• «Уйғур авазиниң» сәйилгаһи
• 23 Қаңтар, 2019

Маһир һекайивәнләр ениқланди

«Әркин Азия» радиосиниң хәвәр қилишичә, йеқинда Түркияниң Кастамону шәһиридә V хәлиқара «Маһмут Қәшқәрий» һекайә йезиш мусабиқисиниң мукапат тапшуруш мәрасими болуп өтти. Униңға дунияниң 18 дөлитидин иҗаткарлар иштрак қилди. Бу қетимқи мусабиқиниң йәкүни бойичә косоволуқ Рәшит Ханадан – биринчи, башқуртстанлиқ Фәрзәнә Ақбулутова – иккинчи, түркиялик Йүҗәл Өзтүрк – үчинчи, ирақлиқ Әлиф Көпрулу төртинчи орунға еришти. Хәлиқара «Маһмут Қәшқәрий» һекайә йезиш мусабиқиси Түркия баш министрлиги тармиғидики тонутуш фонди вә Түркия мәдәнийәт вә сәяһәт министрлигиниң қоллап-қувәтлиши вә Евразия язғучилар җәмийитиниң уюштуруши билән бүйүк мутәпәккүр тәвәллудиниң 1000 жиллиғиға мунасивәтлик, йәни 2008-жилдин буян икки жилда бир қетим турақлиқ өткүзүлүп кәлмәктә. Бу – түрк дуниясида тәшкил қилинған тунҗа әдәбият мусабиқисидур. Измирдики Әгә университетиниң профессори Алимҗан Инайәт мәзкүр мусабиқиниң уйғурларни дунияға тонутуштила әмәс, бәлки түркий милләтләрниң өзара чүшинишини вә иттипақлиғини мустәһкәмләштиму муһим әһмийәткә егә екәнлигини тәкитлиди. Ядиңларға салимизки, түркиялик қәләм саһиби Асуман Гүзәлҗә ханим «Көч» намлиқ һекайиси билән тунҗа қетим хәлиқара «Маһмут Қәшқәрий» һекайә йезиш мусабиқисиниң ғалиби аталған еди. Кейинки жилларда бу мәртивигә әзәрбәйҗанлиқлар – Әҗдәр Оқ вә Гафур Имамзадә Хияви һәм қазақстанлиқ Нурғали Ораз муйәссәр болған.