• Хәйрихаһлиқ
• 23 Қаңтар, 2019

Қериларға – қувәт, балиларға мәдәт бәрди

Йеқинда Қазақстан хәлқи Асссамблеяси тәрипидин елан қилинған «Хәйрихаһлиқ карвини» акцияси даирисидә Қазақстан Уйғур Яшлар Бирлиги (ҚУЯБ) вә «Хәйрихаһлиқ алимидә һәммиси охшаш» волонтерлар топиниң уюштуруши билән Алмута шәһиридики «Солнышко» балилар өйидә тәрбийилиниватқанлар үчүн «Радонеж» қерилар өйидә мәйрәмлик кәч өтти. Яшанғанлар, йәни тәғдирниң язмиши түпәйли мошу дәргаһниң турақлиқ турғунлириға айланған қерилар билән баққучисидин айрилған житим-йесирлар бу күни пуғани қанғичә күлкигә ғәриқ болуп, өзлириниң ғәмкин күнлирини бир дәм болсиму ядидин чиқарди. Мәйрәмлик чарә-тәдбир давамида һәрхил оюнлар өткүзүлүп, униң ғалиплири баһалиқ соғилар билән мукапатланди. Буниңдин ташқири, бу мәйрәмгә қатнашқанларниң һәммисигә уюштурғучилар тәрипидин соғилар тапшурулса, балилар өйиниң мәмурийити мәзкүр паалийәтниң тәшәббускарлири болған «Хәйрихаһлиқ алимидә һәммиси охшаш» топиниң әзалири Илшат Қожахметовқа, Азатҗан Сидиқовқа, Бәхтияр Йүсүповқа, Сания Султановаға, Диләрәм Һасанова коллектив намидин миннәтдарлиқ билдүрди. Мәлумки, ҚХА тәрипидин елан қилинған «Шәпқәт карвини» намлиқ акция җумһурийитимизниң барлиқ җайлирида өткүзүлүватиду. Әнди ушбу паалийәтни дәсләпкиләрдин болуп қолға алған ҚУЯБ әзалири келәчәктиму хәйри-сахавәтлик ишларда дайим алда болидиғанлиғиға ишәнчимиз камил. Зульфия ТЕЙИПОВА.