• Әбәдийләштүрүш
• 08 Қараша, 2018

Мемориал тахта орнитилди

Шөһрәт МӘСИМОВ, “Уйғур авази” Алмутида муз үстидә фигурилиқ тейилиш спортиниң атақлиқ маһири, 2014-жили Сочида өткән қишлиқ Олимпиада оюнлирида бронза медалиға сазавәр болған Денис Тен яшиған өйгә мемориал тахта орнитилди. Хатирә тахтини ечиш мәрасимиға атақлиқ спортчиниң уруқ-туққанлири, кәсипдашлири, Алмута турғунлири жиғилди. Денис Тен хатирисигә тазим қилиш үчүн Россиядин мәхсус атақлиқ кеңәш вә Россия мәшиқләндүргүчиси, спорт маһири Татьяна Тарасова кәлди. Көплигән дуния, Европа вә Олимпиада оюнлириниң чемпионлирини тәйярлиған атақлиқ мәшиқләндүргүчи Денисниң өз елини наһайити яхши көридиғанлиғи вә униңдин һеч яққа кәтмәйдиғанлиғи, спортчиниң таланти түпәйли нурғунлиған ишқивазларниң Қазақстанни тонуп-билгәнлиги тоғрилиқ тәврәнгән һалда сөзлиди. – Денис – исми ривайәткә айланған жигит. У пәқәт мошу мәмликәттила яшап, униң шәнини көтиришни халиди. Әпсуски, өз вәтинидә һаяти билән видалашти. Мән көплигән спортчилар билән ишлидим. Денис шагиртлиримниң алдинқи сепидә туратти. Денис һәқиқәтәнму яхшиларниң яхшиси еди. Униңға бир нәрсини икки қетим тәкрарлашниң һаҗити йоқ еди. Лос-Анджелеста бу балиниң қәйәрдин кәлгәнлигини билмигән еди. У бирдинла дәсләпки онлуққа, андин төртликкә кирди. Стадиондикиләр орунлиридин туруп, униң һүнири аяқлашқандин кейинму олтармиғанлиғи һелиму көз алдимда, – дәп әсләп өтти Татьяна Тарасова. Улуқ спортчини хатириләш үчүн нахшичи Роза Рымбаеваму кәлди. – Денис паклиқниң, вәтәнпәрвәрликниң, һәқиқий қәһриманлиқниң рәмзи. У бари-йоқи 25 яшта еди. Денис биз тәрбийилигән яшлиримизниң ярқин вәкили. Ата-аниси уни һәқиқәтәнму улуқ спортчи қилип йетилдүрди, – деди Роза Рымбаева. Мәрасимда Алмута шәһири һакиминиң орунбасари Арман Қырықбаев сөзгә чиқип, Денис Тен хатирисигә башқиму көплигән чарә-тәдбирләрниң өткүзүлидиғанлиғини ейтти. Униң тәкитлишичә, һазир Денис Тен ядикарлиғиниң эскизи ишлиниватиду. Ядикарлиқ келәр жили баһарда орнитилиду. – Денис өзини пәқәт муз үстидә фигурилиқ тейилиш спортиғила беғишлиған инсан әмәс. У байриғимиз көтирилгәндә, миллионлиған қазақстанлиқларни мәмликитимиз үчүн пәхирлинишкә мәҗбурлиған вәтәнпәрвәр инсан, – деди шәһәр һакиминиң орунбасари. Мемориал тахтини ечиш мәрасимида шундақла Россия Федерациясиниң Алмутидики баш консули Евгений Бобровму қатнашти. – Бизниң қазақстанлиқ достлар, россияликләр силәр билән биллә матәмдә. Биз Денисни умумий байлиғимиз дәп һесаплаймиз. Лос-Анджелеста кәсипдишимниң “Қариғинә, бизниң қазақстанлиқ спортчи қандақ маһарәт көрситиватиду?” дәп ейтқан пәхирлиниш сөзлири һелиму ядимда. Биз һәқиқәтәнму Денисни һәм қазақстанлиқ, һәм россиялик, һәм дуниявий дәриҗидики инсан дәп һесаплаймиз. Униң утуқ-муваппәқийәтлири муз үстидә фигурилиқ тейилиш спортиниң тарихиға мәңгү йезилиду, – деди дипломат тәврәнгән һалда. Амутида шундақла Денис Тен фондини тонуштуруш мәрасимиму болуп өтти. Фонд спортчиниң йеқин адәмлириниң тәшәббуси билән қурулди вә Денис Тен лайиһилирини әмәлгә ашурушни давамлаштуриду.