• Әхбаратлар еқими
• 19 Наурыз, 2019

Кәң миқияслиқ нишанлиниду

Насирахун РОЗАХУНОВ, “Уйғур авази” Батурларниң жүрүши, Норуз ривайәтлири, фигурилиқ тейилғучиларниң уссуллири вә мотокроссчиларниң көрситишлири – буларниң барлиғи Алмутида нишанлинидиған Норуз мәйриминиң программисиға киргән. 20-март күни саат 18.00да Алатав әнъәнивий сәнъәт театрида әң надир әсәрләр сәһнидә намайиш қилиниду. Беваситә Норузға бағлиқ көңүл ечиш чарилири 21-март күни әтигәнлиги саат 10да “Норуз жүрүшлиридин” башлиниду. Ривайәтләр, чөчәкләр, әпсанилар қәһриманлириниң кийимлирини кийгән икки миңға йеқин адәм Алмута шәһириниң мәркизий кочилири арқилиқ жүрүп, һәрикитини Абай намидики дөләт академиялик опера вә балет театриниң алдида йәкүнләйду. 21-22-март күнлири җәнубий пайтәхттә Әзәрбәйҗан, Россия, Түркия, Эстония, Испания, Бүйүк Британия, Германия вә Япониядин кәлгән тарихчилар, мәдәнийәтшунаслар, җәмийәт һәм мәдәнийәт әрбаплириниң қатнишиши билән “Норуз Азия мәркизидә” намлиқ хәлиқара әнҗуман өтиду. Шундақла Ихлас намидики миллий саз әсваплири мирасгаһида Норуз мәйриминиң тарихиға беғишланған “дүгләк үстәл” уюштурулиду. Шуни қошумчә қилимизки, бәш күн дәм елиш давамида шәһәр турғунлири барлиқ наһийәләрдә өтидиған түрлүк көңүл ечиш чарилиригә иштрак қилип, миллий таамларға еғиз тегәләйду.