• Әхбаратлар еқими
• 13 Наурыз, 2019

Кеңәшмә иҗтимаий сәясәткә беғишланди

Астанада Дөләт рәһбири Нурсултан Назарбаевниң рәислигидә иҗтимаий сәясәтни әмәлгә ашуруш мәсилилири бойичә кеңәшмә болуп өтти. Кеңәшмә ишиға Премьер-министр Асқар Мамин, Президент Мәмурийитиниң рәһбири Әсет Исекешев вә Премьер-министрниң орунбасари Гүлшара Әбдиқалықова қатнашти. Нурсултан Назарбаев кеңәшмини ечип, қазақстанлиқларниң паравәнлигини ашурушқа вә турмуш сүпитини яхшилашқа қаритилған чариләрни сүпәтлик әмәлгә ашурушниң муһим екәнлигини атап көрсәтти. – Йеқинда болуп өткән “Nur Otan” партиясиниң қурултийида биз аһалини иҗтимаий қоллап-қувәтләш чарилирини муһакимә қилдуқ. Мән аһалиниң һал-оқити төвән вә иҗтимаий җәһәттин аҗиз қатламлирини қоллап-қувәтләш бойичә йеңи миқияслиқ чариләрни тәклип қилдим. Бүгүн биз уларни әмәлгә ашуруш бойичә иш-һәрикәт планлирини тәпсилий қарап чиқимиз. Кеңәшмә давамида Дөләт рәһбиригә Һөкүмәтниң қоюлған вәзипиләрни орунлаш, җүмлидин иҗтимаий сәясәтниң әмәлгә ашурулушини қануний җәһәттин тәминләш бойичә иш плани тоғрилиқ әхбарат берилди. Нурсултан Назарбаев кеңәшмигә қатнашқучиларниң докладлирини тиңшап, аһалиниң алаһидә муһтаҗ болуватқан барлиқ қатламлирини иҗтимаий қоллап-қувәтләш чарилирини көрүшниң зөрүр екәнлигини тәкитлиди. – Иҗтимаий җәһәттин аҗизларни қоллап-қувәтләшкә бөлүнгән мәбләғниң селиқ төләмлири һесавиға қелиплишидиғанлиғини чүшиниш муһим. Шуңлашқа дөләтниң тегишлик тәңпуңлуққа әмәл қилған һалда, һәрдайим алаһидә муһтаҗ болуватқанларни қоллап-қувәтләйдиғанлиғини һәммисигә чүшәндүрүш керәк. Дөләт рәһбири йеқинқи вақиттила иҗтимаий җәһәттин аҗиз вә көпбалилиқ аилиләрниң дөләтниң ғәмхорлуғини һис қилиши керәклигини тәкитлиди. – Алаһидә муһтаҗ болуватқан һал-оқити төвән гражданлар, көпбалилиқ аилиләр бийил 1-апрельдин тартипла иҗтимаий ярдәмни кечиктүрмәй елиши керәк, – деди Нурсултан Назарбаев. Қазақстан Президенти дөләт органлири рәһбәрлириниң вә вилайәтләр һакимлириниң ишини баһалашниң гражданлар паравәнлигиниң дәриҗисигә вә турмуш сүпитигә уттур бағлиқ екәнлигини атап көрсәтти. Дөләт рәһбири регионларда иш һәққини ашуруш, билим бериш вә саламәтликни сақлаш саһалирида системилиқ ислаһатларни әмәлгә ашуруш, турушлуқ өй вә йезиларара йоллар қурулушиниң сүръитини көпәйтиш вә турушлуқ өй-коммунал егилиги һәм экология саһалиридики проблемиларни һәл қилиш бойичә чариләрниң өз вақтида көрүлүшиниң муһим екәнлигини алаһидә тәкитлиди. Униңдин ташқири “Құтты мекен” вә “Ауыл – Ел бесігі” лайиһилирини ишләп чиқиш һәм әмәлгә ашурушқа җиддий диққәт бөлүнди. – Вилайәтләр, Астана, Алмута вә Чимкәнт шәһәрлириниң һакимлири регионлар турғунлириниң муһим мәсилилирини шәхсән назарәт қилиши вә қоюлған вәзипиләрни әмәлгә ашуруш бойичә ениқ чариләрни көрүши керәк. Униңдин ташқири иҗтимаий сәясәтни әмәлгә ашурушқа бөлүнгән мәбләғниң нәтиҗидарлиқ пайдилинилишини назарәт қилишни тәминләшму муһим йөнилиш болуп һесаплиниду, – деди Нурсултан Назарбаев. Дөләт рәһбири шундақла ихтисадий сәясәтниң нәтиҗидарлиғини ашурушниң вә аһалиниң мошу җәриянға паал қатнишишиниң зөрүр екәнлигини атап көрсәтти. – Биринчи новәттә, адәмләрни иш билән тәминләш керәк. Дөләт аппаратиниң вәзиписи – күч-қувәтни кичик вә оттура тиҗарәтни тәрәққий әткүзүшкә, иш орунлирини вуҗутқа кәлтүрүшкә қаритиш. Бу ишни һәммә йәрдә, барлиқ шәһәрләрдә, наһийәләрдә вә йезиларда жүргүзүш керәк, – деди Дөләт рәһбири. Қазақстан Президенти кеңәшмә ахирида Президент Мәмурийитигә “Nur Otan” партияси билән бирликтә қоюлған вәзипиләрниң орунлиниши үстидин турақлиқ назарәтни әмәлгә ашурушни тапшурди. – Һөкүмәт, һакимлар, җамаәтчилик, “Nur Otan” партияси һәқиқий нәтиҗиләрни қолға кәлтүрүш үчүн мошу ишқа қошулуши керәк. Бу җәриянни шәхсән өзәм назарәт қилимән, – дәп хуласилиди Нурсултан Назарбаев.