• Асасий мақалилар
• 10 Сәуір, 2019

Елбасы Идарисигә җиддий вәзипиләр жүкләнди

Назарбаев Мәркәздә Қазақстан Җумһурийитиниң Тунҗа Президенти – Елбасы Нурсултан Назарбаевниң рәислигидә кеңәшмә болуп өтти. Кеңәшмә ишиға Қазақстан Җумһурийитиниң Тунҗа Президенти – Елбасы Идарисиниң рәһбири Махмуд Қасымбеков, Тунҗа Президент ярдәмчиси – Қазақстан Җумһурийити Президенти Иш башқурғучисиниң биринчи орунбасари Абай Бисембаев, Тунҗа Президент Идариси қурулумлуқ бөлүнмилириниң, шундақла Тунҗа Президент Китапханиси вә Фондиниң рәһбәрлири қатнашти. Кеңәшмә давамида Елбасы Нурсултан Назарбаевқа Қазақстан Җумһурийитиниң Тунҗа Президенти – Елбасы Идариси паалийитиниң башлинишиға бағлиқ тәшкилий-һоқуқ чарә-тәдбирлириниң аяқлашқанлиғи тоғрилиқ доклад қилинди, шундақла кадрларни таллаш ишиниң нәтиҗилири тоғрилиқ әхбарат берилди. Нурсултан Назарбаев Тунҗа Президент Идариси алдиға қоюлған вәзипиләрниң өз вақтида вә нәтиҗидарлиқ орунлинишини тәминләшниң зөрүр екәнлигини атап көрсәтти. – Мән тегишлик Конституциялик қанун билән тәртипкә кәлтүрүлидиған Тунҗа Президент – Елбасы вәзипилиригә кириштим. Униңдин ташқири мән Бехәтәрлик Кеңишиниң, Қазақстан хәлқи Ассамблеясиниң Рәиси, “Nur Otan” партиясигә рәһбәрлик қилишни давамлаштуруватимән. Мошу барлиқ паалийәтни тәминләш үчүн Тунҗа Президент Идариси қурулди. Барлиқ тәшкилий мәсилиләр һәл қилинди. Әнди уларға жүкләнгән вәзипиләрни орунлашқа киришиш зөрүр, – деди Елбасы. Қазақстанниң Тунҗа Президенти шундақла дөләтни буниңдин кейин тәрәққий әткүзүш бойичә стратегиялик вәзипиләрни сүпәтлик орунлаш мәхситидә нәтиҗидарлиқ идариләрара өзара һәрикәтни йолға қоюшниң зөрүр екәнлигини тәкитлиди. – Бүгүнки таңда һәм Президент, һәм Һөкүмәт мән тәстиқлигән программилиқ һөҗҗәтләрдә, Мәктүптә бәлгүләнгән, шундақла партия қурултийида қоюлған вәзипиләр үстидә ишләватиду. Биз һәммимиз Қазақстан үчүн, мәмликәтниң турақлиқлиғини, бирлигини вә тәрәққиятини тәминләш үчүн ишлишимиз керәк. Бу бизниң умумий вәзипимиз, – дәп тәкитлиди Нурсултан Назарбаев. Тунҗа Президент җәмийәтлик әһмийәткә егә тәшәббусларни әмәлгә ашурушниң муһим екәнлигигә алаһидә диққәт ағдурди. Бу йосунда Елбасы Нурсултан Назарбаев Тунҗа Президент Фондиниң талантлиқ яшларни һәртәрәплимә қоллап-қувәтләшкә қаритилған лайиһилирини әмәлгә ашурушниң алаһидә актуаллиққа егә екәнлигини атап көрсәтти. Нурсултан Назарбаев кеңәшмә йәкүни бойичә бирқатар ениқ тапшурмиларни бәрди, дәп хәвәрләйду Қазақстан Җумһурийитиниң Тунҗа Президенти – Елбасыниң мәтбуат хизмити.