• Спорт
• 20 Ақпан, 2019

Бишкектиму биринчиликни бәрмиди

Мәшүр САСИҚОВ, «Уйғур авази» Таэквандо бойичә қара бәлбағ егиси Мәһәмәтҗан Розиев (сүрәттә оңда) «FLY TAEKWONDO» спорт клубини тәшкил қилип, Талғир наһийәсиниң Бесағаш йезисида өсмүрләрни мәшиқләндүрүватқиниға икки жилға йеқин вақит болди. Дәсләп клубқа кәлгүчиләр анчә көп болмиған билән һазир бу йәрдә мәшиқлинип, «егиз пәллиләргә» қол йәткүзүватқанларниң сани күн санап өсүватмақта. Асасән 5 – 15 яшлар арилиғида өсмүрләр билән ишләватқан Мәһәмәтҗан Розиевниң шагиртлири дәсләпки күнләрдин башлапла шәһәрлик вә җумһурийәтлик мусабиқиләрдә ғалип чиқип, алдинқи орунлардин көрүнүшкә башлайду. Қол йәткүзгән утуқлиридин мәмнун болған у шагиртлири билән әнди хәлиқара мусабиқиләргә тәйярлиқлирини башлаветиду. Шуниң нәтиҗисидә өткән жилниң ахиридин бүгүнгә қәдәр, хошна Өзбәкстан вә Қирғиз Җумһурийитидә өткүзүлгән бирқатар турнирларға иштрак қилип қайтти. Муһими, клуб әзалири һәр икки сәпәрдин «қуруқ қол» кәлмиди. Мәсилән, мошу жилниң 9 – 11-февраль күнлири Бишкек шәһиридики турнирға қатнашқан 12 спортчиниң һәммиси І орунға сазавәр болди. Пәрзәнтлириниң бу ғәлибисидин беши көккә йәткән өсмүрләрниң ата-анилири билән бова-момилири уларни дағдуғилиқ күтүвалди. Мәһәмәтҗанниң ейтишичә, турнирға үч мәмликәттин җәми 400дин ошуқ спортчи қатнишипту. Һәрхил салмақ дәриҗилири бойичә күч синашқан мусабиқидә күчлүкләр билән тәҗрибиси азларму болған охшайду. Амма «FLY TAEKWONDO» спорт клубиниң әзалири кәскин күрәшләр давамида рәқиплирини асанла тиз пүктирип, муваппәқийәт қазанған. Болупму оғуллар арисидин ака-укилар Руслан, Әзиз, Рәхимҗан Әйсажановларниң кәспий маһарити қазиларни һәйран қалдурса, 7 яшлиқ Әзимҗан Талғатов һәқиқий талантини намайиш қилған. Әнди бу күрәш түрини кичигидин яқтуруп шуғуллинип келиватқан Дилинур Маркс болса, бу турнирда оғуллар һәм қизлар биләнму йәкму-йәккә чүшүп, һәр иккисидә ғалип аталди. Қизиқарлиғи, жуқурида исми аталған ака-ука Руслан вә Әзиз Әйсаҗановлар финалда учришиду. Лекин яш пәрқи анчә чоң әмәс қериндашлар бир-биригә қарши чиқишни мувапиқ көрмәйду. Нәтиҗидә «сулифа» ташлаш қарар қилинидудә, укиси акисини «йеңивалиду». Мана мошундақ қизиқарлиқ вақиәләргә толған сәпәрдин барлиқ спортчилар хошал қайтти. Һаятида дәсләпки қетим ата-анисидин айрилип, босуға атлиған өсмүрләр үчүн бу мусабиқиниң әһмийити алаһидә екәнлиги талашсиз. Буниңдин ташқири, сағлам һаят тәризи билән яшашқа үндәватқан мәшиқләндүргүчиниң тәләпчанлиғи шагиртлар бойида яхши хисләтләрни шәкилләндүрүпла қоймай, айрим ата-аниларға пәрзәнтлирини тәрбийиләшкә йеқиндин ярдәмгә келиватқанлиғи хошал боларлиқ иш. Бу тоғрисида Мәһәмәтҗанға миннәтдарлиғи чәксиз атиларниң мону бир гепи купайә болса керәк. «Телевизордики пайдиси йоқ мультфильмлар билән оғлумниң кари йоқ, планшет дегән нәрсидин тамамән жирақлашти. Қисқиси, биз аниси иккимиз сениңдин тағдәк рази. Ишлириң дайим утуқлуқ болсун». Һәқиқәтәнму балилирини әйнә шу зиянлиқ заманивий йеңи технологияләрдин қутулдуралмай аварә болуп жүргән 50тин ошуқ өсмүрниң ата-аниси пәрзәнтлириниң спортқа болған қизиқишини ашуруш йолини тапқан Мәһәмәтҗан Розиевқа миннәтдарлиғи чәксиз. Чүнки мәшиқләндүргүчисиниң бир сөзини икки қилишқа петиналмиған өсмүрләр пәйдин-пәй өйидиму өзлириниң интизамлиқлиғини намайиш қилмақта.