• Йеңилиқлар
• 10 Сәуір, 2019

Яхши хошнидарчилиқ әнъәниләр асасида

Қазақстан Президенти Қасым-Жомарт Тоқаев Россия Федерациясидә рәсмий сәпәрдә болди. Қасым-Жомарт Тоқаевниң Россиягә қилған рәсмий сәпири – униң Дөләт рәһбири сүпитидики биринчи чәтәллик сәпири. Униң наһайити қисқа қәрәлдә тәйярланғанлиғиға қаримай, (Россия рәһбири 21-мартта телефон арқилиқ сөзләшкәндә Қазақстан Президентини тәклип қилған еди), күн тәртиви рәсмий чарә-тәдбирләргә наһайити бай болди. Мәлумки, Қазақстан Җумһурийитиниң Тунҗа Президенти Нурсултан Назарбаев Қазақстан вә Россия мунасивәтлириниң дәриҗиси тоғрилиқ гәп қилғанда, уларни дөләтләрара алақиларниң үлгиси дәп атап, мустәһкәмләшкә чоң һәссә қошқан еди. Йеңи Дөләт рәһбириниң Москваға қилған сәпириму Қазақстан сәяситиниң мошу йөнилишиниң давамлишидиғанлиғини көрситиду вә мәмликитимизниң хошна дөләт билән достлуқ мунасивәтләрни, стратегиялик шерикликни күчәйтип, тәрәққий әткүзүш йолини давамлаштуридиғанлиғини тәстиқләйду. Қасым-Жомарт Тоқаев Қазақстан Җумһурийитиниң Президенти лавазимиға киришиши биләнла Владимир Путинниң Россия Федерациясини зиярәт қилишқа тәклип қилиши Россия үчүнму Қазақстан билән болған мунасивәтләрниң муһим һесаплинидиғанлиғини испатлайду. Болуп өткән учришиш мошу фактни тәстиқлиди. Қасым-Жомарт Тоқаев Владимир Путинға Қазақстан Җумһурийитиниң Президенти лавазимиға киришиши билән тәбрикләп, сәмимий тиләкләрни ейтқанлиғи үчүн миннәтдарлиқ билдүрди вә өзиниң Россия Федерациясигә болған биринчи чәтәллик сәпириниң рәмзгә егә екәнлигини тәкитлиди. Дөләт рәһбири Қазақстан вә Россияниң һазирқи өзара һәрикитиниң көплигән мәмликәтләр үчүн яхши мунасивәтләр үлгиси болуп хизмәт қилидиғанлиғини атап көрсәтти. – Қазақстан рәһбири сүпитидә мән Қазақстан Җумһурийитиниң Тунҗа Президенти – Елбасы Нурсултан Әбишоғли Назарбаев сәяситиниң варислиғини тәминләшни, шундақла Қазақстан-Россия һәмкарлиғини һәртәрәплимә вә паал тәрәққий әткүзүш ишини давамлаштурушни нийәт қиливатимән, – дәп билдүрди Қасым-Жомарт Тоқаев. Владимир Путин Кремльда Қазақстан Президентиға илтипат билдүрүп, уни лавазимиға киришиши билән тәбриклиди вә өзлириниң илгиридин тонуш екәнлигини һәм Қазақстан вә Россия мунасивәтлирини мустәһкәмләш вә тәрәққий әткүзүш йолида бирлишип иш елип беришниң улар үчүн йеңилиқ әмәс екәнлигини тәкитлиди. – Сиз бизниң мунасивәтлиримизниң қандақ дәриҗидә екәнлигини билисиз, Россия вә Қазақстан оттурисидики алақиларниң шундақ жуқури дәриҗигә чиқиши үчүн өзиңизму нурғун ишларни әмәлгә ашурдиңиз. Әлвәттә, биринчи новәттә, бу Қазақстанниң Тунҗа Президентиниң хизмити, бирақ пүткүл команда мошу мәхсәт үчүн ишлиди вә биз нурғун нәтиҗиләргә йәттуқ. Сөзсизки, биз пәқәт шерикла әмәс, биз – йеқин иттипақдашлар – һәм хәлиқара тәшкилатлар йөнилишидә, һәм иккитәрәплимә планда бизниң мунасивәтлиримиз наһайити нәтиҗидарлиқ тәрәққий етиватиду. Биз хәлиқлиримизниң турмуш дәриҗисигә тәсир йәткүзүватқан җиддий нәтиҗиләрни қолға кәлтүрүватимиз. Сизниң өзиңиз билән кәлгән чоң тәркиптики командиңиз сәпириниң бизниң көп планлиқ иттипақдашлиқ мунасивәтлиримизни күчәйтишкә хизмәт қилидиғанлиғиға ишинимән, – дәп тәкитлиди Россия Федерациясиниң Президенти. Сөһбәт җәриянида Владимир Путин Қасым-Жомарт Тоқаевтин Нурсултан Назарбаевқа салам йәткүзүшини илтимас қилди. Дөләт рәһбири бу илтимасни қанаәтлиниш билән орунлайдиғанлиғини тәкитлиди. Қасым-Жомарт Тоқаев билән Владимир Путин музакириләр йәкүни тоғрилиқ аммивий әхбарат васитилири үчүн мәтбуат конференциясини өткүзди. Қазақстан вә Россия Президентлири музакириләр йәкүни бойичә Бирләшкән Билдүрүш қобул қилди. Билдүрүштә Қазақстан Җумһурийити вә Россия Федерациясиниң өзара ишәнчә, стратегиялик шериклик вә һәртәрәплимә һәмкарлиқ асасида тәң һоқуқлуқ һәм суверен дөләтләр сүпитидә иттипақдашлиқ мунасивәтләрни һәм интеграциялик өзара һәрикәтни тәрәққий әткүзүватқанлиғи атап көрситилиду. Униңдин ташқири мәмликәтлиримизниң ениқ саһалардики һәмкарлиқни тәрәққий әткүзүшкә нишан қилинған бирқатар келишимләр имзаланди. Дөләт рәһбири рәсмий сәпири даирисидә Россия Федерацияси Федерал Жиғини Федерацияси Кеңишидә болуп, Кеңәш рәиси Валентина Матвиенко билән учрашти. Учришиш давамида Қасым-Жомарт Тоқаев Россиягә қилған дәсләпки рәсмий сәпириниң рәмзгә егә болуп, униң өзара һөрмәт вә ишәнчигә асасланған иккитәрәплимә стратегиялик шерикликниң жуқури дәриҗисини көрситидиғанлиғини тәкитлиди. Қазақстан Президенти Валентина Матвиенкониң МДҺ Парламентларара Ассамблеясиниң рәиси лавазимидики паалийитини жуқури баһалап, Федерация Кеңишиниң спикериға иккитәрәплимә парламентлиқ алақиларни күчәйтиш бойичә бирләшкән ишлар вә хәлиқара қурулумлар даирисидики үнүмлүк һәмкарлиқ үчүн миннәтдарлиғини билдүрди. Өз новитидә Валентина Матвиенко парламентлиқ алақиларни күчәйтишниң муһим екәнлигини тәкитләп, мошу сәпәрниң Қазақстан вә Россия стратегиялик шериклигини техиму күчәйтидиғанлиғиға ишәнчә билдүрди. Дөләт рәһбири Валентина Матвиенко билән учришиштин авал Кремль сепилидики Намәлум солдат қәбригә гүл қоюш мәрасимиға қатнашти вә Улуқ Вәтән урушида һалак болған җәңчиләрниң роһиға тазим қилди.