• Әхбаратлар еқими
• 30 Қаңтар, 2019

Дөләт стипендияси тапшурулди

Дөләт рәһбириниң тапшурмиси бойичә дөләт кативи Гүлшара Әбдиқалықова Алмутида 2018-жилқи Қазақстан Җумһурийити Президентиниң мәдәнийәт саһасидики дөләт стипендиясини тапшурди. Дөләт стипендияси пәхрий намларға һәм мукапатларға сазавәр болған мәдәнийәт вә сәнъәт әрбаплирини, шундақла талантлиқ яш иҗаткарларни мәмликәт мәдәнийитини тәрәққий әткүзүшкә қошқан һәссиси үчүн қоллап-қувәтләш мәхситидә һәр жили тапшурулиду. Өткән жили әдәбият вә сәнъәт саһасиниң 75 вәкили стипендияләргә сазавәр болған еди. Уларниң арисида Ескендир Хасанғалиев, Сәбит Досанов, Иран-Ғайип Оразбаев, Есмухан Обаев, Асанәли Әшимов, Александр Гаркавец, Татьяна Фроловская, Әхмәтҗан Һашири, Гүлвира Разиева, Сара Тынышғулова, Мыңбай Рәш кәби әдәбият, сәнъәт вә мәдәнийәт саһалириниң вәкиллири бар. Дөләт кативи мәрасимни ечип, стипендиягә сазавәр болғанларни сәмимий тәбриклиди вә дөләт стипендияси берилишиниң уларниң мәмликәт тәрәққиятиға қошқан һәссисини баһалаш болуп һесаплинидиғанлиғини тәкитлиди. Гүлшара Әбдиқалықова жиғилғанларниң диққитини Президентниң “Улуқ даланиң йәттә қири” сәрләвһилик мақалисидики “Рухани жаңғыру” программисиниң йеңи компонентлириниң әҗдатлиримизниң көп әсирлик мирасини йеңилап, уни рәқәмлик цивилизация шараитида чүшинишлик қилидиғанлиғи тоғрилиқ сөзләргә җәлип қилди. – Президент Нурсултан Назарбаев 2019-жилға йеңи вәзипиләрни қойди. “Рухани жаңғыру” программисиниң давами болуп һесаплинидиған “Улуқ даланиң йәттә қири” сәрләвһилик концептуал мақалиниң әвзәлликлирини әмәлгә ашуруш әйнә шу җүмлидиндур, – дәп тәкитлиди дөләт кативи. – Униң даирисидә бирқатар мәдәний вә илмий лайиһиләр көздә тутулди. Мәсилән, “Архив-2025” лайиһиси қедимий дәвирләрдин тартип бизниң заманимизғичә болған барлиқ елимиз вә чәтәллик архивларни комплекслиқ тәтқиқ қилишни көздә тутиду. Новәттики лайиһә “Улуқ даланиң улуқ шәхслири” қамусини вуҗутқа кәлтүрүшкә нишан қилинған. Гүлшара Әбдиқалықова шундақла “Ұлы Дала тұлғалары” илмий аммибап түркүми үстидики ишниң җанландурулидиғанлиғини, шуниң арқилиқ бизниң қәһриманлиримизни һәм Қазақстанда, һәм чәт әлдә билидиғанлиғини, әнди “Түрк дуниясиниң келип чиқиши” лайиһиси даирисидә болса, Астанада Дуниявий түркшунаслар конгрессини вә Түркий милләтләр мәдәнийити күнлирини өткүзүш планланғанлиғини тәкитлиди. – “Ұлы Дала” Улуқ даланиң қедимий сәнъәт һәм технологияләр музейи” лайиһиси археологиялик комплекслар, түрлүк тарихий дәвирләрниң тепилмилири, сәнъәт вә технологияләр үлгилириниң кәңәйтилгән экспозициясини вуҗутқа кәлтүрүшни көздә тутиду. “Дала фольклориға вә музыкисиға миң жил” лайиһиси дала фольклориниң антологиясини вуҗутқа кәлтүрүп, хәлиқ еғиз иҗадийитиниң әң яхши үлгилирини бирләштүрүшкә нишан қилинған. Һөҗҗәтлик фильмлар, телесериаллар түркүмини, толуқ метражлиқ бәдиий фильмларни чүшириш – “Тарих кино вә телевидениедә” лайиһисиниң асасий мәхсити, – дәп хуласилиди дөләт кативи. Әнъәнивий баш қошуш давамида Гүлшара Әбдиқалықова әдәбият вә сәнъәтни тәрәққий әткүзүшкә һәссә қошуп келиватқан чоң әвлат һәм яшларниң Қазақстан мәдәнийитини техиму тәрәққий әткүзүшкә төһпә қошидиғанлиғиға ишәнчә билдүрди.