• Әхбаратлар еқими
  • 31 Қазан, 2018

Мәҗлис депутати Уйғур наһийәсидә болди

Сабирәм ӘНВӘРОВА, «Уйғур авази» Қазақстан Җумһурийити Парламенти Мәҗлисиниң депутати, җумһурийәтлик Уйғур этномәдәнийәт мәркизиниң рәиси Шаһимәрдан Нурумов Уйғур наһийәсидики бирқатар жутларда болуп, турғунлар билән учрашти. Учришиш Ширин йезисидин башланди. Униңға «Нұр Отан» партияси Уйғур наһийәлик шөбисиниң биринчи орунбасари Мәулен Нуров, наһийәлик ички сәясәт бөлүминиң башлиғи Гүлҗаһан Әликеева, Баһар йезилиқ округиниң һакими Қадиржан Бағбаев қатнашти. Шаһимәрдан Үсәйин оғли Дөләт рәһбириниң бу қетимқи Мәктүбиниң алаһидә әһмийәткә егә екәнлигини тилға алди. Чүнки Президент қазақстанлиқларниң турмушини яхшилаш үчүн һәр саһаға алайтән тохтилип, наһайити муһим мәсилиләрни оттуриға қойди. — Бәш Францияниң мәйданини өз ичигә алидиған елимиздә 18 миллион аһали яшайду. Бепаян қазақ даласиниң үстиму, астиму толған байлиқ. Мошундақ әлдә яшаватқан қазақстанлиқларни мән әң бәхитлик дәп һесаплаймән, – деди депутат. – Шундақла мәзкүр Мәктүптә келәр жили «Яшлар жили» дәп елан қилинидиған болди. Демәк, 2019-жили яшлиримиз үчүн мол мүмкинчиликләр яритилиду. Президентниң тәшәббуси билән қобул қилинидиған «Педагог мәртивиси тоғрилиқ» намлиқ қанун күчигә кирсә, муәллимләрниң мәсъулийити йениклишидиған болиду. Йеңи мәктәпләр селинип, 3 сменилиқ мәктәпләр мәсилиси оңушлуқ йешилиш алдида туриду. Шуниңдин кейин Мәҗлис депутати турғунларни тиңшиди. Ширин оттура мәктивиниң мудири Селимәм Һапизова китап-дәптәр мәсилисиниң иҗабий йешилгәнлигини ейтип, йезида Интернет системисиниң “асқаватқанлиғини” йәткүзди. Жут мөтивәри Һаширахун Мәрүпов йолларни җөндәш, заман тәливигә лайиқ балилар бағчисини селиш мәсилисини көтәрди. Шундақла натиқниң ейтишичә, Ширин оттура мәктиви қириқ жилдин буян мурәккәп җөндәштин өтмәпту. Бу мәсилигә Мәулен Нуров җавап бәрди. Униң ейтишичә, бүгүнки күндә наһийәдики 33 билим дәргаһиниң 25игә мурәккәп җөндәш ишлири жүргүзүлүпту. Ширин оттура мәктиви әндиликтә новәттә турған 8 мәктәпниң қатарида бар екән. Шундақла йол мәсилисиму күн тәртивидин чүшкини йоқ. Учришиштин кейин Шаһимәрдан Нурумов “Ширин” совхозиниң һулини салған, әмгәк ветерани Надир Қадировни йоқлап, униң һал-әһвалидин хәвәр тапти. Баһар йезисида өткән мошундақ учришишта А.Розибақиев намидики оттура мәктәпниң мудири Суджата Имиршаева, жигитбеши Сраждин Камазаев, устаз Алийәм Низамова, Ақсақаллар кеңишиниң рәиси Қорғас Жулаев депутатқа өзлирини көптин бери ойландуруп жүргән соаллири билән мураҗиәт қилди. Депутат чүштин кейин Чарин дөләтлик миллий тәбиий паркида болди. Дәсләп паркни зиярәт қилип, иш-паалийити билән тонушуп чиқти. Чарин дөләтлик миллий тәбиий паркиниң хадимлири билән болған учришишта Шаһимәрдан Үсәйин оғли туризм һәққидә әтраплиқ тохталди. Президентниң Мәктүбидә ички туризмни риваҗландурушқа көңүл бөлүнгәнлигини тәкитләп, җавапкәрчилиги мол хизмәтниң һөддисидин чиқип келиватқан парк хадимлирини техиму тиришип ишләшкә чақирди. Меһман янчуғимизға 5 тәңгә артуқ чүшсә, чәт әлгә берип дәм елишни ойлайдиғанлиғимизни әпсуслиниш билән тилға елип, әмәлиятта өз елимиздиму әҗайип гөзәл җайларниң нурғун екәнлигини мисалға кәлтүрүп, наһийәмизниң көрсә көзниң йеғини йәйдиған тәбиитини, һаваси таза, йешил кимхап тағлиримизни, йәттә қәвәт йәрниң астидин чиққан шипалиқ аришаң сулиримизни, дунияда пәқәт икки әлдила моҗут Чарин каньонимизни, ерәнзарлиғимизни атап ейтти. Мошундақ байлиқни алиқинида сақлап, көзиниң қаричуғидәк қоғдап келиватқан Чарин дөләтлик миллий тәбиий паркиниң коллективиға миннәтдарлиғини йәткүзүп, алдики ишлириға зор утуқ тилиди. Чарин дөләтлик миллий тәбиий паркиниң мудири Елнур Ахметов өз коллективниң 60 пайизи яшлар екәнлигини қәйт қилип, кәспигә иштияқ бағлап ишләп келиватқан хадимлириниң «салимини» депутатқа йәткүзүшни унтумиди. У болсиму, хадимларниң айлиқ маашиниң төвәнлиги еди. Өз новитидә депутат ейтилған барлиқ пикир-тәклипләрниң иҗабий һәл қилиниши үчүн тегишлик органлар билән һәмкарлиқта иш елип беридиғанлиғини алаһидә қәйт қилди.

143 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

03 Наурыз, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы