• Көргәзмә
• 19 Наурыз, 2019

Әндики мәхсәт – Лондонда көргәзмә өткүзүш

Йеқинда Қирғизстанниң Бишкек шәһиридә «Чиңғиз Айтматов әсәрлириниң асасида» намлиқ хәлиқара көргәзмә өтти. Униңға Россия, Қирғизстан, Бүйүк Британия вә Қазақстандин тонулған рәссамлар қатнашти. Уйғур рәссамлиридин Қазақстанниң хизмәт көрсәткән әрбаби, талантлиқ рәссам Әхмәтҗан Әһәтбақиев иштрак қилди. Шу мунасивәт билән рәссам билән сөһбәтләшкән едуқ. У төвәндикиләрни ейтип бәрди. – Мәзкүр хәлиқара көргәзмә Евразия иҗадий гильдияси тәрипидин уюштурулди. Бу гильдияниң штаб-квартириси Лондон шәһиригә орунлашқан. Тәшкилат мудириниң орунбасари Марат Ахметжанов әсли қирғизстанлиқ екән. Он жилдин ошуқ вақит Лондонда туруветипту. Маратниң ейтишичә, гильдияниң мәхсити дуниядики иҗадийәт адәмлирини, йәни рәссамларни, шаир-язғучиларни бирләштүрүш, әмгәклирини дунияға тонуштуруш, көргәзмиләрни уюштуруш, китапларни чиқириш. Шәхсән өзәм Марат билән Фейсбук арқилиқ тонуштум. Әсәрлиримни Интернет арқилиқ әвәтип бәрдим. Өткән жили болса, гильдияға әза болдум. Бишкекта өткән көргәзмә Евразия иҗадий гильдиясиниң дәсләпки қетим уюштуруватқан көргәзмиси. Мәлумки, өткән жили улуқ язғучи Чиңғиз Айтматовниң 90 жиллиғи кәң нишанланди. Чиңғиз Айтматов – сабиқ Кеңәш Иттипақи җумһурийәтлиридинла әмәс, бәлки дуния әдәбиятиниң тәрәққиятиға тәсир қилған иҗаткар. Әсәрлири өзиниң актуаллиғи, һаятийлиғи билән мошу кәмгичә аммибап. Шуңлашқа Евразия иҗадий гильдияси рәссамларға улуқ язғучиниң әсәрлири асасида селинған әмгәклирини тәвсийә қилишни өтүнди. Умумән, көргәзмигә төрт дөләттин жигирмә икки рәссам қатнашти. Мән үч әсәримни қойдум. Мәзкүр көргәзминиң йәнә бир алаһидилиги, униңға кәспий рәссамлардин ташқири иҗатқа қәдәм ташлиған рәссамларниң әмгәклири қоюлди. Демәк, яш иҗаткарлар үчүн тәҗрибә алмаштурушқа имканийәт пәйда болди. Көргәзмә Г.Айтиев намидики Қирғизстан миллий тәсвирий сәнъәт мирасгаһида өтти. Көргәзмә даирисидә Бишкектики сәнъәт институтиниң студентлири билән учришишлар, маһарәт-синиплири өткүзүлди. Хошал қилғини, яшларниң иҗадийәткә болған қизиқиши наһайити жуқури екән. Шәхсән өзәмниң иҗадий паалийитимгә кәлсәм, булту Парижда сәяһәттә болдум. Луврни, Пабло Пикассо вә башқиму улуқ рәссамлар иҗат қилған җайларни, мирасгаһларни зиярәт қилиш бәхтигә муйәссәр болдум. Шу җайларни көргәндин кейин йеңичә илһамлинип, иҗат қилишқа башлидим. Марат Ахметжанов Лондонда шәхсий көргәзмәмни өткүзүш тәкливини бәрди. Әндики мәхситим – Лондонда көргәзмә өткүзүш. Һазир шуниң тәйярлиғини башлавәттим. Йезивалған Йолдаш МОЛОТОВ.