• Иҗадий кәч
• 22 Қараша, 2018

«Кәч күз аһаңлири»

Шәмшидин АЮПОВ, «Уйғур авази» Риясәтчиләр пешқәдәм устазни сәһнә төригә тәклип қилип, көпчиликни униң тәрҗимиһали вә иҗадий паалийити билән қисқичә тонуштурғандин кейин, кәч меһманлирини рәссам тәрипидин уюштурулған көргәзмини зиярәт қилишқа чақирди. Диас Зерип оғли өзиниң мой қәлимидин пүтүлгән йүзгә йеқин рәсимлириниң сизилиш тарихи вә уларниң алаһидиликлири тоғрилиқ жиғилғанларға әтраплиқ чүшәнчә бәрди. Шуниңдин кейин залда олтарған жуқарқи синип оқуғучилири тәвәллуд егисигә нурғунлиған соалларни қойди. Устаз вә рәссам оқуғучиларниң қазақ вә рус тиллирида қойған соаллириға ениқ вә дәллиң җавап берип, арилиқта өзиниң язған шеирлирини оқуп бәрди. Оқуғучиларниң «Немә үчүн тәсвирий сәнъәтни таллавалдиңиз?», дегән соалиға у «Башланғуч синипта оқуватқинимда, муәллимимниң портретини сизған едим. Уни синипдашлирим байқап қелип, рәсимни муәллимгә көрситипту. Әтималим, униңда муәллимниң қияпити карикатуриға охшап қалған болуши керәк. Әтиси мениң мәсиләм муәллимләр кеңәшмисидә қарилип, мени үч ай мәктәптин чиқириш тоғрилиқ қарар қобул қилинди. Кейинирәк дадам мәктәпкә берип, «Мәктәп оқуғучисиниң мошундақ рәсим сизғини билән пәхирлинишниң орниға, уни мәктәптин чәтнәштүргиниңлар адаләтсизлик бопту», дәп өз рәнҗишини билдүргән еди. Мана шу күндин башлап, мән өзәмниң муәллимни заңлиқ қилмиғанлиғимни, бәлки устазимниң портретини сизғанлиғимни һәм өзәмниң немигә қабил екәнлигимни испатлаш үчүн мошу кәсипни бирәтола таллавалған едим. Мәхсәткә йетиш үчүн тиришип оқудум һәм қетиқинип издәндим вә униң нәтиҗисигә һәргиз өкүнмәймән. Раст, пәрзәнтлирим арисида мениң йолум билән маңғанлар болмисиму, мән билим бәргән оқуғучилар ичидин бирқанчиси тәсвирий сәнъәткә иштияқ бағлап өсти. Улар наһийәлик, вилайәтлик, җумһурийәтлик, һәтта хәлиқара дәриҗидә өткүзүлгән байқаш-көрүкләрниң дипломантлири вә лауреатлири аталди. Мән шулар билән һәқлиқ йосунда пәхирлинимән вә силәрниңму бүгүн яритиливатқан мүмкинчиликләрдин дурус пайдилинип, сүпәтлик билим елишиңларға тиләкдашлиқ билдүримән», дәп җавап бәрди. Кәч давамида сөзгә чиққан филология пәнлириниң доктори, профессор Алимҗан Тиливалди, көрнәклик шаир, «Интизар» журналиниң баш муһәррири Абдуғопур Қутлуқов, «Азия бүгүн» гезитиниң баш муһәррири Ташгүл Һезиярова, шаир Вильям Садиқов, Қорам оттура мәктиви мудириниң орунбасари Кошали Сосанов, пешқәдәм устазлар Сәкен Тлепбергенов, Тохтасын Туяқов вә мәзкүр қурларниң муәллипи тәвәллуд егисини тәбрикләп, өзлириниң қәлб сөзлирини изһар қилди. Кәч җәриянида мәктәп оқуғучилири йеқимлиқ нахша-саз вә миллий уссуллардин чачқа чечип, мәзкүр чарә-тәдбирниң техиму көңүллүк өтүшини тәминлиди.