• 1-март – Миннәтдарлиқ күни
• 27 Ақпан, 2019

Мустәқил елим билән пәхирлинимән

Қазақстан көпмилләтлик дөләт. Униң қойнида 130дин ошуқ милләт вә еләт вәкиллири, худди бир аилиниң әзалиридәк, иҗил-инақ һаят кәчүрмәктә. Буниңда, әлвәттә, елимиз Президенти – Милләт Лидери Нурсултан Әбишоғли Назарбаевниң дана миллий сәяситиниң, җүмлидин униң рәһбәрлигидики Қазақстан хәлқи Ассамблеясиниң роли алаһидә. Әйнә шундақ бирлик-өмлүк, иттипақлиқ нәтиҗисидә Қазақ ели хәлиқара мәйданда зор муваппәқийәтләр қазанмақта. Дөләт тәрипидин яритиливатқан кәң мүмкинчиликләр түпәйли вәтинимизгә адил хизмәт қилип, аилимизни асрап, пәрзәнтлиримизни заман тәливигә хас тәрбийиләп, қатарға қошуватимиз. Елимиздә һәрқандақ адәмниң өз қабилийитигә қарап халиған мутәхәссисликни егилишигә яки қолидин келидиған иш билән шуғуллинишиға кәң имканийәт яритилған. Мениң тиҗарәтчилик саһасида паалийәт елип бериватқинимға узун жил болди. Бүгүнки күндә Қазақстанғила әмәс, бәлки униң сиртиғиму тонулған “Metall Prom Group” ширкитини башқуруп келиватимән. Мошу вақит җәриянида бизгә мустәқил Қазақстанниң тәрәққиятиға азирақ болсиму үлүшимизни қоштуқ һәм шу арқилиқ бирқатар утуқларға қол йәткүздуқ. Тапавитимизниң мәлум қисмини меһир-сахавәтлик ишларға сәрип қилип келиватимиз. Қазақстан хәлқи Ассамблеясиниң хәйрихаһлиқ лайиһилиригә турақлиқ қатнишип келиватимән. Өткән жиллар һәққидә ейтмиғанниң өзидә, бийилқи икки ай ичидила спортчиларни вә көпбалилиқ аниларни қоллап-қувәтләш мәхситидә 7 миллион 650 миң тәңгә мәбләғ аҗраттуқ. Биз бу хәйрихаһлиғимизни һәргиз миннәт қилмаймиз вә кәлгүсидиму давамлаштуридиған болимиз. Әнди шәхсий һаятимға мунасивәтлик хошаллиқлиримға тохталсам, көпжиллиқ әмгигим дөләт тәрипидин мунасип баһалинип, һәрхил жилларда Қазақстан Җумһурийитиниң Президенти Н.Ә. Назарбаев тәсис қилған “Жомарт жан” бәлгүсиниң саһиби вә «Алтын сапа» мукапитиниң «Іскер» номинацияси бойичә ғалиби аталдим. Шундақла «Алтын жүрек» хәйрихаһлиқ мукапити һәм «Лидер года – 2017» яшлар мукапити, «Құрметті машина жасаушы» бәлгүси, Англия Оксфорд университети тәсис қилған хәлиқара «Сократ» ордени вә бирқатар медальлар билән тәғдирләндим. Мән өзәмниң бағри кәң, меһри дәрия Қазақ елидә яшаватқанлиғим билән пәхирлинимән. Пурсәттин пайдилинип, бизниң җанпидалиқ билән әмгәк қилишимизға һәм хатирҗәм яшишимизға капаләтлик бериватқан дана рәһбиримиз Нурсултан Әбишоғли Назарбаевқа, шуниң билән биллә жүриги өзиниң даласидәк кәң қазақ хәлқигә чәксиз миннәтдарлиғимни билдүримән. Долқунтай АБДУХЕЛИЛ, “Metall Prom Group” ҖЧЙниң мудири, ҚХА вә «Нур Отан» партияси Сәясий кеңишиниң әзаси.