• Әхбаратлар еқими
• 19 Наурыз, 2019

«Уйғурлардин үлгә елиш керәк»

Мәшүр САСИҚОВ, «Уйғур авази» Өткән һәптидә Алмута шәһиридики «Достлуқ өйидә» Қазақстан хәлқи Ассамблеяси Рәисиниң орунбасари – ҚХА Кативатиниң рәһбири Жансейит Түймебаев этномәдәнийәт мәркәзлириниң рәһбәрлири билән учрашти. Мәзкүр баш қошушта асасән ҚХАниң 2019-жилдики иш-планлири вә вәзипилири тоғрилиқ сөз болуп, у этномәдәнийәт мәркәзлириниң паалийитини техиму җанландуруш лазимлиғини ейтти. Шундақла пат-арида өтидиған Ассамблея сессиясигә тәйярлиқ көрүш билән биллә Президент тапшурмилирини әмәлгә ашуруш, болупму «Келәчәккә нишан: мәнивий йеңилиниш» программисиға алаһидә диққәт бөлүш – күн тәртивидики асасий мәсилиләрниң бири болди. Жансейит Қансейитулы өз сөзидә «Ассамблея тоғрилиқ Қанунға» киргүзүлгән өзгиришләргә бенаән, этномәдәнийәт мәркәзлирини җәмийәтлик аккредитациядин өткүзүш мәсилисигиму тохталди. Натиқ этномәдәнийәт мәркәзлириниң өзлириниң җәмийәтлик ролини атқуруп, Қазақстан хәлқиниң бирлиги билән инақлиғини сақлашқа молҗаланған күчлүк институт екәнлигини қәйт қилғач, җумһурийәтлик Уйғур этномәдәнийәт мәркизиниң тәшәббускарлиғи билән паалийәтчанлиғини алаһидә тилға алди. Андин кейин сөз новитини алған ҖУЭМ рәиси, Қазақстан Парламенти Мәҗлисиниң депутати, ҚХА Кеңишиниң әзаси Шаһимәрдан Нурумов Жансейит Түймебаевни йеңи лавазимға тайинлиниши билән тәбрикләп, өзи рәһбәрлик қиливатқан җәмийәтлик тәшкилатниң паалийити һәққидә қисқичә әхбарат бәрди. – Һөрмәтлик Жансейит Қансейитулы! Сизниң тәҗрибилик рәһбәр екәнлигиңиздин һәммимиз яхши хәвәрдар. Шуңлашқа бу лавазимдиму утуқ қазинидиғанлиғиңизға ишәнчимиз камил. Әнди бая сиз өз докладиңизда қазақстанлиқ уйғурлар намиға ейтқан иллиқ ләвзиңиз үчүн чәксиз миннәтдарлиғимни билдүримән, – дәп сөзини башлиди Шаһимәрдан Үсәйиноғли. – Әнди җумһурийәтлик Уйғур этномәдәнийәт мәркизиниң ишиға тохталсам, униң тәркивидә ондин ошуқ кеңәш паалийәт елип бариду. Дөләт рәһбири дайим тәкитлигинидәк, Қазақстанниң әң чоң байлиғи — нефть билән газ әмәс, бәлки милләтләрара разимәнлик, өзара иттипақлиқ һесаплиниду. Шуңлашқа җумһурийәтлик Уйғур этномәдәнийәт мәркизи вәтинимиздики течлиқ билән паравәнликни, хәлиқләр достлуғи билән миллий разимәнликни мустәһкәмләш йолида тилға аларлиқ ишларни әмәлгә ашуруватиду. Дөләт рәһбири Н.Ә.Назарбаевниң дана миллий сәясити түпәйли тилимизни, урпи-адәтлиримизни сақлашқа, тарихимизни үгинишимизгә кәң имканийәт яритилған. Мәркизимиз әйнә шу мүмкинчиликләрдин үнүмлүк пайдилинип, қизғин паалийәт елип бармақта. Алаһидә пәхирлиниш илкидә тилға алидиған йәнә бир нәрсә, миллитидин, динидин қәтъий нәзәр, муһтаҗ инсанларға қол учимизни сунушни әнъәнигә айландурдуқ. Умумән, хәйрихаһлиқ ишларғиму йетәрлик дәриҗидә көңүл бөлүп келиватимиз. Учришиш давамида «Мицва» Қазақстан еврейлири ассоциациясиниң рәиси Александр Барон, «Қазақстан әзәрбәйҗанлири» җәмийәтлик бирләшмисиниң рәиси Абилфас Хамедов, Белорусь этномәдәнийәт мәркизиниң рәиси Леонид Питаленко вә башқилар сөзгә чиқип, этномәдәнийәт мәркәзлириниң паалийити тоғрилиқ әхбарат бәрди. Улар өз сөзидә қериндаш қазақ хәлқигә, шәхсән елимиз Президенти Нурсултан Назарбаевқа чәксиз миннәтдарлиғини изһар қилип, Дөләт рәһбириниң алға сүргән барлиқ тапшурмилирини орунлашқа бар күч-ғәйритини сәрип қилидиғанлиғини ейтти.