиси әмәлгә ашурулуватиду. Униң мәхсити – тиҗарәтчиликни дөләт хизмити хадимлириниң қанунға қарши һәрикәтлиридин қоғдаш, җәмийәттики уюшқан җинайәтчиликни вә бюрократиялик һадисиләрни азайтиш болуп һесаплиниду. Мошу йосунда Алмута вилайитидә инвесторлар билән 15 келишим-шәрт имзаланди. Уларниң ичидә Түркия, Иран, Япония, ХХҖ, Нидерландия, Германия, Россия, Корея, Әрәп Әмирлиги әллириниң инвесторлири бар. Йеқинда Агентлиқниң Алмута вилайәтлик Дөләт хизмити вә уюшқан җинайәтчиликкә қарши департаментиниң рәһбири Серикбай Нурғисаев Әмгәкчиқазақ наһийәсидә болуп, «Жетісу соя» (соя мейини ишләп чиқарғучи завод), «Феникс фрутс» (йәл-йемиш ширнилирини ишләпчиқириш) вә «КЗА Констракшн» (күн шолиси электростанциялирини ясиғучи) җавапкәрлиги чәкләнгән йолдашлиқлири билән шәртнамә түзди. Шундақла департамент рәһбири наһийә һакиминиң биринчи орунбасари Нуржан Қудайбергенов вә наһийәлик тиҗарәтчилик бөлүминиң башлиғи Нурболат Сергалиниң һәмра болушида Көктөбә йеза округиға җайлашқан «Алимжанов» дехан егилигидә вә Түргүн йеза округидики «Голд продукт» акционерлик җәмийитиниң шарап заводида болуп, уларниң иш-паалийити билән тонушти. «Алимжанов» егилигиниң рәһбири Тлек Алимжановниң тәкитлишичә, бирнәччә жил бурун «Даму» программисиниң ярдими билән, йәни төвән пайизлиқ несийәгә егә болушниң нәтиҗисидә егиликниң техникилиқ парки йеңиланған. Америкилиқ «Таурус сервис» ширкити билән бирликтә иш елип бериш нәтиҗисидә жилиға бир сийирдин 5 000 литрғичә сүт сеғишқа қол йәткүзгән. Егилик елинған сүтни «Данон» ширкитигә сатиду. «Алимжанов» егилигидә компьютерлиқ вә механикилиқ сеғин заллири, икки үч тоннилиқ сүт музлатқучлири бар. «Голд продукт» ширкитиниң технологи Вера Гончарова меһманларни «Тургень» шарап заводи, униң утуқлири вә реҗилири билән тонуштурди. Ширкәтниң тәркивигә «Тургень» ишләпчиқириш комплекси вә Челәк шарап заводи кириду. Үзүм вә башқиму йәл-йемишни «ЭкоАгроПродукт» ҖЧЙ вә үзүм өстүргүчи егиликләрдин сетивалиду. Шарапниң 100дин ошуқ түрини, ширнә, компот вә башқиму мәһсулат ишләп чиқириду. «Тургень» бир мәвсүмдә 9 000 тонна үзүмни қайта ишләш қувитигә егә. Челәк заводи 2 000 тонна үзүмни қайта ишләйду, 5,5 миллион литр шарап үчүн керәк хам әшияни сақлайдиған қоймилири бар. Дөләтниң үзүм өстүрүш вә шарап ишләпчиқириш йөнилишидики мәхсус программа бойичә «Голд продукт» АҖ кейинки жиллири үзүмзарлиқларни қайта тикләш ишлири биләнму шуғуллиниватиду. Серикбай Нурғисаев өз новитидә Агентлиқниң хизмити һәққидә чүшәнчә бәрди. Алмута вилайәтлик Дөләт хизмити вә уюшқан җинайәтчиликкә қарши департаменти наһийәдә тиҗарәтчиләр билән қоюқ паалийәт елип баридиған дөләт хизмәтчилиридин тәркип тапқан топ қуруп, униң вәзипилирини тонуштурди. Әмгәкчиқазақ наһийәси.