• Әхбаратлар еқими
• 06 Наурыз, 2019

«Ана тилим барда хәлқим нами өчмәйду»

Гөһәрбүви ИСМАЙИЛҖАНОВА, «Уйғур авази» Мошу мавзуда йеқинда Дехан Ғәйрәт оттура мәктивидә улуқ намәйәндилиримиз: Маһмут Қәшқәрийниң туғулғининиң –1010, Йүсүп Хас Һаҗипниң 1000 жиллиғиға беғишланған фестиваль болуп өтти. Уни Дехан Ғәйрәт оттура мәктивиниң мудири Айдос Турапбеков ачти. – Елимиз Президенти Нурсултан Назарбаевниң «Келәчәккә нишан: мәнивий йеңилиниш» мақалисида «Миллий әнъәнилиримиз, тилимиз билән музыкимиз, әдәбиятимиз, бир сөз билән ейтқанда, миллий роһимиз өзимиздә мәңгү қелиши керәк. Абайниң даналиғи билән Әвезовниң билими, Җамбулниң жырлири билән Қурманғазиниң күйлири әсирләрдин бизгә келиватқан әҗдатлиримизниң авази – улар бизниң мәдәнийитимизниң бир қисмила”, – дәп тәкитлиди. Бүгүн әйнә шундақ улуқ сималар Маһмут Қәшқәрий билән Йүсүп Хас Һаҗипниң йезип қалдуруп кәткән бай мирасини әвлаттин-әвлатқа йәткүзүп, уларниң исимлирини мәдһийиләш мәхситидә уюшутурулуватқан чарә-тәдбирниң тәрбийәвий әһмийити чоң, Әң алди билән Дехан Ғәйрәт йезисиниң турғунлириниң – қазақ билән уйғур хәлқиниң достлуғини, бирлигини тәкитлигүм келиду. Мәктивимиздә билим бериш икки тилда жүргүзүлиду. Қазақ вә уйғур милләтлириниң вәкиллири бир-бириниң тилида раван сөзләпла қалмай, урпи-адәт, рәсим-қаидисини яхши билип, һөрмәтләйду, – деди у өз сөзидә. Шуниңдин кейин пешқәдәм устаз, мошу йезида туғулуп өскән Реһимҗан Тохтахунов ана жутидики бу мәрасимниң әһмийити билән мәхситигә тохтилип, өзи билим алған жилларни вә бүгүнки маарип саһасидики өзгириш-йеңилиқларни селиштуруп, җүмлидин заманивий типтики йеңи 250 орунлуқ мәктәптә билим елиш үчүн яритиливатқан шәрт-шараитларға тохталди. Дехан Ғәйрәт йезилиқ Мәдәнийәт өйиниң мудири Тохтар Қанаев билән Яркәнт гуманитарлиқ-техникилиқ колледжиниң оқутқучиси Молутҗан Тохтахунов болса, келәчәк егилири болған бүгүнки өскиләң әвлатни билим елишқа чақирип, ақ йол тилиди. Шуниңдин кейин мәктәпниң уйғур тили вә әдәбияти пәнлирниң муәллими Ғәйрәт Исрайилов бүгүнки фестивальда шеирни ядқа ейтиш, өз иҗадидин шеир оқуш, эссе йезиш, сүрәт селиш вә нахша-уссулларни иҗра қилиш бойичә байқашларға қатнишиватқан оқуғучиларни новәт билән сәһнигә тәклип қилди. Шундақ қилип, шеирни ипадилик ядқа ейтиш бойичә 6-синип оқуғучиси Зульфийәм Һакимова, 10-синип оқуғучиси Мадинәм Тельманова ғалип чиқти. Әнди улуқ сималарға беғишлап өз иҗадидин шеир оқушта 11-синип оқуғучиси Әквәрҗан Мәһәммәтов билән 10-синип оқуғучиси Һакимҗан Һакимов, рәсим сизиш бойичә Саһинур Шавдунованиң әсәрлири утуқлуқ чиққан дәп тепилди. Эссе йезиш номинацияси бойичә Тахмина Қәмбәрова билән Разийәм Турғанованиң әмгиги жуқури баһаланди. Новәт нахша-уссулға кәлгәндә йеза балилириниң талантиға қайил болдуқ. Кичиккинә бу жутта нахша-уссул иҗра қилишта бәс-бәскә чүшкәнләрни баһалаш адил қазиларға оңайға чүшмиди. Шундақ қилип, бу номинация бойичә әң маһир икки нахшичи – Тәләт Шавдунов билән Шахсәнәм Кебирова ғалип чиқти. Уссул сәнъити бойичә Надирәм Темирова һәммигә үлгә болди. Ахирида узун жиллар мәзкүр мәктәптә башланғуч синип муәллими болуп ишләп, һазир һөрмәтлик дәм елишта жүргән Җаһангүл Һашимова, ата-анилар намидин фельдшер Гүлинур Қәмбәрова вә башқилар мәктәп мәмурийитигә, фестивальни уюштурғучи мәктәп мудириниң тәлим-тәрбийә ишлири бойичә орунбасари Гүлназ Абитоваға, уйғур тили вә әдәбияти пәнлириниң муәллими Ғәйрәт Исрайиловқа миннәтдарлиғини изһар қилишти. Панфилов наһийәси. Сүрәттә: фестиваль ғалиплири.