• Асасий мақалилар
• 29 Қараша, 2018

Турақлиқ вә тәрәққият мәркизидә

Йеқинда пайтәхттә “Астана – аләмшумул интеграция, бехәтәрлик вә течлиқ мәркизи” намлиқ Хәлиқара парламент конференцияси болуп өтти. Әнъәнигә айланған конференцияни Қазақстан Парламентиниң Мәҗлиси билән Қазақстан Җумһурийитиниң Ташқи ишлар министрлиги бирликтә өткүзди. Қазақстан Җумһурийитиниң Тунҗа Президенти Күнигә беғишланған Хәлиқара парламент конференциясигә Әзәрбәйҗан, Италия, Қирғизстан, Литва, Өзбәкстан, Түркия, Россия парламентарийлири, шундақла Германия, Һиндстан, Испания, Хитай, Швеция вә башқа мәмликәтләрдин хәлиқара экспертлар қатнашти. Конференциядә болуп өткән пикирлишиш Қазақстан Президенти Нурсултан Назарбаевниң миқияслиқ тәшәббуслириниң хәлиқара бирләшминиң чоң қизиқишини һасил қиливатқанлиғини йәнә бир қетим көрсәтти. Парламент Мәҗлисиниң рәиси Нурлан Ниғматулинниң тәкитлишичә, конференция мавзуси – “Астана аләмшумул интеграция, бехәтәрлик вә течлиқ мәркизи” – тәсадипи таллавелинмиди. Қазақстан һәқиқәтәнму мустәқиллик алған пәйттин тартип Президент Нурсултан Назарбаевниң рәһбәрлигидә Кеңәш Иттипақиниң чәт өлкидики җумһурийитидин дуниявий бирләшминиң һөрмәткә һәм абройға егә, җавапкәр, аләмшумул вә регионлуқ проблемиларни һәл қилишта тәләп қилинидиған хәлиқара шериккә айланған толуқһоқуқлуқ әзасиғичә болған мурәккәп йолни бесип өтти. – Жүргүзүлгән өзгиришләр нәтиҗисидә Қазақстан һазирқи дунияниң җошқун ихтисатлириниң қатариға кирди, мәмликәтниң инвестициялик мәптункарлиғи ешип, униң нәтиҗисидә кейинки 20 жилда 300 миллион доллардин ошуқ уттур чәт әл инвестицияси җәлип қилинди, – дәп тәкитлиди Нурлан Ниғматулин. Нурлан Ниғматулин “Назарбаев үлгиси” дәп атилидиған миллий йеңилашниң қазақстанлиқ үлгисиниң үч йөнилиш бойичә тәң кетип барғанлиғини тәкитлиди. Бу – технологиялик вә инфрақурулумлуқ йеңилашниң йеңи дәриҗиси, сәясий йеңилаш һәм роһий йеңилаш җәрияни вә “Рухани жаңғыру” миллий аң-сезимни йеңилаш. Мәҗлис рәиси Қазақстан Президентиниң “Улуқ даланиң йәттә қири” сәрләвһилик концептуал мақалиси тоғрилиқ гәп қилип, бу фундаментал әмгәкниң мәмликитимизниң идеологиялик һаятидики шанлиқ вақиәгә айланғанлиғини тәкитлиди. Конференциядә сөзгә чиққан Қазақстан Җумһурийитиниң ташқи ишлар министри Қайрат Абдрахманов өз сөзидә Президентниң ташқи сәясий тәшәббуслириниң Қазақстанниң актив вә тәңпуң ташқи сәясий мәвқәсиниң асасий қурали болуп һесаплинидиғанлиғини вә буниң дуниявий бирләшминиң көплигән қатнашқучилири тәрипидин тәләп қилиниватқанлиғини тәкитлиди. Хәлиқара парламент конференциясидә Россия Федерацияси Дөләт Думисиниң вице-спикери Сергей Неверов, Қирғизстан Жоғорку Кеңеши рәисиниң орунбасари Әсел Кодуранова, шундақла Италия, Литва, Әзәрбәйҗан, Өзбәкстан, ХХҖ, Испания, Германия вә башқа дөләтләрниң парламентарийлири сөзгә чиқти.