- Спорт
- 09 Қаңтар, 2019
Бова-моминиң тәрбийисини алған жигит
Алмута шәһиридики «Казнарощ» мәһәллисиниң турғунлири Турғанҗан ака билән Розибүви һәдә Рәһмановаларниң тәрбийисидә чоң болған нәвриси Закирниң утуғини аңлидимдә, тәбрикләп қоюшни көңлүмгә пүкүп, улар тәрәпкә маңғинимда, «Шәһәрдә туғулуп өскән жигит болғачқа, уйғурчә бәргән соаллиримға русчә җавап бәрсә керәк?» дегән ой-хиялларда болғиним раст. Лекин Закир соаллиримға уйғурчә әркин җавап бәрди.
— Биринчи новәттә, сениң бәзи яшлиримиздәк, ана тилиңни унтумиғиниң үчүн қолуңни елип қояй, — дедим униң билән бираз сөзләшкәндин кейин.
— Ака, дунияға келишим билән бир-бири билән пәқәт ана тилида сөзлишидиған бовам билән момамниң тәрбийисидә өскәнлигимни унтумаң, — деди у күлүмсирәп.
Закир Шерипов йеқинда Алмута шәһиридә бодибилдинг бойичә яшлар вә әрләр арисида 15-қетим өткүзүлүватқан шәһәрлик мусабиқидә «178+» категорияси бойичә алдинқи орунни егиләп, медаль вә диплом билән тәғдирләнди. У бойниға есилған медаль вә қолида тутқан дипломлар билән өйгә кирип кәлгинидә, бова-момисиниң беши көккә йәтти.
«СLASІS» спорт клубида тәҗрибилик мәшиқләндүргүчи Алексей Мамучоглыниң рәһбәрлигидә мәшиқлинип келиватқан уйғур жигити Абылайхан намидики Қазақ хәлиқара мунасивәтләр вә дуния тиллири университетиниң «Ихтисат вә бизнес» факультетини тамамлиди.
Мән «бовиси-момиси яхши тәрбийә берипту» дегән пикиргә келип, қандақту қанаәтлиниш туйғулири билән бу өйдин чиқтим. Шу чағда бир мәрипәтчиниң төвәндики қанатлиқ сөзлири ядимға кәлди: «Инсан бешида үч күлпәт бар: өлүм, қерилиқ вә яман пәрзәнт. Қерилиқ вә өлүмдин һечким қечип қутулалмайду, бирақ яман пәрзәнттин яхши тәрбийә берип сақлиниш мүмкин».
Азнат ТАЛИПОВ.
161 рет
көрсетілді0
пікір