• Хәйрихаһлиқ
• 13 Ақпан, 2019

Бир-биримизгә шәпқәтлик болайли

Рашидәм РӘҺМАНОВА, «Уйғур авази» Йеқинда Әмгәкчиқазақ наһийәсиниң уйғурлар зич җайлашқан Рахат йезисида мошу жутта туғулуп өскән тиҗарәтчи Һакимхун Җәлиловниң уюштуруши билән хәйрихаһлиқ акцияси өтти. Һакимхун ака мундақ сахавәтлик ишни биринчи қетим қиливатқини йоқ. Бу мәрт-мәрданә инсан ярдәмгә муһтаҗларниң илтимасини һечқачан рәт қилған әмәс. 30 жил ихтисатчи болуп ишлигән у кейинки бәш – он жилдин буян тиҗарәт билән шуғулланмақта. Шундақла хәйрихаһлиқ паалийәткиму көп көңүл бөлмәктә. Мәсилән, һәр жили Һакимхун ака мүмкинчилиги йоқ, амма гезит оқушни халайдиған онлиған уйғур аилисигә «Уйғур авази» вә «Азия бүгүн» гезитлирини яздуруп бериду. Өзи истиқамәт қилидиған Ишиктә шәһири, Рахат вә Көктөбә йезилирида өтүватқан мәдәний чарә-тәбирләргиму ярдәм қолини сунуп кәлмәктә. Роза-Рамзан вә Қурван һейтлирида мал союп, мусулман әһлигә гөшини таритип беришни әнъәнигә айланған. Бу қетим Һакимахун ака сийир союп, Ишиктә шәһири, Раһат, Қәйнәзәр вә Көктөбә йезилиридики тәминати төвән 60 аилигә гөш таратти. Униңға қошумчә мейи билән гүрүчи бар. – Мәлумки, һазир дунияниң бәзи җай-җайлирида күн көрүш қийинлишип кәтти. Бир тамча су билән бир чишләм нанға зар болған адәмләр нурғун. Биз, қазақстанлиқлар, азат-әркин, баяшайәт яшаватимиз. Алди билән Аллаға, андин билим елип, әмгәк қилип, әркин яшашқа мүмкинчиликләр яритиватқан елимиз Президенти Нурсултан Назарбаевқа ейтар алқишимиз көп. Шүкри, тирикчилигим яхши. Бүгүнки чарә-тәдбирни уюштуруштики мәхситим – дуния йүзидики барлиқ мусулманларға Алланиң шәпқитини тиләп, дуа-тәгбир қилиш. Инсанларниң бир-биригә болған меһир-муһәббитиниң ойғинишиға азду-тола тәсиримни йәткүзүш, – дәйду хәйрихаһлиқ акциясини уюштурғучи Һ.Җәлилов. Мәзкүр акциягә қатнашқан Әмгәк­чиқазақ наһийәлик Уйғур этномәдәнийәт мәркизиниң рәиси Сулайман Мәхсүтов Һ.Җәлиловниң бу алийҗанап һәрикити үчүн апирин ейтип, униң ишлириниң техиму утуқлуқ болушиға тиләкдашлиғини билдүрди. Ушбу акция әтиси Рахат йезисиниң мечитида давамлишип, йеза турғунлири үчүн нәзир берилди. Әмгәкчиқазақ наһийәси.