• Җасарәт — мәңгүлүк
• 20 Ақпан, 2019

«Оң қол бәргәнни, сол қол билмәслиги керәк»

Йеқинда Алмутида истиқамәт қилидиған бир топ челәклик тиҗарәтчиләр авған урушиниң ветеранлири билән учрашти. Бәхтишат СОПИЕВ “Уйғур авази” Мәзкүр учришишниң тәшәббускари болған Әмгәкчиқазақ наһийәлик Уйғур этномәдәнийәт мәркизиниң Челәк региони бойичә орунбасари Майдин Абдуллаев авған урушиниң ветеранлирини мәйрими билән тәбрикләп, уларға мустәһкәм саламәтлик тилиди. Андин тиҗарәтчиләр намидин сөз алған «Техноград» ширкитиниң баш мудири Билал Һошуров яшлиғиға қаримай, қан кәчкән уруш ветеранлирини тәбрикләп, уларға өзиниң азду-тола соғисини тапшурди. Сәмимий соал-җавап ретидә өткән учришишта авған урушиниң ветеранлири – истипадики подполковник Асылхан Жанабаев, «Қизил Юлтуз» ордени вә «Җасарити үчүн» медалиниң саһиблири Вильям Илахунов билән Райдин Абдуллаев вә бәйнәлмиләл-җәңчи Юнь Родион бешидин өткән-кәчкәнлирини сөзләп бәрсә, Майдин Варисоғли йезида әмәлгә ашурулуватқан меһир-сахавәтлик ишлардин вақип қилди. Болупму шәһәрдә тирикчилик қилип, тапқан-тәргининиң мәлум қисмини киндик қени төкүлгән жутиға сәрип қиливатқан тиҗарәтчиләрниң исимлирини пәхирлиниш билән тилға алди. Йәрлик һакимийәтләр билән иш елип бериватқан Мукапатлар вә унванлар бойичә Қазақ жәмийәтлик бирләшмисиниң президенти челәклик тиҗарәтчиләрниң бу хилдики паалийитидин хәвәрдар екән. Шуңлашқа болса керәк, «авғанлар» өзлириниң мәйрими күнигә қаримай қуруқ қол кәлмәпту. Улар Билал Һошуровқа «Жәнібек Хан» орденини, Алимҗан Насировқа «Төле Би» орденини вә Абдуғопур Илахуновқа «Қабанбай батыр» орденини тапшурди. СҮРӘТТӘ: «Авғанлар» тиҗарәтчиләр билән хатирә сүрәткә чүшти.