• Җасарәт — мәңгүлүк
• 20 Ақпан, 2019

Әрлик – әвлатқа мирас

Гөһәрбүви ИСМАЙИЛҖАНОВА, « Уйғур авази» Бийил қазақстанлиқ бәйнәлмиләл-җәңчиләр кеңәш әскәрлириниң Авғанстан йеридин чиқирилғининиң 30 жиллиғини атаватиду. Мошуниңға мунасивәтлик Панфилов наһийәсидиму февраль ейиниң кириши биләнла нурғунлиған чарә-тәдбирләр өткүзүлди. Авған урушиға Яркәнт тәвәсидин 98 җәңчи қатнишип, уларниң сәккизи җәң мәйданида вапат болди. Йәнә он йәттиси җәң мәйданлирида алған җараһәтлириниң ақивитидин кейинки һәрхил жилларда һаят билән хошлашти. Авғанстан уруши қатнашчилириға беғишланған мәрасим Яркәнт шәһириниң мәркизидики Улуқ Вәтән уруши билән Авғанстанда қурван болғанлар хатирисигә орнитилған ядикарлиқларға наһийә рәһбәрлири билән сабиқ җәңчиләр тәрипидин гүлчәмбәрләр қоюштин башланди. Жиғилған көпчилик вапат болған җәңчи-бәйнәлмиләлчиләрни бир минутлуқ сүкүт сақлап әскә алди . Шуниңдин кейин мәрасим наһийәлик Мәдәнийәт өйидә «Авған зиминида от кәчкәнләр» мавзусидики мәрикилик кәчкә улашти. Мәдәнийәт өйи фейесиға Авғанстан йеридә бәйнәлмиләлчилик борчини өтап қайтқан жутдашлиримиз билән шу җәңләрдә вапат болған Ербосын Көнчибаев, Ярмәһәмәт Алиев, Евгений Куликов, Шыңғыс Сәтқалиевниң қәһриманлиғи һәққидә һекайә қилидиған стендлар қоюлупту. Тәнтәнә башлиништин авал көпчилик ҚҖ Қураллиқ Күчлириниң полковниги, авған урушиниң ветерани, исми ривайәткә айланған “Қара майор” Борис Керимбаевни хатириләп, сүкүт сақлиди. Панфилов наһийәси Мудапиә ишлири бойичә бөлүмниң башлиғи, подполковник Марат Тайболатов сөзгә чиқип, қазақстанлиқ бәйнәлмиләл-җәңчиләрниң қәһриманлиғиға тохталди. Панфилов наһийәси һакиминиң орунбасари Роза Мағрупова яркәнтлик җәңчиләрниң көрсәткән әрлиги вә қаза тапқан сәккиз оғланниң исминиң әбәдийләштүрүлүватқанлиғини тилға алди. Натиқ шундақла сәккиз ширғуран җәңчи билим алған мәктәпләрдә ядикарлиқ тахтилириниң орнитилғанлиғини тәкитләп, бир топ бәйнәлмиләл-җәңчиләргә Панфилов наһийәси һакиминиң пәхрий ярлиқлири билән тәшәккүрнамилирини тапшурди. Учришиш давамида «Чегаричилар қәлби», «Жаркент әуендері» ансамбльлириниң әзалири авған уруши мавзусиға йезилған нахшиларни көпчиликниң диққитигә һавалә қилди. Ахирида шәһәрдики «Атлантик» ресторанида вапат болған жутдашлар роһиға атап дуа-тилавәт қилинди. Панфилов наһийәси. Жумағази БЕЙСЕБЕК чүшәргән сүрәт.