• “Мәнму уйғур мәктивини таллидим”
• 10 Сәуір, 2019

«Бовам мениң дәрислиримгә қатнишатти»

Бәхтишат СОПИЕВ, «Уйғур авази» — Рәмити бовамниң мени уйғур мәктивигә өзи йетиләп апарғини һелиму ядимда. Чоң болғандин кейин уқсам, буниң өзигә чушлуқ сәвәви бар екән — дәйду язғучи, журналист Малик Садировниң нәвриси Юлтуз. — Бовам 1937-жили Или вилайитиниң Аблаш йезисида дехан аилисидә дунияға кәлгән. У бешидин өткәнлирини бизгә пат-пат сөзләп беридиған. Дуч кәлгән қийинчилиқларға қаримай, оқуп билим апту. «Силәрниң немәңләр йетишмәйду? Кийимиңлар пүтүн, қосиғиңлар тоқ. Ата-анаңлар йениңларда. Пәқәт оқуш керәк» дәтти бовам. У бир йешида дадиси Абубәкридин, бәш йешида аниси Селимхандин айрилидудә, акиси Абдумеҗитниң тәрбийисидә болиду. 1957-жили Ғулҗа шәһиридики Әхмәтҗан Қасимий намидики билим юртини тамамлап, Үрүмчидики Шинҗаң тил институтиниң рус тили факультетиға оқушқа чүшиду. 1961-жили мәзкүр билим дәргаһини пүтирип, 1963-жилғичә Ғулҗа шәһиридики Сталин намидики рус оттура мәктивидә, кейинирәк Байкөл башланғуч мәктивидә муәллим болуп ишләйду. Малик Абубәкриоғлиниң журналистикилиқ паалийити һәққидә нәврисигә өзәм сөзләп бәрдим. У 1970 — 1997-жиллири «Коммунизм туғи» (һазирқи «Уйғур авази») вә униң қошумчиси «Йеңи һаят» гезитлирида тәрҗиман, мухбир, бөлүм башлиғи лавазимлирида ишлиди. Униң қәрәллик мәтбуатта йүзлигән мақалилири елан қилинди. Үнүмлүк иҗадий паалийити түпәйли китапханларға нурғунлиған бебаһа әсәрлирини қалдуруп кәтти. «Тунҗа қәдәм» (1979-ж.), «Биз вә жиллар» (1992-ж.) намлиқ умумий топламға киргән әсәрлири вә «Матанәт» (2008-ж.) вә «Ату» (2013-ж.) дастанлири шулар җүмлисидиндур. — Һөрмәтлик дәм елишқа чиққандин кейинму бовам иҗадийәт мәйданида техиму паал қәләм тәвритишкә башлиди, — дәп қошумчә қилди Юлтуз. — Униң «Җаһаләт вә асарәт», «Уйғур қисмити яки «Ату» паҗиәси һәққидә һәқиқәт», «Азатлиқ җәңчиси яки Әҗдиһаға санчилған нәйзә» намлиқ әсәрлири бар. Уларниң һәммисини қизиқиш билән оқуп чиқтим. Малик акиниң үч пәрзәнди, он нәвриси вә бәш чәвриси бар екән. Шәһәрдә турған жиллири шараитқа бола балилири рус мәктивидә тәһсил көриду. Мәлум болушичә, кейин у нәврилирини ана тилида оқутуш үчүн йезиға көчүп кәткән екән. У бәш нәврисини уйғур мәктивидә оқутупту. Юлтуз шуларниң бири. Уни мәктәпкә бовиси өзи йетиләп елип кәлгәнлигини жуқурида ейттуқ. Һәтта, дәрислиригә қатнишаттекән. Юлтуз Тәшкәнсаздики оттура мәктәпни «Алтын белгігә» тамамлап, һазир Алмутидики чәт әл тиллири вә хәлиқара мунасивәтләр университетида оқуватиду. «Оқушқа өз күчүм билән чүштүм. Ана тилимда оқуғинимға һечқачан өкүнмәймән. Әксичә мәғрурлинимән» дәйду Юлтуз. Һазир Садировларниң иккиси – Дилшат билән Адаләт уйғур тилида билим еливатиду. Һәр иккилиси синипидики үлгилик оқуғучилардин. Әмгәкчиқазақ наһийәси.