• «Мәшъәлниң» меһмини
• 23 Қаңтар, 2019

«Әҗдатлирим кәспигә варислиқ қилғинимдин хошалмән»

Исми: Сәнәвәр Фамилияси: Әзимова Кәспи: оқутқучи Мәшүр САСИҚОВ, «Уйғур авази» Сәнәвәр билән болған учришишимиз алаһидә бир шараитта өтти. Өзиниң җәнубий пайтәхттики әң чоң алий билим дәргаһлириниң биридә оқутқучи болуп ишләватқиниға қаримай, униң кәмтарлиғиға һәркимниң зоқи келәтти. Шуңлашқа бизниң сөһбитимиз худди кона тонушларниң очуқ-йоруқ муңдишиш-сирдишишиға охшап кәтти. Сәнәвәр Алмута шәһиридики 58-мәктәптә билим алди. У қолиға шаһадәтнамини елип, студент болуш арзуси шу жили әмәлгә ашмай қалди. Лекин у буниңдин унчивала роһсизлинип кәткини йоқ. Әксичә, вақтини бош өткүзмәсниң амалини издәп, шәһәрдики даңлиқ саатчилар Шерхановларниң қолида ишләйду. Кичигидин идрәклик, һәрқандақ ишта тәшәббускарлиқ көрситиш қабилийити бар Сәнәвәр аз вақит ичидила саатчилар аилисидин өзигә лайиқ орнини тепип, уларниң һөрмитигә сазавәр болиду. Шу йәрдә бир жилни өткүзгән Сәнәвәр һазирқи Алмута технология университетиға оқушқа чүшиду. Шу-шу болдидә, униң илим-пән дуниясидики һаяти башлинип, ата-бовисидин мирас қалған устазлиқ кәспини давамлаштуриду. У мошу җәриянда, йәни 2010 – 2012-жиллири магистратурида вә 2014 – 2017-жиллири доктарантурида билим елип, 2018-жили «Обеспечение безопасности детоксикационых свойств продуктов питания на основе тыквенного пектина» мавзусида диссертация яқлайду. Кавиға амрақ уйғур миллитиниң бир вәкили униң сирини көпчиликкә ениқ вә кәң даиридә ечип бәргәнлигигә қайил болған кәспий мутәхәссисләр Сәнәвәрниң илмий ишиға жуқури баһасини бериду. Шу түпәйли Россиядә өткән «Золотая осень» намлиқ илмий әнҗуманда Сәнәвәр мәхсус диплом билән мукапатлиниду. Шуниму алаһидә ейтип өтүш керәкки, әйнә шу мукапатни муәллипкә Россияниң йеза егилиги министри Дмитрий Патрушев шәхсән өз қоли билән тапшуриду. Заманивий илмий дәриҗә PhD доктори аталған Сәнәвәр Әзимова билән бир рәт параңлашқан адәм униң һечқачан йәткән утуғи билән чәклинип қалмайдиған, арман-мәхсәтлири тола вә билим елишта еринип һорунлуқ қилишни әсла билмәйдиғанлардин екәнлигигә бирдинла көз йәткүзиду. Чүнки у һәрбир сөзидә билимлик адәмниң һечқачан йәрдә қалмайдиғанлиғини тәкитлигәч, һазирқи яшлиримизниң заманниң рәптайиға бола, униңға интилмайдиғанлиғини, әксичә күндин-күнгә йеник йол арқилиқ пул тепиш койиға кирип кетиватқанлиғини наһайити ечиниш билән тилға алиду. Шуниң билән биллә, у сәралардиму талантлиқ балиларниң барлиғини вә уларға имканқәдәр йол-йоруқ көрситип, келәчәктә җәмийәткә хизмәт қилидиған мутәхәссисләрдин болуп йетилишигә шараит яритишниң муһимлиғини тәкрар-тәкрар қәйт қилиду. Шундақла у айрим ата-аниларға мундақ мәслиһәтму бәрди: «Пәрзәнтлиримиз алий билим дәргаһини пүтәргәндин кейин уларға иш тепиш қийин вә иш тапқан һаләттиму «петиштурмиди», «ишләткүзмиди» дегән әқилгә сиғмайдиған ойдурмилардин жирақ болуп, балиларни дурус тәрбийиләш лазим. Буниңдин ташқири, йәнә бир ейтарим, биз көпмилләтлик әлдә яшаватқанлиғимиз түпәйли, ким болушимиздин қәтъий нәзәр, пәрзәнтлиримизгә өзгиләрни һөрмәт қилишқа үндисәк, өз новитидә, уларниң бизгә болған мунасивитиму шундақ болиду. Йошуридиғини йоқки, бизниң Президентимиз башқилар арман қиливатқан мошу достлуқни қолға кәлтүргәнлиги үчүн биз, Қазақстан гражданлири, бүгүнкидәк тәңлик, течлиқ, паравәнлик һөкүм сүргән җумһурийәттә яшаватимиз. Йәнә бир алаһидә тәкитләйдиған әһвал, әгәр балида бирәр қабилийәт болса, у һечқачан йәрдә қалмайду. Әйнә шу таланти яки қабилийити билән ненини тепип йәйду. Мән буларни елимиздики әң чоң билим дәргаһлириниң биридә, йәни йүзлигән көпмилләтлик устазлар коллективи ишләйдиған вә миңлиған студентлар оқуйдиған Алмута технология университетиниң оқутқучиси сүпитидә ейтиватимән. Сөһбитимиз давамида милләтпәрвәрлигиниң үстүнлүги вә дуния қариши кәң Сәнәвәр оқутқучилиқ кәспини «ата мирас» дәп қалди. Теги-тәктини сорисақ, у ата җәмәти тәрипидин өмрини маарип саһасиға беғишлиған йәттинчи вәкил екән. Бова-момилиридин Мәтғази Йүсүпов үч уруш мәйданида қан кечип, течлиқ һаятини бала тәрбийисигә сәрип қилған болса, Меҗит Әхмәтов, Әмәрғази Йүсүпов вә Савурахун Мәңсүров Улуқ Вәтән урушида шиддәтлик җәңләрниң шаһиди болди. Әнди қалғанлиридин Мәсимахун, Чимахан, Мерванәм, Розахан Мәңсүровларниң пүткүл аңлиқ һаяти устазлиқ билән өткән екән. Мана мошуларни кичигидин аңлап өскән Сәнәвәр арминиға йәткәнлиги билән пәхирлиниду. Биз бүгүн Сәнәвәр Әзимованиң қол йәткүзгән бирла утуғиға тохталдуқ. Униңдин сирт алған мукапатлири тоғрилиқ сөз қозғашқа қәһриманимиз қәтъий қошулмиди. Буни униң кәмтарлиғи билән бағлаштурдуқ, халас.