• Әхбаратлар еқими
• 30 Қаңтар, 2019

Миллий банк рәисини қобул қилди

Нурсултан Назарбаев Қазақстан Җумһурийити Миллий банкниң рәиси Данияр Ақышевни қобул қилди. Учришиш давамида Дөләт рәһбиригә Миллий банкниң 2018-жилқи паалийитиниң йәкүнлири тоғрилиқ һесават, шундақла мәмликәтниң валюта-малийә базиридики әһвал тоғрилиқ әхбарат берилди. Президент бирқатар ихтисадий көрсәткүчләрниң иҗабий өсүватқанлиғини тәкитләп, инфляция дәриҗисини төвәнлитиш бойичә көрүлүватқан чариләрниң нәтиҗидарлиғи тоғрилиқ мәсилигә тохталди. – 5,3 пайиз дәриҗисидики инфляция – бу яхши көрсәткүч. Амма у ихтисатниң нәтиҗидарлиғи түпәйли әмәс, бәлки базарда ахчиға айлиниш көләминиң қисқириши һесавиға қолға кәлтүрүлүватиду. Миллий банк вә Һөкүмәт бу йөнилиштә начар ишләватиду. Мәбләғни айлинимдин чиқириш арқилиқ инфляцияни техиму төвәнлитишкә болиду, бирақ буниңда мундақ қарарниң ихтисатта қандақ әкис етидиғанлиғи намәлум. Шуниң билән бирқатарда узақ муддәтлик несийәләр саниниң хелә азайғанлиғини тәкитләш керәк, – деди Нурсултан Назарбаев. Дөләт рәһбири әмәлдики қанунларға бирқатар түзитишләрниң қобул қилинғанлиғини атап көрситип, Миллий банк тәрипидин мошу саһада тегишлик назарәтниң жүргүзүлүшиниң зөрүр екәнлигиниму тәкитлиди. Өз новитидә Данияр Ақышев мәһсулат ишләш санаитини несийә билән тәминләш бойичә Дөләт рәһбириниң Қазақстан хәлқигә йоллиған бу қетимқи Мәктүбидә қоюлған тапшурмиларниң орунлинишиниң кетип бериши тоғрилиқ ейтип бәрди. Униңдин ташқири Миллий банк рәиси Дөләт рәһбиригә миллий валюта курсиниң өзгиришигә тәсир қиливатқан амиллар тоғрилиқ доклад қилди. – Тәңгиниң АҚШ доллириға нисбәтән алмаштуруш курси бир жилда 15,6 пайиз төвәнлиди. Буниңда ташқи амиллар асасий сәвәпләрдин болди. Нефтьниң дуниявий баһаси наһайити өзгиришчан пети қеливатиду. Ташқи шараит, җүмлидин сақлиниватқан йөләкчилик вә чариләр көрүш сәяситиму шунда болуп һесаплиниду. Амма әркин алмаштуруш курси тәртиви бизгә барлиқ еғирчилиқларни йениклитип, өткән жилниң ахирида 30,9 миллиард АҚШ долларни тәшкил қилидиған алтун-валюта резервини сақлап қелиш имканийитини бәрди. Миллий фондниң чәт әл валютиси һесавидики активлири 57,7 миллиард долларни тәшкил қилди, – деди Миллий банк рәиси. Данияр Ақышев шундақла малийә базирини несийә билән тәминләш вә сағламлаштуруш үчүн әмәлгә ашурулуватқан ишлар тоғрилиқ әхбарат бәрди. – Биз малийә секторини яхшилаш һесавиға базарниң сағлам оюнчилириға тәрәққий етиш имканийитини бериватимиз. Көрүлгән чариләрдин кейин несийә көләми хелә өсиду дәп һесаплаймән. Биз 2019-жили бу көрсәткүчниң 10 пайиз өсидиғанлиғини пәрәз қиливатимиз. Бу ички умумий мәһсулаттин жуқури. Демәк, несийә елиш көпийиду вә әһвал пәйдин-пәй яхшилиниду. Биз келәчәктә проблемиларни пәйда қилиши мүмкин болған өсүмгә қариғанда, тәңпуңлашқан өсүмни мувапиқ көрүмиз, – деди Миллий банк рәиси. Дөләт рәһбири учришиш ахирида бирқатар ениқ тапшурмиларни бәрди.