• Әхбаратлар еқими
• 08 Қараша, 2018

“Бизниң Бәхитҗан бәхитлик”

Һәр күни дегидәк көрүп жүргән Бәхитҗанниң авған урушиға қатнашқанлиғи тоғрилиқ хәвирим йоқ екән. Бу һәққидә мән башқилардин аңлидим. Шуниң раст-ялғинини билиш мәхситидә уни издәп өйигә бардим. У аилиси билән кәчки ғиза ичип олтарған екән. Мени көрүп, дәрру орнидин турдидә, салам берип, җозиға тәклип қилди. Течлиқ-аманлиқ сорашқандин кейин кәлгән мәхситимни ейтиведим, күлүмсиригән һалда маңа мундақ деди: – Ака, кәлгиниңиз яхши бопту. Авған урушида болғиним раст. Амма у күнләр кәйнимиздә қалди. Унтулупму кәтти... – Уғу шундақ, амма бу һәққидә башқиларниң аңлап қалғини тоғримекин, – дедим униңға. Бәхитҗан Әршидинов 1968-жили 9-майда Әмгәкчиқазақ наһийәсиниң Ават йезисида туғулуп, шу йәрдики мәктәптә билим алиду. 1986-жили һәрбий сәпкә чақиртилиду. У Москваниң Подольский шәһиридики инженер-сапер йол-қурулуш батальонида хизмәт қилиду. Алтә айдин кейин туюқсиз буйруқ чиқип, җәңгивар достлири билән уни Авғанстанниң Чарикар шәһиригә елип келиду. У йәрдә уруш раса овҗ еливататти. Бир күни Бәхитҗанға БТР билән оқ-дорини вә җәңчиләрни тегишлик җайға йәткүзүш жүклиниду. У бу вәзипиниң һөддисидин чиқалиди. – Әҗәл билән йәкму-йәк жүргән пәйтлиримдә, дадам Шерипҗан билән анам Ташбүвиниң маңа язған хәтлири мәдәт берәтти, – дәп өткән күнләрни әскә алди Бәхитҗан. – Арминим кечә-күндүз уйқа көрмәй, ғәм-қайғуда жүргән ата-анамниң қучиғиға сақ-саламәт йетиш еди. 1988-жили Бәхитҗан туғулуп өскән жути Аватқа аман-есән қайтип кәлди. “Бу сениң бәхтиң” дейишти уни бағриға басқан жутдашлири. “Җасарити үчүн”, “Авған хәлқиниң миннәтдарлиғи үчүн” медальлириниң саһиби Бәхитҗан Әршидинов һәқиқәтәнму бәхитлик. Өмүрлүк җүпти Зоһра иккиси икки оғул, икки қиз сөйүп, бәхитлик һаят кәчүрмәктә. Абдумеҗит ҺОСМАНОВ. Ават йезиси, Әмгәкчиқазақ наһийәси.