• Әхбаратлар еқими
• 19 Наурыз, 2019

Һәмкарлиқ сүръәтлик тәрәққий етиватиду

Өткән чаршәнбә күни Президент Нурсултан Назарбаев Бирләшкән Әрәп Әмирликлиридә иш бабидики сәпәрдә болди. Дөләт рәһбири сәпәр даирисидә Абу-Дабиниң мирасхор шаһзадиси, Бирләшкән Әрәп Әмирликлири Қураллиқ күчлири Алий Баш қоманданиниң орунбасари шейх Мухаммед бен Зайид Әл Наһаян билән учрашти. Қазақстан Президенти Мухаммед бен Зайид Әл Наһаянға сәмимий қобул қилғанлиғи үчүн миннәтдарлиқ билдүрди вә Дуниявий Мәхсус Олимпиада оюнлириниң Йеқин Шәриқ әллириниң ичидә Бирләшкән Әрәп Әмирликлиридә дәсләпки қетим өтүватқанлиғини тәкитлиди. – Мошу муһим спорт вақиәси мүмкинчилиги чәкләнгән спортчиларға өзлириниң күчлүк роһини вә ғалибийәткә болған күч-җигәрини пүткүл дунияға намайиш қилиш имканийитини бериду. Мусабиқиләргә Қазақстан командисиму қатнишиду. Силәрниң мәмликитиңларниң рәһбәрлири Қазақстан өткүзүватқан барлиқ хәлиқара чарә-тәдбирләргә дайим иштрак қилип келиватиду. Шуңлашқа силәрни достанә қоллап-қувәтләш мәхситидә Оюнларниң тәнтәнилик ечилиш мәрасимиға қатнишишқа кәлдим, – деди Нурсултан Назарбаев. Қазақстан Президенти өткән жилниң икки мәмликәт оттурисидики өзара һәмкарлиқни күчәйтиш үчүн үнүмлүк болғанлиғини тәкитлиди. – Бизниң пат-пат өткүзүлгән учришишлиримиз вә қериндашлиққа һәм ишәнчигә асасланған қоюқ мунасивәтләр барлиқ саһаларни һәртәрәплимә тәрәққий әткүзүшкә сүръәт бериватиду. Өткән жили биз өзара сәпәрләрдә болуп, муһим келишимләргә кәлдуқ. Уларниң әмәлгә ашурулушиниң кетип бериши чоңқур қанаәт һасил қиливатиду, – деди Дөләт рәһбири. Өз новитидә мирасхор шаһзадә Мухаммед бен Зайид Әл Наһаян Нурсултан Назарбаевқа Бирләшкән Әрәп Әмирликлирини зиярәт қилиш тәкливини қобул қилғанлиғи үчүн миннәтдарлиқ билдүрди вә Қазақстанниң конфессияләрара разимәнликни қолға кәлтүрүш вә пүткүл дунияда диалог орнитиш йолидики ролиға алаһидә тохтилип өтти. – Бийил биз мәмликитимизниң асасини салған шәхсниң 100 жиллиғини тәнтәнилик нишанлидуқ. Сиз шейх Зайидни 25 жилдин ошуқ вақиттин буян билисиз. У Сизни наһайити һөрмәтләтти вә дуниявий дәриҗидики рәһбәр сүпитидә етирап қилатти. Сизниң үлгиңиз бизни илһамландуруп, 2019-жилни төзүмлүк жили дәп елан қилдуқ. Униң даирисидә Әмирликләр көпмилләтлик, мәдәнийәтләрара вә динларара мәркәзгә айлинишни мәхсәт қилиду. Әйнә шуниңға бағлиқ бийил февраль ейида Рим Паписи Францискниң Бирләшкән Әрәп Әмирликлиригә тарихий сәпири әмәлгә ашурулди, – деди Мухаммед бен Зайид Әл Наһаян. Униңдин ташқири учришиш давамида тәрәпләр хәлиқара күн тәртивиниң муһим мәсилилирини, туризм, рәқәмләштүрүш, космос, транспорт, логистика вә йеза егилиги саһалиридики өзара һәрикәтниң түрлүк йөнилишлирини муһакимә қилди. Шундақла өзара ихтисадий һәмкарлиқни җанландуруш, инвестицияләрни җәлип қилиш вә Бирләшкән Әрәп Әмирликлириниң базириға Қазақстан товарлирини чиқириш мәхситидә Һөкүмәтләрара комиссияниң һәм Ишчанлиқ кеңишиниң иқтидарини пайдилинишни кәңәйтиш мәсилилири қаралди. Шу күни Дөләт рәһбири Бирләшкән Әрәп Әмирликлириниң асасий диққәткә сазавәр җайлириниң бири – шейх Зайид мечитини зиярәт қилип, мошу мәмликәтниң асасини салғучи вә тунҗа президенти шейх Зайид бен Султан Әл Наһаянниң роһиға тазим қилди. Нурсултан Назарбаев шундақла мечит бенасиниң мемарчилиқ алаһидилиги билән тонушти, Пәхрий меһманлар китавиға хатирә әсләтмә йезип қалдурди. Мечитқа бир вақитта 50 миң адәм патиду. Мечит бенасиниң булуңлириға егизлиги 107 метр болған 4 мунарә орнитилған. Баш имарәтниң сиртқи қәвитини ақ мәрмәр билән зенәтләнгән 82 гүмбәз йепип туриду. Мечитниң ички һойлиси 17 400 квадрат метрни тәшкил қилиду. Нурсултан Назарбаев Бирләшкән Әрәп Әмирликлиригә қилған иш бабидики сәпири давамида Zayed Sports City стадионида өткүзүлгән Дуниявий Мәхсус Олимпиада оюнлириниң тәнтәнилик ечилиш мәрасимиға қатнашти. Шуни қошумчә қилимизки, мәзкүр оюнларға 170тин ошуқ дөләттин 7,5 миңдин ошуқ спортчи қатнишиватиду. Оюнлар тәнтәнилик ечилиш мәрасимидин кейин башлинип, 21-мартта аяқлишиду. Абу-Дабидики Мәхсус Олимпиада программисиға 24 спорт түри киргүзүлди. Мәлумки, Мәхсус Олимпиада — бу әқлий тәрәққияти кам атлетлар қатнишидиған спорт мусабиқилири. Мошу алаһидә оюнларниң тарихи буниңдин йерим әсирдин ошуқ вақит илгири башлинип, дәсләпки қетим 1968-жили АҚШта өткүзүлгән еди. Әйнә шу жили Оюнларниң өткүзүлүшини уюштуридиған Special Olympics тәшкилати қурулиду. Мәхсус оюнларға Қазақстан талланма командиси 15-қетим қатнишиватиду. Абу-Дабида бизниң мәмликитимизгә 67 спортчи вакаләтлик қилип, улар үстәл тенниси, теннис, дзюдо, суда үзүш, пауэрлифтинг, йеник атлетика, волейбол, баскетбол, мини-футбол, гольф, бочче, гимнастика, боулинг, роликта жүгрәш, бадминтон охшаш спортниң 15 түри бойичә мусабиқиләрдә күч синишиду.