• Әхбаратлар еқими
• 13 Наурыз, 2019

Илмий-экспертлиқ кеңәшниң иши муһакимә қилинди

Өткән һәптидә Қазақстан хәлқи Ассамблеяси Рәисиниң орунбасари – ҚХА кативатиниң рәһбири Жансейит Түймебаевниң қатнишиши билән ҚХА илмий-экспертлиқ кеңишиниң мәҗлиси өтти. Ассамблеяниң йетәкчи илмий институтлири вә кафедрилириниң рәһбәрлири, милләтләрара мунасивәтләр саһасидики экспертлар кеңәшниң мошу вақитқичә әмәлгә ашурған ишлирини вә 2019-жилға беғишланған муһим лайиһиләрни муһакимә қилди. “Бийил илмий-экспертлиқ кеңәшниң қурулғиниға 10 жил толиду. Биллә ишләватқан алимлар вә экспертларни, кеңәш әзалирини мошу мәйрәм билән тәбрикләймән. Биз җәмийәттики һәрдайим өзгирип туридиған мәсилиләргә мунасивәтлик ишлиримизни давамлаштуримиз. Дөләт рәһбири милләтләрара мунасивәтләргә алаһидә көңүл бөлиду. Униңдин ташқири регионларниң паалийәтчанлиғини ашуруш, иҗтимаий-ихтисадий мәсилиләрму диққәт нәзәримиздә болиду”, деди мәҗлисни ачқан Жансейит Түймебаев. Мәҗлистә доклад билән сөзгә чиққан кеңәш рәиси Айгүл Сәдуақасова кеңәшниң паалийити билән планлириға тохталди. Униң тәкитлишичә, бирнәччә йөнилиш бойичә ишләйдиған вә Дөләт рәһбириниң тапшурмиси билән қурулған кеңәш тәркивидә 52 алим, униң ичидә 31 пән доктори, 12 пән намзити, тәтқиқат институтлириниң рәһбәрлири һәм җәмийәт әрбаплири бар. “Кеңәш разимәнлик вә умуммиллий бирлик саһасида қобул қилинидиған қарарларни экспертиза билән тәминләш, уларниң әһвалини, қелиплишиватқан җәриянларни чоңқур тәһлил қилиш, уни тәрәққий әткүзүшниң илимға асасланған һалда тәхминләрниң концепциясини тәйярлаш бойичә вәзипиләрни орунлайду”, деди докладчи. ҚХА кафедрилири бирләшмисиниң рәиси, профессор Анатолий Башмаков кафедрилар паалийити тоғрилиқ ейтип бәрди. Л.Гумилев намидики Евразия миллий университетида ҚХА кафедрисиниң рәһбири болуп ишләйдиған Анатолий Башмаков мәзкүр алий оқуш орнидики барлиқ кафедраларда Президентниң тәшәббуслириға мувапиқ “Мәңгілік ел”, “Рухани жаңғыру” курслириниң, лекция вә семинарларниң өткүзүлүватқанлиғини ейтти. “Бу бирләшминиң асасий мәхсити билим бериш. Иккинчи вәзиписи – сәясий. Бу йөнилиштә чәт әлләрдин келидиған мутәхәссисләр билән тәҗрибә алмаштуруш мәхситидә хәлиқара конференцияләр вә әмәлий ишлар уюштурулиду. Үчинчи — илмий йөнилиштә милләтләр тәркивини ениқлаш бойичә тәтқиқатлар жүргүзүлди. Мәсилән, елимиздә 40 миңдин ошуқ поляк бар. Демәк, мошу санға мунасивәтлик ишлар әмәлгә ашурулиду” деди Анатолий Башмаков. Миллий ихтисат министрилигиниң “Ихтисадий тәтқиқатлар институти” акционерлиқ җәмийити башқарма рәисиниң орунбасари Шахарбану Жақыпова институт даирисидә әмәлгә ашурулған ишлар тоғрилиқ ейтип бәрди. Ихтисадий тәтқиқат институтиниң асасий йөнилишиниң хәлиқниң демографиялик әһвалини һәртәрәплимә тәһлил қилишқа беғишлиғанлиғини тәкитлиди. Мутәхәссисниң ейтишичә, хәлиқниң узақ муддәтлик демографиялик әһвалға тәхмин тәйярланди. Бу тәхмин демографияни тәрәққий әткүзүшкә беғишланған мәхсәт-вәзипиләрни ениқлашқа тәсир қилиду. Евразия миллий университетиниң профессори Наталья Калашникова кеңәшниң муһим лайиһилирини тонуштуриду. Униң ичидә он жилдин бери әмәлгә ашурулуп келиватқан “Тарихи тағылым – өткенге тағзым” намлиқ лайиһисини алаһидә тәкитлиди. Ассамблея тәшәббуси билән қолға елинған хәлиқара лайиһә 1920-жиллири тәқипкә учриғанлар вә чәт әлләргә көчүп кәткәнләргә әвлатлирини издәштүрүватқан алимлар вә чәтәллик экспертлар билән учраштуруп, тарихни чоңқур үгинип, әҗдатларниң изини тепишқа имканийәт бериду. Муһакимини хуласилигән Жансейит Түймебаев кеңәшниң 2019-жилға бәлгүләнгән чарә-тәдбирлириниң тизимини тәйярлашни тапшуруп, кеңәш әзалирини милләтләрара разимәнлик вә умуммиллий бирлик моделини илгирилитиштә, хәлиққә милләтләрара мунасивәтләр саһасидики тәтқиқатларниң нәтиҗилири тоғрилиқ мәлуматлар бериштә палийәтчан болушқа чақирди.