• Әхбаратлар еқими
• 08 Қараша, 2018

«Хасийәтлик Қазақстан: Йәттисуниң хасийәтлик җайлири»

«Вәтәнпәрвәрликниң әң илғар үлгиси – туғулған йәрниң тарихини мәктәптә оқутуштин башлиса наһайити яхши болиду. Туғулған йәрниң һәрбир сейи вә идирлири, тағлири билән дәриялири тарихтин учур бериду. Һәрбир йәр нами тоғрилиқ талай ривайәтләр вә һекайиләр бар… Туғулған йәргә болған муһәббәт туғулған әлгә –Қазақстанға дегән вәтәнпәрвәрлик һис-туйғуға улишиду». (Н.Ә. Назарбаевниң «Келәчәккә нишан: мәнивий йеңилиниш» сәрләвһилик мақалисидин). Рашидәм РӘҺМАНОВА, «Уйғур авази» Дөләт рәһбири Н.Назарбаевниң «Келәчәккә нишан: мәнивий йеңилиниш» мақалисида җәмийәтлик аң-сезимни тәрәққий әткүзидиған алтә лайиһә қараштурулған. Шуларниң бири – «Қазақстанниң хасийәтлик йәрлириниң географияси» лайиһиси. Ушбу лайиһә даирисидә йеқинда Алмута вилайәтлик маарип башқармисиниң «Вилайәтлик маарипни тәрәққий әткүзүшниң оқуш-методологиялик мәркизиниң» уюштуруши билән Әмгәкчиқазақ наһийәсидә «Хасийәтлик Қазақстан: Йәттисуниң хасийәтлик җайлири» җумһурийәтлик форуми болуп өтти. Униңға «Рухани жаңғыру» лайиһисиниң регионлиқ кеңиши, алий оқуш орунлири, тарих-өлкитонуш мирасгаһлири, тәнтәрбийә, спорт, дәсләпки һәрбий тәйярлиқ вә қошумчә билим бериш илмий-тәҗрибә мәркизиниң вәкиллири вә Қазақстанниң җай-җайлиридин кәлгән устазлар қатнашти. Форум «Өз өлкәңни тонуп-билиш – мәнивий йеңилинишниң асаси» мавзусида уюштурулған көргәзмини зиярәт қилиштин башланди. Уни Алмута вилайәтлик маарипни тәрәққий әткүзүшниң оқуш-методологиялик мәркизиниң рәһбири Алуа Қабдулова ачти. Шуниңдин кейин вилайәтлик маарип башқармиси оттура билим, оқутушниң йеңи технологияси билән инновация бөлүминиң баш хадими Руслан Арсланов доклад оқуп, лайиһә даирисидә вилайәттә әмәлгә ашурулуватқан ишларға тохталди. Натиқниң тәкитлишичә, ноябрь ейида «Алматыкітап» нәшрияти тәрипидин 5 – 7-синип оқуғучилири үчүн «Өлкитонуш» китави йоруқ көрди. Бу пән мәктәп программисиға киргүзүп, пән тарих, география, қазақ әдәбияти, музыка дәрислири элементлирини өз ичигә алидиған болиду. Андин сөзгә чиққан И.Жансүгиров намидики Жетису дөләт университетиниң профессоры Еркин Тоқпанов Алмута вилайити хасийәтлик җайлириниң хәритисини қураштурушқа вә униң өлкилик туризмни тәрәққий әткүзүштики әһмийитигә тохталди. Умумән, форум давамидики пленарлиқ учришишлар билән секция ишлирида 50тин ошуқ доклад оқулуп, Қазақстанниң хасийәтлик йәрлириниң мәдәний-географиялик бәлбеғини қуруш вә елимизниң һәрбир граждиниға миллий биртуташлиқниң асаси бойичә сүпәтлик билим бериш, лайиһини әмәлгә ашуруш мәсилилири муһакимә қилинди. Форумниң иккинчи күни униң иштракчилири «Хасийәтлик җайлар» лайиһиси даирисидә «Алтын адам» мирасгаһини, Или-Алитағ миллий парки Түргән шөбисидики Түргүн чатқаллиқлирини зиярәт қилди. «Хасийәтлик Қазақстан: Йәттисуниң хасийәтлик җайлири» форумида униңға қатнашқан устазлар яш әвлатни вәтәнпәрвәрликкә тәрбийиләштики тәҗрибилири билән бөлүшти. Чарә-тәдбир давамида асасий шиарға айланған «Өз йериңни тонуп-бил» тәшәббуси билим бериш мәһкимилиридики мәктәп туризмини йеңилашқа асас болидиғанлиғи ениқ. Әмгәкчиқазақ наһийәси.