• Һасан-һүсән
• 19 Наурыз, 2019

Оқуғучилиримиз билән пәхирлинимиз

Жилдиқи әнъәнә бойичә, йеқинда әл-Фараби намидики Қазақ миллий университетида «Дарын» җумһурийәтлик илмий-тәҗрибә мәркизиниң уюштуруши билән Ө.Жолдасбеков намидики ІХ хәлиқара илмий-лайиһиләр конкурси болуп өтти. Униңға бийил Қазақстандин 156, Қирғизстандин 12 вә Таҗикстандин 18 оқуғучи қатнашти. Оқуғучиларниң илим-пәнгә болған иштияқини ойғитиш, болупму уларниң математикиға дегән қизиқишини ашуруш мәхситидә өтүватқан бу мусабиқиниң бериватқан пайдиси билән аброй-инавитиниң өсүватқанлиғиниң гувачиси болуватимиз. Хошал қиларлиғи, ана тилимизда билим еливатқан қаракөзлиримиз арисидиму әйнә шу конкурста ғалип чиқип, утуқ қазиниватқанлар йетәрлик. Мәсилән, биз сөз қиливатқан бийилқи мусабиқигә Мурат Һәмраев намидики 150-уйғур оттура мәктивиниң 11-синип оқуғучиси Шахноза Иминова (сүрәттә)қатнишип, мәхсус диплом вә сертификат билән тәғдирләнди. Шахноза ушбу конкурста «пәнләр падишаси» – математика бойичә илмий лайиһисини утуқлуқ қоғдап, қазиларни қайил қилди. Бу йәрдә униң илмий рәһбири, математика пәниниң муәллими Ләйлихан Әлаеваниң әмгигиниму баһалаш орунлуқ. Чүнки у яқниң миннәтсиз меһнити түпәйли Шахноза көплигән мусабиқиләрдә дайим алдинқи орунлардин көрүнүп келиватиду. Мәктивимизниң шәнини қоғдап, бешимизни көкләргә йәткүзгән шагиртимиз билән һәқлиқ рәвиштә пәхирләнгәч, униңға келәчәктә техиму егиз чоққилардин көрүнүшигә тиләкдашлиқ билдүримиз. Гулмира ТОХТАХУНОВА, Алмута шәһири М.Һәмраев намидики 150-уйғур оттура мәктивиниң мудири.