• Йеңилиқлар
• 13 Ақпан, 2019

Яшлар билән учрашти

Мәлумки, Астанада Президент Нурсултан Назарбаевниң қатнишиши билән Яшлар жилиниң ечилиш тәнтәниси болуп өткән еди. Көп өтмәй җай-җайларда Яшлар жилиға беғишланған чарә-тәдбирләр уюштурулушқа башлиди.  Сабирәм ӘНВӘРОВА, “Уйғур авази” Җүмлидин йеқинда Уйғур наһийәсидиму Яшлар жилиниң ечилиш тәнтәниси болуп өтти. Униңға наһийә һакими Шөһрәт Нурахунов вә бирқатар лавазимлиқ шәхсләр қатнишип, яшларниң ой-пикригә қулақ салди. Учришиш Чонҗа йезисидики 4-оттура мәктәпниң мәҗлисләр залида өтти. Униңға риясәтчилик қилған наһийәлик яшлар ресурслиқ мәркизиниң рәһбири Нурсултан Болатулы дөлитимиздә яшларниң оқуши, ишлиши, җәмийәт һаятиға қатнишиши үчүн барлиқ шараитниң яритиливатқанлиғини тәкитлиди. Яшлар жилиға реҗилиниватқан ишлардин қисқичә учур берилгәндин кейин, сөз наһийә яшлириға берилди. Болупму 22 яшлиқ Әлишер Әхмәтҗанов өзиниң ширнә заводини ишқа қошуп, өткән жили 40 тонна мейизлик мәһсулат чиқирип, сода орунлириға йәткүзгәнлигини ейтса, техи йеши биргә толмиған наресидиниң аниси болғиниға қаримай, өйдә олтирип, Интернет арқилиқ «Caramel» агентлиғиниң ишини җанландуруп, аһалиға жуқури дәриҗидә хизмәт көрситип келиватқан тиҗарәтчи Гүлфида Арзиеваниң сөзи яшларниң қәлбидә чоңқур тәсират қалдурди. Бу күни яшлар тәрипидин бирқанчә пикир-тәклипләрму келип чүшти. Мәсилән, наһийәдә қабилийәтлик вә тәдбирчан балиларға беғишланған мәркәзниң йоқлуғи һәм қаидисиз йәкму-йәк билән шуғуллинидиған яшлар үчүн мәшиқлиниш залиниң һаҗәтлиги һәққидә сөз болди. Наһийә яшлириниң паалийәтчанлиғидин қайил болған Шөһрәт Нурахунов уларни һәртәрәплимә қоллап-қувәтләйдиғанлиғини, ейтилған пикир-тәклипләрни һәл қилип беришкә тиришидиғанлиғини ейтип, келәчигидин зор үмүт күтидиғанлиғини тәкитлиди. Яшларниң заман тәливигә лайиқ билим елип, әмгәк қилип келиватқанлиғидин хурсән болған вилайәтлик мәслиһәтниң депутати Ызғарбек Бектурсынов Президентимизниң келәчәккә ачқан парлақ йолида дадил алға илгириләп, елимизниң пәхри болушиға тиләкдашлиқ билдүрди.