• «Уйғур авазиниң» сәйилгаһи
• 08 Қараша, 2018

Кийиниш адәтлири

Уйғурларниң кийиниш адәтлири күчлүк миллийликкә һәм хаслиққа егә. У кийим-кечәк түрлири билән кийиништики эстетик мәзмун вә шәкил гөзәллигиниң бирикишидин пәйда болған есил адәттур. Җинсий пәриқлиқ кийим түрлирини кийиш. Әрләр гүлсиз, сидам рәхтләрдин тикилгән кийим кийиду. Ханим-қизлар йешиға қарап рәңлик, очуқ яки тоқ рәңдики гүллүк рәхтләрдин кийиниду. Умумән, әр-аялларниң кийимлири бир-биридин рошән пәриқлиниду. Баш кийим арқилиқ өзини улуқлаш етиқатини ипадиләш. Әрләр бешиға қалпақ, тәлпәк, допа кийиду. Аялларға болса рәңлик допа, гүл допа, зәр допа вә гүллүк яғлиқ тәәллуқ. Аҗизлар шундақла ромалларни артип, өзлириниң қиз яки аял екәнлигини ипадиләйду һәм улуқлайду. Баш кийимни, адәттә, башқа соғ яки аптап өтмәслиги, чачқа чаң-тозаңниң қонмаслиғи үчүн кийиду. Кийим кийиш арқилиқ һаялиқ болуш. Әрләр учисиға узун тон, пальто, костюмларни, аяллар көксини, касасини, йотисини йепип туридиған көйнәк, пальто, юбкиларни кийиш арқилиқ һаялиғини сақлап жүриду. Жуң рәхтләрдин кийим кийиш. Чәрчән, Хотән, Турпан өлкилиридики қедимий қәбирстанлиқлардин тепилған жуңдин тоқулған кийим-кечәкләр бу кийиниш әнъәнисиниң хәлқимиздә хелә узун тарихқа егә екәнлигини испатлайду. Терә, хром аяқ кийим кийиш – салапәтлик аламити. Уйғурлар әзәлдин «Дост башқа қарайду, дүшмән – путқа» дегән мақалға әмәл қилип кәлгән. Шуңлашқиму имканийити барлар терә, хром өтүкләрни кийип, өзлирини әтивалиқ, салапәтлик көрситишкә тиришқан.