• “Мәнму уйғур мәктивини таллидим”
• 03 Сәуір, 2019

«Әвладимни пәқәт ана тилида оқутимән»

Бәхтишат СОПИЕВ, «Уйғур авази» Пешқәдәм устаз Әкрәм Садирий Қорам оттура мәктивини тамамлап, ҚазПИниң физика-математика факультетини пүтәргәндин кейин һаятиниң қириқ жилини маарип саһасиға беғишлап, көплигән шагиртларни тәрбийиләп чиқти. Шуниң билән бир қатарда иҗадийәттиму үнүмлүк әмгәк қилди. У он икки китапниң муәллипи, Қазақстан Язғучилар иттипақиниң әзаси. Әмгәкчиқазақ наһийәсиниң Пәхрий граждини. Униң һаятий шиари: «Әвладимни пәқәт ана тилида оқутимән». – Буни мән пәқәт муәллим болғанлиғим үчүн ейтиватқиним йоқ, – дәйду Әкрәм ака. – Кәспидин қәтъий нәзәр, һәрбир уйғур шундақ пикирдә болуши керәк. Әпсус, «Уйғур мәктивиниң келәчиги йоқ» дегән пикир қуруқ банә сүпитидә ейтилмақта. Уйғур мәктивини тамамлиған Шөһрәт Митәлипов сиңлиси Майсәм билән медицина саһасида дуния әһлини өзигә қаратти. Техи түнүгүнла уйғур мәктивиниң учумкари Камалҗан Надиров министрниң орунбасари болди. Демәк, уйғур мәктивиниң келәчиги бар. Әкрәм акиниң өмүрлүк җүпти Гөһәрбанум һәдиниңму пикри шундақ. У яқму устаз. Әр-аял бәш пәрзәнт сөйүп, тәрбийиләп, қатарға қошти. Уларниң һәммиси уйғур синиплирида оқуди. Үч пәрзәнди алий билимлик. Оғли Пәрһатҗан – агроном, қизлири Гүлчеһрәм вә Диләрәм ата-ана изини бесип, устазлиқ кәспини таллавалди. Барлиқ нәврилири уйғур синиплирида оқуйду. Чоң нәвриси Назимҗан – Шинҗаң педагогика университетини тамамлап, Һазир Алмутида бир ширкәттә ишләйду. Шәхсий тиҗарәтчилик биләнму шуғуллиниду. Җүръәт билән Хеличәм – медицина хадимлири. Әрфат медицина колледжиниң студенти. Илһам чоң бир ресторанда ашпәз болуп ишләйду. Мәктәпни әла баһаларға түгәткән Зулхумар – Қизлар педагогика университетиниң инглиз-хитай тиллири факультетиниң студенти. Сүбһинур, Сүбһи, Нурәләм, Ирадәм, Әхтәм Зулһаят, Гүлгинә мәктәптә өз ана тилида билим еливатиду. Нәвриләр «яхши», «әла» дегән баһаларға оқуйду. Болупму Сүбһи һәққидә муәллимләрдин наһайити яхши инкасларни аңлидуқ. Сүбһи әлачи, мәктәпниң вә йезиниң җәмийәтлик ишлириғиму паал арилишип кәлмәктә. Бирнәччә қетим олимпиадиға вә җумһурийәтлик конкурсларға иштрак қилип, алдинқи орунлардин көрүнди. Шундақла бовиси охшаш иҗадийәткә бәк қизиқиду. Униң шеирлири «Ғунчә», «Иҗаткар» журналлирида, «Уйғур авази» гезитида йоруқ көрди. Әлачи оқуғучи бирнәччә қетим Алмута шәһиридә лагерьда дәм елип, Астана вә Үрүмчи шәһәрлирини зиярәт қилиш бәхтигә еришти. – Қазақстанда өз ана тилида оқуп, билим елиш үчүн барлиқ шараит яритилған, – дәйду Сүбһи биз билән болған сөһбәттә. – Шуңлашқиму мениң Мустәқил елимиз тоғрилиқ язған шеирлирим наһайити көп. Шуларниң бири мундақ башлиниду: Көк байриғин йәлпүлдитип, Гүлләнгәндур бағу-бостан. Барчә милләт яшайдиған Бизниң Вәтән – Қазақстан.