• Замандаш
  • 14 Қыркүйек, 2012

Таам һәр җайда, ләззәт бир җайда

Мәлумки, Алмутидәк чоң шәһәрдә тамақлиниш орунлири нурғун. Бәзидә уттур кәлгән ашхана-кафеларниң биридә ғизалинидиған пәйтләрму болиду. Бирақ уларниң һәммиси охшаш әмәс. Әҗдатлиримиз «Таам һәр җайда, ләззәт бир җайда», дәп бекар ейтмиған. Уларниң һәммисидә тамақлиниш мүмкин болғини билән, тәмлик таам тәйярлайдиған тамақлиниш орнини тапмақ қийин. Әгәр ундақ җай тепилип қалса, тез аридила униң даңқи җамаәтчилик арисиға пур кетиду һәм көпчиликниң һәр хил сәвәпләр билән баш қошидиған сөйүмлүк орниға айлиниду. Бүгүнки таңда шәһәрниң мәркизий қисмиға җайлашқан «Эва» ресторани әйнә шундақ һәммини өзигә җәлип қилидиған тамақлиниш орунлириниң бири екәнлиги талашсиз. Буниңда мәзкүр ресторанниң мудири Турсунай һәдә Иминованиң әмгәк-әҗриниң чоң екәнлигини тилға алмай мүмкин әмәс. Турсунай һәдиниң аниси Мәрийәмхан Ғулҗа шәһириниң Дөңмәлә мәһәллисидә даңлиқ ашпәз болған екән. Кейинирәк униң бу һүнирини оғли Имәрҗан өзләштүриду. Иминовлар аилиси тәғдир тәқәзиси билән қазақ дияриға көчүп чиққанда, пәрзәнтләрниң чоңи Имәрҗан Алмутида ресторан ечип, у йәргә сиңлиси Турсунайни шагирт сүпитидә ишқа орунлаштуриду. Алтә айдин кейин у мудир лавазимини егиләйду. Кейинирәк кәчки мәктәпни тамамлап, өйигә йеқин «Береке» ресторанида 24 жил мабайнида қәндәләт цехини башқуриду. Бүгүнки күндә болса, у уйғур җамаәтчилигила әмәс, бәлки шәһәр турғунлири яхши билидиған «Эва» рестораниниң мудири. Алмута шәһиридики тамақлиниш орунлирида паалийәт елип бериватқан бизниң миллитимиз вәкиллири аз әмәс. Шундақ болсиму, көпчилик уларниң арисидин пәқәт санақлиқлиринила йәни, җамәтчилик ишлириға арилишидиғанларни, җәмийәтлик тәшкилатларни маддий җәһәттин қоллап, һамийлиқ қилидиғанларни яхши тонуйду. Шуларниң бири Турсунай һәдә Иминова. Айрим яшлар илгири телевидениедә «Алитағ» уйғур тилидики көрситишләр программисиниң болғанлиғидин хәвәрсиз. Әйнә шу программидики «Тәбәссүм» һәзил-күлкә программисини биринчи болуп Турсунай һәдә маддий җәһәттин қоллап-қувәтлигән еди. Илгәрки «Ғунчә», һазирқи «Алтун ғунчә» балилар иҗадийити конкурс-фестивалиғиму 17 жил уда ярдәм қолини сунуватқан йәнә шу һәдимиз. Мошуниңдин бәш жил илгири Алмута шәһири Алмалы наһийәсиниң рәһбәрлиги наһийәдики тиҗарәтчиләрни жиғип, уруш вә әмгәк ветеранлирини ғәмхорлуққа елиш тәшәббусини көтәргәндә, униңға дәсләпкиләр қатарида Турсунай һәдә үн қошуп, һеликәм уларға ярдәм көрситип келиватиду. Көпчиликниң Алмутида тәшкил қилинған ханим-қизларниң «Җанан» кеңишидин хәвири бар. Униң әзалири һазир хәйрихаһлиқ паалийитини кәңәйтип, шәһәр биләнла чәкләнмәй, вилайәт наһийәлиригиму ярдәм қолини сунмақта. Әйнә шу «Җанан» кеңишиниң тизгини һазир Турсунай һәдиниң қолида. Турсунай һәдиниң миллий таамларни тәйярлаштики маһаритигә чәт әлликләрму жуқури баһа бәргән. Өткән жили күздә Талғир наһийәсидики «Ақ булақ» санаторийисидә ЕБҺТ вәкиллириниң баш қошушида, мошу чарә-тәдбирни өткүзүшкә җавапкәр тегишлик органлар уйғур таамлириниң көргәзмисини уюштурған еди. Шу чағда уйғурларниң дәстихинидики сәйләрниң хилму-хиллиғи, һәр хил таамлар билән нанларниң түрлири чәт әлликләрниң диққитини бирдин җәлип қилди. Шәхсән өзәм, бир чәт әлликниң «Бу тамақларни ким тәйярлиған?» дәп сориғанлиғини вә соалиға җавап алғандин кейин «Турсунайниң таамлириға «бәш», дәп ейтқиниға гувачи болған едим. Бүгүнки күндә Турсунай һәдиниң һүнирини оғуллири Долқун, Пәрһат вә Адил өзләштүрди. Турсунай һәдә: «15 нәврәм вә бир чәврәм бар. Улардинму бизниң ишимизни давам қилидиғанлар чиқсекән дәп арман қилимән», дәйду дайим өз кәспини давамлаштурғучиларниң турақлиқ болушини арман қилған һалда. Бу күнләрдә ашпәзләр сулалисиниң бешида турған Турсунай һәдә 70 яшлиғини нишанлимақта. Һәдимизни сәмимий тәбриклигәч, илаһим, арманлириңиз рояпқа чиққай — демәкчимиз.

Бәхтишат СОПИЕВ.   

   

716 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы