• Замандаш
• 23 Қаңтар, 2019

Тәдбирчанлиғиға сахавәтлиги қошулғанда

Гөһәрбүви ИСМАЙИЛҖАНОВА, «Уйғур авази» Мақалимиз қәһримани Дилшат Насировниң исми униң Панфилов наһийәлик Уйғур мәдәнийәт мәркизиниң рәиси болуши биләнла чәклинип қалмайду. У наһийәдә кичик вә оттура тиҗарәтни, йеза егилиги саһасини вә биримизгә мәлум, биримизгә намәлум болған туризм саһасини тәрәққий әткүзүшкиму салмақлиқ үлүшини қошти. Биз төвәндә униң һаяти вә әмгәк паалийитини гезитханлиримизға қисқичә тонуштурушни тоғра көрдуқ. Дилшат акиниң балилиқ дәври Челәк тәвәсидә өтти. Үрүмчи шәһиридә дунияға кәлгән у ата-аниси билән төрт яшқа кәлгәндә Қазақстан дияриға көчүп чиқип, Челәк (һазирқи Әмгәкчиқазақ) наһийәсидики Бижанов йезисиға орунлишиду. Байсейит йезисидики Исмайил Тайиров намидики мәктәптә тәһсил көрүп, Алмутидики Қазақ политехника институтиға оқушқа чүшүп, уни муваппәқийәтлик тамамлайду. Алий билимлик мутәхәссис, әмгәк паалийитини шу дәвирниң тәләплиригә мувапиқ өзи тәһсил көргән институтниң йолланмиси билән Павлодар вилайити Баянаул наһийәсидики «Майкаин алтун» карханисида аддий слесарьлиқтин башлап, җавапкәрлиги, ишбиләрмәнлиги түпәйли цех башлиғи андин карханиниң алтун ишләпчиқириш фабрикисиниң мудири дәриҗисигичә көтирилиду. Әнди беваситә Яркәнт тәвәсигә келиши биз жуқурида тәкитлигән туризм саһасиға мунасивәтлик. Чүнки у 1989-жили Яркәнт тәвәси Қорғас йезидики сабиқ СССР дөләт чәт әл туризми бойичә Алмута вилайәтлик «Қорғас» шөбисиниң мудири болуп ишләйду. Шу жиллири у билимини мукәммәлләштүрүш мәхситидә Москва шәһиридики чәт әл туризми бойичә алий тиҗарәт мәктивини тамамлиди. Тохсининчи жилларни яркәнтликләр яхши билидуки, туризм саһаси йолға қоюлуп, хелила тәрәққий әтти. Мана буниңда Дилшат Һүсәйин оғлиниң әҗри бар екәнлигини бири билип, бири билмисә керәк. Тәдбирчан тиҗарәтчи дәсләпкиләрдин болуп хошна Хитай Хәлиқ Җумһурийитигә туристларниң берип келиши үчүн шәртнамә түзүп, уни әмәлгә ашурди. Қазақстан Җумһурийити Спорт вә туризм министрлигиниң Алмута вилайитидики вәкили болди. Наһийә хәлқила әмәс, бәлки жирақ вә йеқин чәт әлләрдинму миңлиған туристлар бу саһаға мураҗиәт қилди. Яркәнт шәһиридә болса, пәқәт Хитайдин кәлтүрүлгән товарлар дүң вә парчилап сетилидиған чоң базар ишқа қошулди. Қисқиси, нурғунлиған адәмләр иш билән тәминләнди. Дилшат ака кейинирәк «Қорғас» җавапкәрлиги чәкләнгән йолдашлиғини қуруп, униң мудири болди. Дилшат Насировниң исмини яркәнтликләр ишләпчиқиришниң муһим амиллиридин болған йеза егилиги саһаси биләнму бағлаштуриду. У чарвичилиқ билән бағвәнчилик, деханчилиқ билән шуғулланди вә наһийәдә дәсләпкиләрдин болуп белиқ өстүрүшкә җүръәт қилди. Бу ишта униңға рәпиқиси Сүрийәм һәдә Һезимова қол-қанат болди. Улар «Ирада-балық» җавапкәрлиги чәкләнгән йолдашлиғини қуруп, яркәнтликләр үчүн тамамән ят саһада изчил издинишниң, дадиллиқниң үлгисини намайиш қилди. Мошундақ бир пәйттә улар йәнә бир чоң лайиһини әмәлгә ашурди. Өсәк дәриясиға йеқин мәнзирилик җайға 400 орунлуқ «Ирадә» ресторанини салди. Ресторанда миллий таамлар билән бирқатарда европа таамлириниң хилму-хил түрлирини тәйярлаш ишлирини қолға алди. Әнди «Ирадә» рестораниға кәлгүчиләр мәхсус көлчәкләрдин форель белиғини тутуп, һадуқ чиқириш, уни шу йәрдила тәйярлаш охшаш хизмәтниң йеңи түрлиридин пайдилиниш мүмкинчилигигә егә болди. Тәдбирчан икки тиҗарәтчиниң йәнә бир лайиһиси — «Ирадә» нахша-уссул ансамбли. Бу өз алдиға бир мавзу десәк, ашуруп ейтқанлиқ әмәс. Нәрқ ихтисади шараитида ишсиз жүргән бир топ талантлиқ сәнъәткарларниң бешини қошуп, мәзкүр ансамбльни тәшкил қилғанлиғи уларниң алий инсаний пәзиләтлириниң испати дейиш орунлуқ. Нәтиҗидә ишбиләрмән инсанниң тәшәббуси һәм маддий қоллап-қувәтлиши билән тәшкил қилинған ансамбль җумһурийәт даирисидила әмәс, бәлки чәт әлләрдә уюштурулуватқан фестиваль-байқашларға қатнишиш пурситигә егә болди. «Ирадә» Испаниядә өткән фестивальниң баш мукапитини йеңивалғанда, уларни наһийә рәһбәрлири, жут-җамаәтчилик дағдуғилиқ күтүвалғанлиғи яркәнтликләрниң һеликәм ядида. Дилшат акиниң рәпиқиси Сүрийәм Һезимова наһийәдики Тәдбирчан ханим-қизлар кеңишиниң рәиси сүпитидә иш елип бериватиду. Йәни наһийәдә әрләрдин һеч қелишмай кичик вә оттура тиҗарәтни тәрәққий әттүрүватқанларниң бири. Техи йеқиндила елимиз Президенти Нурсултан Назарбаевниң Мәктүбидә тәкитләнгән хәйрихаһлиқ паалийәтни җанландуруш йолида өзи рәһбәрлик қиливатқан оттузға йеқин ишбиләрмән ханимлар билән «Мейірім” карвининиң акциясини уюштуруп, тәминати начар, көпбалилиқ аилиләрни озуқ-түлүк вә йемәк-ичмәк билән тәминләш мәхситидә Алмалидин Қоңурөләнгичә арилап, халисанә ярдимини көрсәтти. Бу күнләрдә өзиниң 60 яшлиғини қарши еливатқан Дилшат ака Насиров кичик вә оттура тиҗарәт билән шуғулланған һалда хәйри-еһсанлиқ паалийитиниму тохтатқини йоқ. Униң кәңдаирилик хәйрихаһлиқ ишлирини санап түгәткүсиз. Җүмлидин Хелил Һәмраев намидики мәктәпниң селинип, пайдилинишқа берилишидиму көп күч чиқарди. Өзи әзаси болған мәшрәп әзалири билән мәктәп әтрапини аватлаштуруш ишлирини елип барди. Миллий нәширләргә муштири топлаш ишлирида наһийәдә той селиғиға бәш «Уйғур авази» гезитини қошуп қойди. Һазир униң бу тәҗрибисини башқа наһийәләр пайдиланмақта. Әндиликтә йәнә бир чоң лайиһини қолға алмақта. Шәһәрдики Билал Назим һәйкилини реконструкция қилип, униң әтрапини тәңдиши йоқ истираһәт беғиға айландурушни көздә тутуватиду. Демәк, бу иштиму униң тәшәббусини қоллап-қувәтләйдиған милләтпәрвәр жигит-қизларниң униң йенидин тепилидиғанлиғиға ишинимиз. Панфилов наһийәси.