• Замандаш
• 06 Ақпан, 2019

«Жутниң миннәтдарлиғидин артуқ мукапат йоқ»

Сабирәм ӘНВӘРОВА, «Уйғур авази» Йеқинда Уйғур наһийәсиниң Чонҗа йезисида миллий мәдәнийитимиз җанкөйәрлири арисида өткән бир баш қошушта алмутилиқ меценат Нурмәһәмәт Палтахунов һәққидә гәп қозғилип қалди.Меценатниң намиға иллиқ тиләк ейтқанлар наһайити көп болди. Уларниң арисида Довун йезисидин кәлгән мәктәп мудири, жигитбеши вә жут ақсақаллириму бар. Кейин мәлум болушичә, Нурмәһәмәт ака довунлуқ екән. Ейтишларға қариғанда, у туғулуп өскән жутида көплигән сахавәтлик ишларни әмәлгә ашурупту. Бүгүнки күндә «Бахар» җавапкәрлиги чәкләнгән йолдашлиғиниң баш мудири болған Нурмәһәмәт акиниң һаяти тиҗарәтчилик билән чәмбәрчас бағлиқ. У өзиниң әмгәк паалийитини 1966-жили наһийәлик истималчилар җәмийитидә бухгалтерлиқтин башлиған. Алмутиға көчүп кәлгәндин кейин, «Золотая осень» дукининиң мудири болиду. 1989 – 1996-жиллири Әмгәкчиқазақ наһийәсиниң «Гигант» совхозида совхоз мудириниң сода бойичә орунбасари хизмәтлирини атқуриду. У қәйәрдә ишлимисун, тапқан-тәргининиң мәлум қисмини хәйрихаһлиқ паалийәткә сәрип қилишқа адәтләнгән. Болупму у Уйғур наһийәсиниң иҗтимаий-ихтисадий тәрәққиятиға өзиниң биркишилик һәссисини қошқан инсанлардин. У күни Нурмәһәмәт акиниң алийҗанап ишлири һәққидә довунлуқлар өзлириниң иллиқ ләвзини билдүрди. 2004-жили униң беваситә күч чиқириши билән Довунда мечит қәд көтириду. 2005-жили Довун мәктивидә ремонт ишлирини жүргүзүшкә 7 миллион тәңгә ианә қилиду. Әлачи оқуғучиларниң роһини көтириш мәхситидә аилиси намидин стипендия тәсис қилғанлиғиниму мәктәп рәһбәрлиги һелиғичә унтуғини йоқ. Йезидики уруш ветеранлириға орнитилған ядикарлиқниң қәд көтиришидиму униң үлүши көп. Махтинишни билмәйдиған инсанниң буниңдин башқа жути үчүн қиливатқан ишлирини ейтип түгәткүсиз. Мошундақ хәйрихаһлиқ паалийити билән тонулған Нурмәһәмәт Палтахунов 2012-жили җумһурийәтлик Уйғур этномәдәнийәт мәркизи рәисиниң орунбасари болуп сайлиниду. Әнди у өзиниң хәйрихаһлиқ паалийитини җумһурийәт миқиясида давамлаштуруватиду. Ярдәм сорап мураҗиәт қилған адәмни у һечқачан қуруқ қол қайтурған әмәс. Амма «оң қол бәргәнни, сол қол билмисун» дегән ибарә униң һаятий шиари. Шундиму һаятта кәмтар, камсөзлүк акимиздин өзи һәққидә кәңирәк ейтип беришини сориведуқ, илтимасимизни рәт қилди. – Елимиз Президенти өзиниң қазақстанлиқларға йоллаватқан һәрбир Мәктүбидә «Туғулған жутуңларға туғуңларни тикиңлар» дәватиду. Мәнму мошу әснада паалийәт елип бериватимән. Хәлқим, жутум үчүн қилған азду-тола әмгигимни жутдашлирим баһалаветипту. Мениң үчүн буниңдин артуқ мукапат йоқ, – деди у.