• Әхбаратлар еқими
  • 27 Наурыз, 2019

Пайтәхт – Елбасыниң әмәлгә ашқан идеяси

Қазақстан хәлқи Ассамблеясиниң мәҗлиси өткүзүлүп, униңда пайтәхтниң “Нур-Султан шәһири” дәп өзгәртилиши қоллап-қувәтләнди вә тегишлик мураҗиәт қобул қилинди. Қазақстан хәлқи Ассамблеяси Рәисиниң орунбасари – Қазақстан Җумһурийити Президентиниң Мәмурийити ҚХА Кативатиниң мудири Жансейит Түймебаев жүргүзгән жиғинға ҚХА этномәдәнийәт бирләшмилириниң, Илмий-экспертлиқ кеңишиниң вә Кафедрилар ассоциациясиниң, анилар кеңәшлириниң, җәмийәтлик разимәнлик кеңәшлириниң, “Жаңғыру жолы” яшлар һәрикитиниң вәкиллири қатнашти. – Бу күнләрдә биз йеңи жилниң беши вә йеңилаш мәйрими болған Норузни нишанлаватимиз, бу қетимқи Норуз Қазақстанға чоң өзгиришләр билән кәлди. Қазақстанлиқлар тарихий өзгиришләрниң шаһиди болди. Бүгүн биз, ҚХА әзалири, пайтәхткә Қазақстанниң Тунҗа Президенти исминиң берилишини қоллап-қувәтләшкә аваз бериш үчүн кәлдуқ, – дәп тәкитлиди Жансейит Түймебаев мәҗлисни ечип. ҚХА Рәисиниң орунбасари өз сөзидә шәһәргә “Нур-Султан” наминиң берилишиниң мустәқил Қазақстанниң асасини салғучи Тунҗа Президентниң улуқ ролини, шундақла Елбасыниң мәмликәт тәрәққиятиға җошқунлуқ бәргән йеңи пайтәхтни вуҗутқа кәлтүрүштики алаһидә хизмәтлирини етирап қилиш болуп һесаплинидиғанлиғини тәкитлиди. – Нурсултан Назарбаевниң тарихий хизмәтлири Улуқ дала елиниң кейинки барлиқ әвлатлири үчүн үлгә болуши керәк, – дәп тәкитлиди у. – Тунҗа Президент паалийити – бу хәлиққә чин дилидин хизмәт қилишниң вә Әркинлик һәм Мустәқиллик идеаллириға садиқ болушниң үлгиси. ҚХА Рәисиниң орунбасари шундақла Елбасыниң сәясий жирақни көрүш маһаритигә диққәт ағдурди. У Нурсултан Назарбаевниң пайтәхтни көчириш тәшәббусиниң стратегиялик лайиһә болуп, әйнә шуниң билән Тунҗа Президентниң мәмликәт тәрәққиятида йеңи сәһипини ачқанлиғини тәкитлиди. Жансейит Түймебаевниң тәкитлишичә, йеңи пайтәхтниң қурулуши Тунҗа Президентниң Қазақстанға мустәқилликниң дәсләпки жиллиридики боһранни йеңишқа ярдәм бериш үчүн зөрүр болған ениқ вә тоғра қарарлириниң бири болди. Мәҗлискә қатнашқучилар пайтәхтниң йеңи нами тоғрилиқ гәп қилип, Тунҗа Президентниң мәмликәтниң баш шәһири үчүн оттуриға қойған тәғдиранә идеялирини алаһидә тилға алди вә шәһәр намини өзгәртиш тоғрилиқ қарарни қоллап-қувәтлиди. – Бу шәһәр – биринчи новәттә Елбасыниң әмәлгә ашқан армини. Тунҗа Президент мәзкүр лайиһини қолиға қәләм тутуп ишлиди, – деди Л.Гумилев намидики Евразия миллий университетидики ҚХА кафедрисиниң мудири, ҚХА Кафедрилири ассоциациясиниң рәиси Анатолий Башмаков. – Өткән әсирниң 90-жиллирида пайтәхтни көчириш тоғрилиқ қарар салмақлиқ, геосәясий, экологиялик, логистикилиқ вә башқиму көплигән мәхсәтләр һесапқа елинған һалда қобул қилинған салмақлиқ қарар болди. Һазир бу шәһәр достлуқ, милләтләрара вә конфессияләрара разимәнликниң рәмзигә айланди. Мундақ пикирни башқиму сөзгә чиққучилар – Қазақстан хәлқи Ассамблеяси Рәисиниң орунбасари Исламбек Салжанов, тарих пәнлириниң намзити, ҚХА әзаси Әмиржан Әлпеисов, “Қазақстан татарлири вә башқуртлириниң конгресси” җумһурийәтлик җәмийәтлик бирләшмисиниң рәиси Тауфик Каримов, “Ахыска” түрк этномәдәнийәт мәркизи” җәмийәтлик бирләшмисиниң пайтәхттики шөбисиниң рәиси Аскер Пириев, “Вайнах” чечен-ингуш мәдәнийәт мәркизиниң әзаси Юсуп Келигов, “Хазар” әзәрбәйҗан җәмийәтлик бирләшмисиниң рәиси Видади Агаев қоллап-қувәтлиди. Мәҗлис ахирида “Жаңғыру жолы” Яшлар һәрикити” җумһурийәтлик җәмийәтлик бирләшмисиниң рәиси Тимур Жумурбаев ҚХАниң пайтәхт намини өзгәртишни қоллап-қувәтләп қобул қилған мураҗиитини оқуп бәрди.

425 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы