- Спорт
- 27 Ақпан, 2019
Устаз роһини хуш қилди
Мәшүр САСИҚОВ,
«Уйғур авази»
Өткән һәптидә Туздыбастав йезисидики 31 вә 13-мәктәптә җумһурийәтлик Уйғур этномәдәнийәт мәркизи Спорт комитетиниң рәиси Әкрәм Нурдуновниң тәшәббуси билән пешқәдәм устаз Рәхмәтҗан Давутовниң хатирисигә беғишланған волейболдин турнир болуп өтти. Униңға һәр икки мәктәп оқуғучилиридин вә муәллимләр коллективидин тәркип тапқан командилар қатнашти.
Турнир башлиништин илгири Туздыбастав йезисиниң баш жигитбеши Турғанҗан Вахияров, йезилиқ мәдәнийәт мәркизиниң рәиси Реһимҗан Мәсимов яш спортчиларға иллиқ тиләклирини ейтип утуқ тилисә, мәрһум Рәхмәтҗан Давутовниң кәсипдиши Зитнур Қазиев әслимилири билән бөлүшти. Андин мәрһумниң қериндиши Пәрһат Давутов сөзгә чиқип, акисини хатириләп, униң һөрмитигә мошундақ чарә-тәдбир уюштуруватқан инсанларға миннәтдарлиқ билдүрди һәм турнир иштракчилириға утуқ-муваппәқийәт тилиди.
Мәлумки, тәҗрибилик устаз Рәхмәтҗан Давутовниң күч чиқириши түпәйли спортниң мошу түри билән шуғулланғучилар сани көпийип, улар тез-арида тәвәдики күчлүк командилар сепидин орун алған еди. Ишәшлик ейтишқа болидуки, һазирму туздыбаставлиқ волейболчилар мәйли наһийә яки вилайәт даирисидә өтүватқан чоң-чоң мусабиқиләрдә дайим алдинқи орунлардин көрүнүп кәлмәктә. Әнди устазниң шагиртлириму униң изини бесип, яш әвлат вәкиллириниң сағлам һаят тәризи билән яшишиға түрткә болуватқанлиғи һәркимни хошал қилса керәк. Биз сөз қиливатқан турнирму әйнә шуниң ярқин ипадисидур.
Бир мәктәп бенасидики спорт залиға сиғмиған турнир қатнашқучилири икки яқта ойнап, ғалип чиққанлар 31-мәктәпкә жиғилдидә, һәл қилғучи оюн шу йәрдә өтти. 31-мәктәпниң муәллимләрниң биринчи командиси – І, иккинчи командиси – ІІ, оқуғучилар командиси ІІІ орунға сазавәр болди. Ғалип чиққан командилар һамийлар тәрипидин кубок вә Пәхрий ярлиқлар билән мукапатланди.
Мошу йәрдә һамийлар тоғрилиқ тохтилип өтүшни мувапиқ көрдуқ. Жуқурида тәкитлигинимиздәк, шагиртлиридин Шаһмурат Һашимов мәрһум устазиниң хатирисигә турнир өткүзүш тәкливини бәргәндә, пәрзәнтлири Қутпидин билән Бәхтияр Давутовлар уни қизғин қоллап-қувәтлиди. Демәк, уларниң бири устазиниң, йәнә бири атисиниң роһини хуш қилғанлиғи чоқум.
Талғир наһийәси.
152 рет
көрсетілді0
пікір