• Әхбаратлар еқими
• 10 Сәуір, 2019

Гөзәлләр арисида уйғур қизлириму бар

Мәшүр САСИҚОВ, «Уйғур авази» Йеқинда Алмута шәһиридә өткән «Алмута мәликиси – 2019» конкурсида 16 яшлиқ Диана Абишева ғалип чиқип, җәнубий пайтәхтниң әң гөзәл қизи аталди. Шәһәрдики 105-мәктәпниң оқуғучиси Диана пәқәт оқушта әлачи болупла қалмай, бирнәччә чәт әл тилини мукәммәл билиду вә модель болуп ишләйду. У конкурста өзиниң тәбиәт әта қилған гөзәллиги арқилиқ тәңтушлиридин алаһидә пәриқләнгән һалда қазилар топини қайил қилди. Диана май ейида елимиз пайтәхти Нур-Султанда өтидиған «Қазақстан мәликиси – 2019» конкурсиға 2018-жили Алмутиниң әң гөзәл қизи аталған Камилла Қожаханова билән биллә бариду. Тәшкилий топ әзалириниң ейтишичә, конкурс қатнашқучилири киндик қени төкүлгән жутиниң туристлиқ истиқбали тоғрилиқ видеороликларни тәйярлап бериши шәрт. Әнди «Алмута мәликиси – 2019» конкурсиниң финалиға қатнашқан он тоққуз қиз төрт ай тәйярлиқ көргән. Уларниң арисида уйғур қизлириму бар. Уларниң бири — Сабина Қурбанова, вице-мисс аталса, йәнә бири – Сәйярә Надирова «Мисс Этно-дива» номинацияси бойичә мәхсус мукапатқа егә болди. Башқилардин қелишмай, өз қабилийитини ениқ намайиш қилған Сабина билән Сәйярә конкурсниң айрим бөлүмлиридә миллитимизгә хас алаһидиликләрни көрситишкә тиришқан. Улар бу қетим алдинқи орунларға қол йәткүзмисиму, мошундақ мәдәний чарә-тәдбирләрдин бизниң қаракөзлиримизниң чәттә қалмай келиватқанлиғи, әлвәттә, һәммимизни хошал қилиду. Шундақ екән, Сабина Қурбанова билән Сәйярә Надироваға утуқ тилигәч, келәчәктә, илаһим, «Дуния мәликисиниң» таҗисини егиләш несип болсун демәкчимиз. сүрәттә: С.Қурбанова (солдин оңға), Д.Абишева вә С.Надирова.