• Баш қошуш
• 18 Сәуір, 2019

Жигитбешиниң һесавити тиңшалди

Ершат ӘСМӘТОВ, «Уйғур авази» Дүшәнбә күни Алмута шәһиридики «Достлуқ» мәһәллисидики «Кариван» кафесида мәзкүр жут җамаәтчилигиниң кәңәйтилгән жиғини болуп өтти. Униңға йәрлик аһалидин ташқири җәмийәтлик тәшкилатларниң вәкиллири вә зияли әһли қатнашти. Униңда өткән жили мәһәллиниң баш жигитбеши болуп сайланған Азат Ибрагимовниң (сүрәттә, оңда) бир жил ичидә әмәлгә ашурған ишлириниң һесавити тиңшалди. Риясәтчи, журналист Ядикар Сабитов көпчиликни жиғинниң күн тәртиви билән тонуштуруп, дәсләпки сөзни баш жигитбешиға бәрди. Азат Ибрагимов өзи рәһбәрлик қилған бир жил ичидә әмәлгә ашурған ишларға тәпсилий тохталди. – Ишни дәсләп жутдашлиримниң һаят нәпәси, турмуш-тирикчилиги, проблемилири билән тонушуштин башлидим, – дәп сөзини башлиди баш жигитбеши. – Йенимға инавәтлик адәмләрни, ақсақалларни елип, мәһәллимизниң бешидин ахириғичә һечбир кочини қоймай арилап чиқтуқ. Шуниңдин кейин миллий мәдәнийитимиз җанкөйәри Әли Әхмәтов рәһбәрлигидики 13 адәмдин тәркип тапқан Ақсақаллар кеңишини қурдуқ. Әйнә шу мөтивәрлиримизниң дана йол-йоруқ, мәслиһәтлири билән иш елип бериватимиз. Азат Ибрагимов өз нутқида жуттики той-төкүн, нәзир-чирақларни өз қаидиси бойичә, сәрәмжан өткүзүш вәзипилиридин ташқири, аразлиқ-наразилиқ пәйда болған аилиләрни яхши-хоп қилиш, ярдәмгә муһтаҗ инсанларға қол учини созуш, тилимизни, урпи-адәт вә әнъәнилиримизни сақлаш бойичә әмәлгә ашурған ишлирини ениқ фактлар асасида ейтип өтти. Болупму 2019-жилға миллий нәширлиримизгә, җүмлидин уларниң карванбеши болған җумһурийәтлик «Уйғур авази» гезитиға муштири топлаш мәвсүмидә жигитбашлири билән ханим-қизларниң бөләкчә паалийәтчанлиқ көрсәткәнлигини алаһидә тилға елип, уларға миннәтдарлиғини билдүрди. Натиқ шундақла мусулманчилиқ хәйри-ихсан бериш мәсилисидә миллий мәктәплиримизгә дегәндәк көңүл бөлүнмәйватқанлиғини алаһидә ечиниш илкидә тәкитләп өтти. Умумән жиғин қатнашқучилири баш жигитбешиниң бир жиллиқ ишиға қанаәтлинәрлик дәп баһа бәрди. Шуниңдин кейин сөз новитини алған җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Ярмәһәммәт Кебиров, ҖУЭМниң Алмута шәһәрлик шөбиси рәисиниң орунбасари, Алмута шәһәрлик жигитбашлири кеңишиниң рәиси Сабит һаҗим Йүсүпов, Алмута шәһири Әвезов наһийәлик Уйғур мәдәнийәт мәркизиниң рәиси Бурһандин Таҗидинов, миллий мәдәнийитимиз җанкөйәри Садиқжан Юнусов вә жут мөтивәри Ислам Илахунов сәмимий тәнқитлирини, баһалиқ пикир-тәклиплирини ейтип, баш жигитбешиниң кәлгүси паалийитигә утуқлар тилиди.