• Кичик вә оттура тиҗарәт
• 08 Қараша, 2018

Нами чиққан навайхана

Сабирәм ӘНВӘРОВА, «Уйғур авази» Мәлумки, Дөләт рәһбири Нурсултан Назарбаев «Төртинчи санаәт инқилави шараитидики тәрәққиятниң йеңи имканийәтлири» дәп аталған Мәктүбидә йәрлик мәһсулатларни хәлиқара базарға чиқиришниң стратегиялик йолини тепишни тапшурған. Президентимиз мәзкүр Мәктүбидә пүткүл аләмгә тонулидиған «Қазақстанда ясалған» тәбиий озуқ-түлүк брендини қелиплаштурушимиз керәклигини қәйт қилған еди. Хулләс, Милләт Лидериниң бу тапшурмисиға бенаән, елимиздә бирқатар башланмилар қолға елинди. Әлвәттә, «җүҗини күздә санаймиз». Ейтмаққа асан болғини билән «Қазақстанда ясалған» бренди үчүн бизгә бираз вақит керәк. Шундиму «Тама-тама көл болур» демәкчи, һәрбир утуқ кичик қәдәмдин башлиниду әмәсму. Шундақ екән, бүгүнки күндә елимиздә йеңидин ишқа қошулуватқан фабрика-заводларниң келәчигидин үмүтимиз зор. Җүмлидин Уйғур наһийәсидиму бу әснада йеңилиқлар көп. Ушбу мақалимизда «Қазақстанда ясалған» бренди билән тонулмисиму, бир йерим жилдин буян дияримизниң аришаң участкисини һәм Ғалҗат-Чонҗа чоң йолиниң бойиға җайлашқан бир түркүм йезиларни иссиқ нан билән тәминләп келиватқан «Жетісу» санаторийиниң тәркивидики навайхана һәққидә сөз қозғимақчимиз. Йеқинда мәзкүр навайханиниң паалийити билән йеқиндин тонушуш мәхситидә «Жетісу» санаторийиға қарап йол туттуқ. Жирақтинла нанниң һиди димақни ярди. Бизни нан пишириватқан навай аял хушхой қарши алди. Течлиқ-аманлиқ сорашқандин кейин, қизғин сөһбәткә чүшүп кәттуқ. Тонулған тиҗарәтчи Стақан Белғожаевниң буниңдин бир йерим жил бурун ишқа қошқан санаторийи билән биллә иш башлиған навайханисида бир навай, бир тазилиқ хизмәтчиси вә буйрутмини йәткүзгүчи болуп, җәми 3 адәм ишләйдекән. Шуларниң бири – бизни күтүвалған Гауһар Жуманқызы (сүрәттә). Униң ейтишичә, навайханидила әмәс, умумән, санаторийда хизмәт қилидиған ишчилириниң барлиғи дегидәк 100 миң тәңгә әтрапида мааш алидекән. Ишчилар үчүн мәзкүр дәм елиш орнида барлиқ шараит яритилған болуп, һәтта бәзиләр һәқсиз өй билән тәминлинипту. У ишқа орунлашқан күндин башлап, аилиси билән «Жетісу» санаторийиниң ятақханисиға көчүп кәпту. Мәктәп йешидики пәрзәнди бу йәрдин жирақ әмәс Шуңқар йезисидики оттура мәктәпкә қатнап оқуйдекән. Йолдишиму мошу санаторийда хизмәт қилиду. Шәһәрдики сиңлиси навайханида ишлигәчкә, нан пиширишниң қир-сиридин анчә-мунчә хәвири бар екән. Улар күнигә «Жетісудин» ташқири, Аришаң участкисиға орунлашқан барлиқ дәм елиш орунлирини вә әтраптики бирқатар йезиларни нан билән тәминләветипту. «Жетісу» санаторийиниң навайханисидики бир булка нанниң баһаси 70 тәңгә. Мәлумки, һазир дуканлардин уни тәхминән 90 тәңгидин сетивалимиз. Әрзән һәм тәми өзгичә. Тоғриғанда оттуриси угилип чүшүп қалидиған яки таштәк даңғирлап тезла қетип қалидиған булкиларға тамамән охшимайду. Токта пишсиму, худди тонур ненидәк, пуриғи димақни яриду. Гауһар Жуманқызы әтигәнлиги саат төрттин башлап ишқа киришидекән. Херидарларниң әтигәнлик чайға сетивалидиған ненини саат йәттә-сәккизләргичә үлгәртип пиширидекән. Навайхана жүргүзгүчиси болса, буйрутма бәргүчиләргә нанни өз вақтидин кечиктүрмәй йәткүзүп бериш һөддисидин бемалал чиқиветипту. Узун сөзниң қисқиси, биз навайхана һәққидә сөһбәтлишиватқан арилиқта, пәшкә селинған нанларму тәйяр болди. Йеңи пишқан, техи совуп үлгәрмигән нандин «бисмилла» дәп уштуп, еғиз тәгдуқ. Шу чағда көпчиликниң бу навайханини бекар махтимиғанлиғиға көзүмиз йәтти. Наһийәдә заман тәливигә лайиқ мошундақ бир иш орниниң ечилғанлиғиға мәмнун болдуқ. Стақан Белғожаевниң рәһбәрлигидики навайханиниң ишиға техиму зор утуқларни тиләп хошлаштуқ. Йошурушниң һаҗити йоқки, күндилик һаятта биз пайдилиниватқан буюмлар вә истимал қиливатқан озуқ-түлүкләрниң тәңдин-толиси чәт әлдин кәлтүрүлиду. Йәнә келип, өзимиз нурғунлиған хам әшияни сиртқа чиқиримиз. У яқтин кәлгән мәһсулатни өзимиз қиммитигә сетивалимиз. Чүнки елимиздә завод-фабрикиларниң сани анчә көп әмәс. Лекин һәммимиз бирликтә С.Белғожаевтәк мошу бошлуқниң орнини толтурушқа азду-тола һәссимизни қошсақ, келәчәктә чоқум «Қазақстанда ясалған» мәһсулатлар брендини қелиплаштуралаймиз.