• Асасий мақалилар
• 23 Қаңтар, 2019

Ақкөл – дәсләпки әқиллик шәһәр

Дөләт рәһбири Нурсултан Назарбаевниң “Төртинчи санаәт инқилави шараитидики тәрәққиятниң йеңи имканийәтлири” намлиқ Мәктүбидә дунияда инвесторлар үчүн шәһәрләр риқабәткә чүшиду дегән чүшәнчә қелиплашқанлиғини вә хәлиқ дөләтни әмәс, течлиқ һаят сүрүп, ишләйдиған шәһәрни таллайдиғанлиғини тәкитлигән еди. Һазирқи еһтияҗ вә шараит рәқәмлик шәһәрләрни бәрпа қилишни тәләп қилиду. Мәлумки, Президент Мәктүбидә тәкитләнгән “Әқиллик шәһәрләрниң” елимиздики дәсләпки қалиғичи Астана әтрапида пәйда болди. Шәһәрниң инфрақурулуми толуқ рәқәмләштүрүш башланған Ақмола вилайитигә қарашлиқ Ақкөл шәһири пайтәхттин 100 километр жирақлиқта орунлашқан. Өткән һәптидә Президент мәхсус мошу шәһәргә келип лайиһиниң әмәлгә ешиши билән тонушти. Дөләт рәһбири Ақкөл шәһиригә иш бабидики сәпири давамида “Қазақтелеком” акционерлиқ җәмийити системилиқ магистралиниң техникилиқ әхбаратларни қайта ишләш мәркизиниң иши билән тонушти. Бу мәркәз шәһәрдики барлиқ видеоназарәт, энергия ресурслириға мониторинг, назарәт вә һесап жүргүзүш, йол трафигини башқуруш, өрткә қарши бехәтәрлик системилиридин келип чүшидиған мәлуматларни жиғип, “Smart Aqkol” мәркизигә әвәтип бериду. Дөләт рәһбири “Рәқәмлик Қазақстан” дөләт программиси даирисидә әмәлгә ашурулған “Smart city – Әқиллик шәһәр” заманивий технологияләр киргүзүш бойичә байқаш лайиһисиниң нәтиҗилири билән тонушти. Нурсултан Назарбаев әмәлгә ашурулған ишниң әһмийитини тәкитләп, рәқәмләштүрүш саһасида әмәлгә ашурулуватқан лайиһиләр, биринчи новәттә, гражданларниң турмуш сүпитини яхшилашқа, қолайлиқ һәм бехәтәр муһитни қелиплаштурушқа қаритилғанлиғини тәкитлиди.