• Концерт
  • 29 Қараша, 2018

Ғәмкин көңүлләргә мәлһәм беғишлиди

Шәмшидин АЮПОВ, «Уйғур авази» Өткән шәнбә күни Алмута шәһиридики төмүрйолчиларниң Мәдәнийәт өйидә җумһурийәтлик Уйғур этномәдәнийәт мәркизи йенидики Анилар кеңишиниң уюштуруши вә «Уйғур авази» гезитиниң қоллап-қувәтлиши билән «Хәлиқ таланти – түгимәс байлиқ» конкурслуқ-концерт болуп өтти. Униңға уйғурлар зич яшаватқан йеза вә мәһәллиләрдин жигирмә бир хәлиқ таланти қатнишип, өз һүнәрлирини намайиш қилди. Миллий кийимләрдә сәһнигә чиққан А.Розибақиев намидики 153-мәктәп-гимназияниң башланғуч синип оқуғучилири зал ичигә лиқ толған тамашибинни бирдин өзигә җәлип қилип, көргәзмигә қоюлған миллий таам вә деханчилиқ, көктатчилиқ һәм бағвәнчилик мәһсулатлирини новәт билән тонуштурди. Андин кейин сәһнигә көтирилгән Анилар кеңишиниң рәиси Зорәм Авутова мәзкүр конкурслуқ-концертниң асасий мәхситини чүшәндүрди вә қатнашқучилирини униң қазилар топи билән тонуштурди. «Уйғур авази» гезитиниң баш муһәррири, ҖУЭМ рәисиниң орунбасари Ершат Әсмәтов ушбу мәдәний чарә-тәдбирниң ана тилимиз билән мәдәнийитимизни һәм миллий қәдрийәтлиримизни сақлапла қалмай, уни техиму риважландурушимизға иқбал йәткүзидиғанлиғини тәкитлиди. Натиқ шундақла ҖУЭМниң ишини техиму җанландуруш мәхситидә Алмутида ушбу җәмийәтлик тәшкилатниң шөбисиниң қурулғанлиғини вә униң рәислигигә медицина пәнлириниң намзити Әбәйдуллам Җаппаровниң, орунбасарлиғиға Алмута шәһири бойичә баш жигитбеши Сабит Һаҗим Йүсүпов билән тонулған меценат Долқунтай Абдухелилниң вә Ханим-қизлар кеңишигә тиҗарәтчи Модәнгүл Җүмәеваниң, Яшлар кеңишигә Рустәм Хәйриевниң сайланғанлиғини ейтип, уларни көпчиликкә тонуштурди. Новәттә сөзгә чиққан ҖУЭМ рәисиниң орунбасари Шәмшиқәмәр Абдурахманова вә Ханим-қизлар кеңишиниң рәиси Сәнәм Беширова бу чарә-тәдбирниң мәнивий йеңилинишниң бир ипадиси екәнлигини тәкитләп өткәч, Зорәм Авутова рәһбәрлигидики Анилар кеңишиниң әзалириға миннәтдарлиғини изһар қилди вә жирақ-йеқиндин қәдәм тәшрип қилған сәннәтсөйәр хәлиқ талантлириға ақ йол тилиди. Көпчилик тақәтсизлик билән күтүватқан концертни биржүрүш нахшилири билән Талғир наһийәсиниң Гүлдала йезисидин кәлгән «оттуз оғул мәшрәп әһли» башлап бәрди. Жигитбеши Азат Қурбанов «Яр сениң дәрдиң яман» нахшисини иҗра қилип, тамашибинларға арамбәхш дәмләр беғишлиди. Новәттә Әмгәкчиқазақ наһийәсиниң Байсейит йезисидин кәлгән пешқәдәм устаз Һезизҗан Турдиев нахша ейтқанда, 70 яштин алқиған хәлиқ талантини тамашибинлар гүлдирас алқишлар билән қоллап-қувәтлиди. Әнди Бишкек шәһиридин кәлгән «Интизар» ансамбли вә униң әзалири Рашидәм Абдримова, Алимҗан Розиев, Шәмшинур Бақиева һәм Қирғиз Җумһурийитиниң Қарабалта шәһиридин кәлгән Рошәнгүл Мөмүнова, шундақла қаратуруқлуқ Абдуваҗит Абдуллаев, таштиқарилиқ Абдурахман Тайиров, қорамлиқ Ризвангүл Әбәйдуллаева ейтқан йеқимлиқ нахшилар ғәмкин көңүлләргә мәлһәм беғишлап, чоңқур тәсиратларға бөлиди. Әмгәкчиқазақ наһийәсиниң Маливай йезисидин кәлгән «Тәңритағ» миллий ансамблиниң нахшичилири билән «Шатлиқ» эстрада ансамбли әзалириниң орунлишидики нахша-сазлар көпчиликниң кәйпиятини көтирип, концертниң утуқлуқ өтүшигә түрткә болди. Умумән, бу күни Мәдәнийәт өйигә җәм болған көпчилик аримизда нә-нә талантларниң барлиғиға вә уларниң пәрвишкә муһтаҗ екәнлигигә көз йәткүзсә, новәт билән сәһнигә чиққан нахшичиларниң өзара бир-бири билән йеқиндин тонушушиға вә өз һүнәрлирини көпчилик алдида әркин һәм җанлиқ намайиш қилишиға пурсәт яритилди. Ахирида қазилар – сәнъәткар Һезбуллам Сетәков, «Бейбітшілік әлемі» қазақ иҗадий бирләшмисиниң вице-президенти Турсун Розиев, талантлиқ нахшичи Санийәм Исмайил вә «Җанан» хәйрихаһлиқ фондиниң рәиси Мизангүл Авамисимова сөзгә чиқип, көпчиликкә ғенимәт дәмләрни һәдийә қилған хәлиқ талантлириға тәшәккүр изһар қилди вә ушбу конкурс-концерт программисиниң биринчи басқучиниң утуқлуқ өткинини, әнди иккинчи басқучқа йолланма алған талантларниң тизимини уюштурғучиларға айрим хәвәр қилидиғанлиғини ейтти. Шундақ қилип, «Хәлиқ таланти түгимәс байлиқ» конкурслуқ-концертниң нәтиҗиси 2019-жили март ейида чиқирилип, униң ғалиплири ениқлинидиған болиду. Мәшүр САСИҚОВ чүшәргән сүрәтләр.

223 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы